Yoswa 22 - Chiyawo Bible

Yoswa akusitumisya kumusi ngosyo sya kungopoko lyuŵa

¹ Yoswa ŵaŵilasile pamo ŵandu ŵa ngosyo sya Lubeni, Gadi, ni kungopoko lyuŵa kwa upande wa Manase.

² Jwalakwe ŵatite kwa jemanjajo, “Jemanja atesile yosope yene yiŵalamwile Mose* jwakutumicila jwa AMBUJE* kuti ayitende, nipo apikanile malamusi gangu gosope.

³ Jele ndaŵi josopeji nginimwatila ni kamo kose Aisalaeli acimjenu. Mŵele ŵakusamalicisya pakupikanila Malamusi ga AMBUJE Mlungu jwenu.

⁴ Sambano mpela muŵaŵecetele, AMBUJE Mlungu jwenu ŵapele mtendele Aisalaeli acimjenu. Myoyo ajawuleje, kuwujila kumusi ku cilambo ciŵasumwile ni kuŵa cawo, cilambo ca ku mbali ja kungopoko lyuŵa kwa Lusulo lwa Yolodani, ciŵapele Mose.

⁵ Mlolecesye kuti mkugapikanila malamusi giŵamlamwile Mose gakuti: mwanonyeleje AMBUJE Mlungu jwenu, kutenda lisosa lyakwe, kupikanila malamusi gakwe, mŵe ŵakulupicika kwa Mlungu jwenu, ni kumtumicila ni mtima wenu wosope ni umi wenu wosope.”

^6-8 Yoswa ŵatumisye jemanjajo kumusi, mkanatyoce jwalakwe ŵaŵecete maloŵe aga: “AMBUJE apitilisye kwapa upile jemanja. Jemanja mkwawula kumusi mli ŵakusicila kwejinji, pamo ni yilangwa yejinji, silifa,* golidi,* bulonsi, ayiloni, ni nguwo syejinji. Mkagaŵane ni acalongo acimjenu yimjigele kutyocela kwa amagongo ŵenu.” Nipo jemanjajo ŵatyosile kwawula kumusi. Mose ŵapelece cilambo ca kungopoko lyuŵa kwa Yolodani kwa hafu ja lukosyo lwa Manase, nambo kwa litika linelyo Yoswa ŵapelece cilambo ca kungapilo lyuŵa kwa Yolodani, pamo ni mitundu jine.

⁹ Myoyo ŵandu ŵa lukosyo lwa Lubeni, Gadi, ni kungopoko lyuŵa kwa Manase ŵawujile kumusi. Ŵalesile Aisalaeli ŵakusigala ku Shilo mcilambo ca Kenani, cilambo cawo ca Giliyadi, cili kungopoko lyuŵa kwa Lusulo lwa Yolodani. Mose ŵaliji ali ŵasalile kalakala kuti, “Aci ni cilambo cakusosa AMBUJE kuti acijigale ciŵe cawo.”

Malo gakupelecela mbopesi ciŵandika ni Lusulo lwa Yolodani

¹⁰ Mitundu ja Lubeni, Gadi, ni kungopoko lyuŵa kwa Manase pijayice ku Geliloti, mbali jijojo ja kungapilo lyuŵa kwa Yolodani, ŵataŵile kweleko malo ga mbopesi gamakulungwa ni gakutesya lung'wanu ciŵandika ni Lusulo lwa Yolodani.

¹¹ Aisalaeli ŵane wosope ŵapikene kuti ŵandu ŵa lukosyo lwa Lubeni, Gadi, ni kungopoko lyuŵa kwa Manase ŵataŵile malo ga mbopesi ku Gililoti, ku mbali jawo ja Yolodani.

¹² Ŵandu ŵa ku Isalaeli piŵapikene yeleyi, likuga lyosope lyayice pamo ku Shilo kuti ajawule akamenyane ni mitundu ja kungopoko lyuŵa.

¹³ Ŵandu ŵa ku Isalaeli ŵamtumile Finihasi mwanace jwa Eliyesa jwakutaga mbopesi, kuti ajawule kwa ŵandu ŵa ngosyo sya Lubeni, Gadi, ni kungopoko lyuŵa kwa upande wa Manase mcilambo ca Giliyadi.

¹⁴ Acakulungwakulungwa likumi ŵakutyocela ku ngosyo syosope ŵalongene pamo ni Finihasi ni jwamkulungwa jwa liŵasa lililyose.

¹⁵ Jemanjajo ŵayice ku cilambo ca Giliyadi, kwa ŵandu ŵa Lubeni, Gadi, ni kungopoko lyuŵa kwa Manase,

¹⁶ nipo ŵaŵecete m'malo mwa likuga lyosope lya AMBUJE, ŵatite kwa jemanjajo, “Ligongo cici jemanja atesile aci cindu cakusakala cakusisyana ni Mlungu jwa Aisalaeli? Mwajimucile AMBUJE pakulitaŵila jemanja jika aga malo ga mbopesiga! Jemanja basi ngakwakuya soni AMBUJE!

¹⁷ Akaliŵalila ulemwa* wetu utwalemwecesye AMBUJE ku Piyoli. Pajatu AMBUJE ŵatupele cilango ca mlili wakogoya uwawuleje ŵandu ŵajinji, atamose uwe tuli ŵandu ŵakwe. Sonitu tukulagape ligongo lya ulemwa ula. Ana ulemwa wewula nganiwukwana?

¹⁸ Ana jemanja mkukana kwakuya AMBUJE sambano? Naga mkwajimucila AMBUJE lelo, malaŵi AMBUJE tacimtumbilila jwalijose mu Isalaeli.

