Yoswa 23 - Chiyawo Bible

Maloŵe gambesi ga Yoswa kwa Aisalaeli

¹ AMBUJE* ŵacinjilicisye Aisalaeli kwa yaka yejinji kwa amagongo ŵawo ŵakwasyungulila. Mu jele ndaŵijo, Yoswa ŵaliji ali acekulwipe mnope,

² ni ŵaŵilasile pamo ŵakwimilila kutyocela ku mitundu ja Isalaeli, acakulungwa, ŵakulongolela, ŵakulamula, ni acakulungwa ŵa ngondo, ni ŵatite, “Une sambano njekulwipe mnope.

³ Jemanja ayiweni yosope yayitesile AMBUJE Mlungu jwenu kwa mitundu josope jeneji ligongo lya jemanja. AMBUJE Mlungu jwenu aŵele ali kumputila jemanja ngondo.

⁴ Une mbelece cilambo ca mitundu jine jijili ciŵelape kwa mitundu jawo mpela cawocawope nambo soni ca mitundu jinajipundile kala, kutyocela Lusulo lwa Yolodani kungopoko lyuŵa mpaka ku Nyasa ja Mediteleniyani kungapilo lyuŵa.

⁵ AMBUJE Mlungu jwetu ŵatupele cilanga* kuti, tacawucisya amagongo ŵawo munyuma kwatila jemanja, nipo tacatoposya, jemanja pitacijawulaga pasogolo, nipo jemanja tacijigala cilambo cawo. AMBUJE Mlungu jwetu tacisunga cilanga cakwe. Tacijitoposya mitundu jijili ciŵelape mcilambomo.

⁶ Myoyo msamalicisye mnope kuti mpikanile ni kuyitenda yosope yene yiŵalembile Mose* m'buku ja Malamusi. Mkanyosya mbali jimo jilijose ja Malamusigo,

⁷ Nipo soni mkalogwa kulumbikana ni ŵandu aŵa ŵasigele pasikati penupa atamose kukolanga mena ga milungu jawo, kulumbila* mu gele menago kapena kujilambila jele milungujo atamose kujijinamila.

⁸ M'malo mwakwe, mŵe ŵakulupicika kwa AMBUJE, mpela mumŵelele mpaka sambano jino.

⁹ AMBUJE ŵajitopwesye mitundu jajikulungwa ni jamacili, jemanjajo piŵajawulaga pasogolo nipo paliji pangali ni jumo jose juŵapakombwele kusisyana nawo.

¹⁰ Jwalijose jwa jemanja mpaka mpakombole kwatisya acalume 1,000, ligongo AMBUJE Mlungu jwenu ni ŵakumputila ngondo jemanja, mpela muŵatendele cilanga jwalakwejo.

¹¹ Myoyo mŵe ŵakulolecesya, kwanonyela AMBUJE Mlungu jwenu.

¹² Naga ngakupikanila ni kulipwatika kwa mitundu jine jijisigele pasikati pawoji ni kutanda kutenda najo ulombela,

¹³ m'manyilile kuti AMBUJE Mlungu jwenu ngasajitoposya soni jele mitunduji jemanja pitimjawuleje pasogolo. Nambo kuti, tijiciŵa jakogoya kwa jemanja mpela yitega kapena lisimbo nipo kupweteka kwakwe mpela ŵaputile ni simbo kunyuma kwawo kapena miŵa m'meso mwawo. Nipo ayi tiyicipitilisya mpaka pangali jumo jwa jemanja jutacisigala mcilambo cakusalalaci ciŵampele AMBUJE Mlungu jwenu.

¹⁴ “Sambano ndaŵi jangu jakuwa jikwanile. Jwalijose jwa jemanja akumanyilila mu mtima ni mu umi mwakwe kuti AMBUJE Mlungu jwenu ŵampele jemanja yindu yosope yambone yiŵatesile cilanga. Cilanga cilicose ciŵacitesile jwalakwe ŵacisunjile; pali pangali cimo cicalepelece.

¹⁵ Nambotu mpela muŵasunjile jwalakwe cilanga cilicose ciŵatesile kwa jemanja, myoyopeyo soni tacitenda cakusakala cilicose kwa jemanja ciŵaŵecete kuti tacicitenda.

¹⁶ AMBUJE Mlungu jwetu ŵatesile cilanga ni jemanja, nipo jwalakwe akwembeceya kuti jemanja tacikulupicika naco. Nambo naga akumleka ni kugalawucila kwa milungu jine, tacatumbilila ni kwapa cilango. Ndaŵi jijojo tipaciŵa pangali jwalijose jwakusigala mcilambo cambone ciŵapele jwalakweci.”