Yoswa 2 - Chiyawo Bible

Yoswa akwatumisya ŵakusonda mwa asili ku Yeliko

¹ Kaneko Yoswa mwanace jwa Nuni ŵatumisye acalume ŵaŵili mpela ŵakusonda malo kutyocela ku malo gakolanjidwa Shitimu acitiji, “Jawulani, mkacisonde cilambo ca Kenani, kusyesyene msinda wa Yeliko.” Piŵayice ku msindako, ŵajile kwika ni kugona cilo cosope m'nyumba ja jwamkongwe jwacigwagwa lina lyakwe Lahabu.

² Mwenye jwa ku Yeliko ŵapikene kuti Aisalaeli ŵane ŵaliji ali ayice cele ciloco kukusonda cilamboco.

³ Myoyo mwenye jwa ku Yeliko ŵatumisye maloŵe kwa Lahabu kuti, “Myice nawo mwacitema acalume ŵayice kumangwenu ni kwinjila m'nyumba mwenuwo pakuŵa ayicile kusonda cilamboci.”

⁴ Nambo jwamkongwejo ŵaliji ali ŵajigele acalume ŵaŵiliwo ni kwasisa nipo ŵajanjile kuti, “Acalume ŵane ŵayice ku nyumba kwangu, nambo ngingukumanyilila kuŵatyocele.

⁵ Ŵatyosile pilyakapilaga lyuŵa mkinawugale cipata ca msinda. Ngininjasa ndaŵi kulondesya ya kuŵajawulaga, nambo naga akwanguya, takombolece kwakamula.”

⁶ Pandaŵiji Lahabu ŵaliji ali ŵakwesisye mwinani mu msakasa ŵakusonda ŵaŵili ŵala ni kwasisa pasi pa mapesi ga fulakisi giŵagaŵisile mwelemo.

⁷ Ndumetume sya mwenye syatyosile mu msindamo, nipo cipataco ŵaciwugele. Ŵapite mcalolesya Aisalaeli ŵakusondawo mpaka ku malo gawukombokanya msewu Lusulo lwa Yolodani.

⁸ Ŵakusonda ŵala mkinagone, jwamkongwe jula ŵayicilile ku msakasa kula,

⁹ ni ŵasalile jemanjajo kuti, “Ngumanyilila kuti AMBUJE* ŵapele jemanja cilamboci. Mcilambo muno jwalijose akwajogopa jemanja.

¹⁰ Uwe twapikene muŵajumucisye AMBUJE Nyasa Jecejewu, jemanjaji piŵatyokaga ku cilambo ca Iguputo. Tupikene soni yimwatesile jemanja pakwawulaga Sihoni ni Ogi, ayimwene ŵaŵili ŵa Aamoli kungopoko lyuŵa kwa Lusulo lwa Yolodani.

¹¹ Twajogwepe pitwagambile kupikana yeleyi; pangali jwalijose jwampaka alimbe mtima naga jemanja ali papopo. AMBUJE Mlungu jwenu ali Mlungu jwa kwinani ni pasi pano.

¹² Sambano alumbile kwa une mu lina lya AMBUJE kuti jemanja tacilikulupusya liŵasa lyangu mpela munakulupucisye jemanja, soni ambe cimanyisyo cakuti nakulupilile jemanja.

¹³ Alumbile kwa une kuti tacakulupusya baba ŵangu ni mama ŵangu, acalumbu ŵangu, acakuluŵangu ni acapwanga, ni maŵasa gawo gosope! Akasakunda kuti uwe tuwulajidwe!”

¹⁴ Acalumewo ŵatite kwa jwamkongwejo, “Mlungu atuwulaje naga ngatutenda mpela mutukuŵecetelamu! Naga ngimumsalila jwalijose yituŵele tuli mkutendayi, tukutenda cilanga* ni m'mwejo kuti pitatupeje AMBUJE cilamboci, tucimkulupusya m'mwejo.”

¹⁵ Lahabu ŵatamaga m'nyumba jiŵataŵile pepupa lya msindawo, myoyo ŵakopocesye pa windo ni kwatulucisya pasi ŵanduwo ni lukonji.

¹⁶ Ŵasalile kuti, “Ajawule ku matumbi, nimkaŵa kusimangana nawo ŵakwakuya ŵala; nipo akajuŵe kweleko masiku gatatu, mpaka ŵakwakuya ŵala ali awujilile; kaneko panyuma pakwe takakombolece kwawulaga.”

¹⁷ Acalumewo ŵatite kwa jwalakwe, “Uwe tucisunga cilanga cimtuŵendile kuti tucitende.

¹⁸ Ayi ni yakuŵajilwa kuti timyitende. Pitucisumulaga cilambo cenu, timtaŵe lukonji lwecejewu pa windo jimwatutulucisye pasi jila. Timwajinjisye m'nyumba mwenumu baba ni mama ŵenu, acalumbu ŵenu, ni wosope ŵa liŵasa lya baba ŵenu.

¹⁹ Naga jwine jwakwe akukopoka m'nyumbamo kuti akajendejejendeje mu msewu, yitayiwoneyo yili yakwe, uwe ngasitukola nayo masengo; nambo naga jwine jumli najo m'nyumbamo akuwulala, ni tiwuciŵa ulemwa* wetu.

²⁰ Nambo naga mkumsalila jwalijose yituŵele tuli mkutenda uwe, ni ngasitusunga kose cilanga cimtuŵendile kuti tucitende ni m'mwejo.”

²¹ Nipo jwamkongwejo jwajiticisye ni ŵajawisye ŵanduwo. Ali apite, jwalakwe ŵataŵilile lukonji lwecejewu pa windopo.

²² Kaneko ŵanduwo ŵatyosile kuja ku matumbi, kuŵatemi masiku gatatu, mpaka ŵakwakuya ŵala ŵawujile ku Yeliko; pakuŵa ŵakwakuyawo ŵaliji ali alolesisye mwitala mosope mwene nipo nganiŵasimana.

²³ Myoyo ŵakusonda ŵaŵiliwo ŵatulwice m'matumbimo, ni ŵajombwece lusulo, ni kuwujila kwa Yoswa. Ŵamlondecesye yosope yene yiyatendekwe,

²⁴ nipo ŵatite, “Tukusimicisya kuti AMBUJE atupele uwe cilambo cosope cene. Ŵandu wosope ŵene kweleko akutujogopa uwe.”