¹⁹ Ni naga mcilambo mwawo muli mwangaŵajilwa kupopelelamo, ayice ajinjile mcilambo ca AMBUJE, mujili Tenti jakwe. Aŵende malo gane pasikati petu. Nambo akasiŵajimucila AMBUJE kapena kuti akatutendesya uwe kuŵa ŵakwimucila pakutaŵa malo ga mbopesi konjecesya ku malo ga mbopesi ga AMBUJE Mlungu jwetu.

²⁰ Akaliŵalila muŵakanile kupikanila lilamusi Akani mwanace jwa Sela pa yindu yakusakala yiyikaŵajilwe kuyijonanga; likuga lyosope lya Aisalaeli lyapegwile cilango ligongo lya yeleyo. Nganaŵa Akanipe ŵiŵawile ligongo lya ulemwa wawo.”

²¹ Ŵandu ŵa mitundu ja Lubeni, Gadi, ni kungopoko lyuŵa kwa Manase ŵajanjile ŵakulongolela ŵa maŵasa ga kungapilo lyuŵa ŵala kuti,

²² “Mlungupe ni Jumo Jwamacili! Jwalakwe ni AMBUJE! Mlungupe ni Jumo Jwamacili! Jwalakwe ni AMBUJE! Jwalakwe akumanyilila citwatendele yeleyi, nipo tukusosa soni jemanja amanyilile! Naga uwe twajimucile nipo naga soni nganitwakulupilila AMBUJE, ni akasatuleka kuŵa ŵa umi soni.

²³ Naga nganitwapikanila AMBUJE ni kutaŵa malo gambopesi getugetupe kuti tujocelejepo mbopesi kapena kupanganyicisya masengo mbopesi sya utandi kapena mbopesi sya mkamulano, AMBUJE asyene atupe uwe cilango.

²⁴ Ngaŵa! Uwe twatesile yeleyi ligongo twajogwepe kuti msogolo muno yisukulu yawo yitakuŵeceta kwa yisukulu yetu kuti, ‘Mkwete nawo cici AMBUJE, Mlungu jwa Aisalaeli?

²⁵ AMBUJE alutesile Lusulo lwa Yolodani kuŵa malile ga pasikati pa uwe ni jemanja ŵandu ŵa Lubeni ni Gadi. Nganakola cilicose cakutenda ni AMBUJE.’ Ni yisukulu yawo komboleka kuyilekasya yisukulu yetu kwapopelela AMBUJE.

²⁶ Myoyo uwe twataŵile malo gakupelecela mbopesi, ngaŵa gakutinicisya mbopesi kapena gakupelecela mbopesi,

²⁷ nambo kuti m'malo mwakwe, gaŵe mpela cilocesyo ca ŵandu ŵetu ni ŵa jemanja, ni ca mipago ja kusogolo uwe tuli tuwile, kuti yakuwonadi uwe tukasitwapopelelaga AMBUJE. Tukusajigala kweleko mbopesi syetu kuti tutinisye, mbopesi syetu, ni mbopesi sya mkamulano pameso pa AMBUJE. Kweleku kwaliji kuyilekasya yisukulu yawo kuti yikasiyiŵeceta kwa yisukulu yetu kuti, ‘Jemanja nganimŵa ŵandu ŵa AMBUJE.’

²⁸ Ganisya kwetu kwaliji kwamti, naga tiyitendece yeleyi, yisukulu yetu mpaka yiŵecete kuti, ‘Alole! Acinangolo ŵetu ŵapanganyisye malo ga mbopesi gakulandana ni malo ga AMBUJE ga mbopesi. Nganigaŵa gakocela mbopesi kapena ga mbopesi, nambo mpela cilocesyo ca ŵandu ŵetu ni ŵa jemanja.’

²⁹ Yakuwona yakwe uwe ngamkanitwajimucila AMBUJE kapena kuleka kwakuya sambano jino ni kutaŵa malo gakupelecela mbopesi syakutinisya kapena mbopesi ja utandi kapena mbopesi sine. Uwe ngamkanitutaŵa malo gakupelecela mbopesi gane gakusisyana ni malo gakupelecela mbopesi ga AMBUJE Mlungu jwetu gigakusaŵaga pasogolo pa Tenti jakwe.”

³⁰ Finihasi jwakutaga mbopesi ni acalume likumi ŵakulongolela ŵiŵayice najo kutyocela ku mitundu ja kungapilo lyuŵa piŵapikene yiŵaŵecete ŵandu ŵa mitundu ja Lubeni, Gadi, ni kungopoko lyuŵa kwa Manase, ŵajikutile nayo.

³¹ Finihasi mwanace jwa Eliyesa jwambopesi, ŵatite kwa jemanjajo, “Sambano tumanyilile kuti AMBUJE ali pasikati petu. Jemanja nganiŵajimucila AMBUJE, myoyo jemanja ŵakulupwisye ŵandu ŵa ku Isalaeli ku cilango ca AMBUJE.”

³² Myoyo Finihasi ni ŵakulongolela ŵala ŵawujilile kutyocela kwa ŵanace ŵa Lubeni ni Gadi, mcilambo ca Giliyadi, kuja ku cilambo ca Kenani kwa ŵanace ŵa Aisalaeli ni kwasalila yosope yene.

³³ Aisalaeli ŵajikutile ni kumlapilila Mlungu. Jemanjajo nganaŵeceta soni ya kuja kutenda ngondo ni konanga cilambo ciŵatamaga ŵandu ŵa lukosyo lwa Lubeni ni Gadi.

³⁴ Ŵandu ŵa Lubeni ni Gadi ŵatite, “Aga malo gambopesiga gali mboni kwa uwe wosope ŵene kuti AMBUJE ali Mlungu.” Myoyo malogo ŵagapele lina lyakuti “Mboni.”