Yoswa 14 - Chiyawo Bible

Yoswa akugaŵanya upande kungapilo lyuŵa kwa Yolodani

¹ Jakuyicisyaji ni ngani ja muŵagaŵile cilambo ca Kenani kungapilo lyuŵa kwa Lusulo lwa Yolodani kwa ŵandu ŵa ku Isalaeli. Eliyesa jwambopesi, Yoswa mwanace jwa Nuni, ni ŵakulongolela ŵa maŵasa ga mitundu ja Isalaeli ŵacigaŵile cilamboco mwakulandana ni ciŵalanjilo ca ŵanduwo.

² Mpela AMBUJE* ŵamlamwile Mose,* ma upande ga ngosyo msano ni mcece ni hafu ja kungapilo lyuŵa kwa Lusulo lwa Yolodani ŵagagaŵenye mwa kulondola yisango.

^3-4 Mose ŵaliji ali apelece kala cilambo ca kungopoko lyuŵa kwa Yolodani kwa mitundu jine jiŵili ni litika. (Ŵandu ŵa mwiŵasa lya Yosefe ŵagaŵile m'mitundu jiŵili: Manase ni Efelemu). Nambope Mose nginapeleka kambali ka mtepa kwa Alefi. M'malo mwakwe, jemanjajo ŵapocele misinda kuti atamejemo, ni migunda jakulicisya ng'ombe syawo ni yilangwa.

⁵ Ŵandu ŵa ku Isalaeli ŵagaŵene cilambo pakukuya muŵamlamulile AMBUJE, Mose.

Yoswa akupeleka msinda wa Hebuloni kwa Kalebu

⁶ Lisiku line ŵandu ŵane ŵakutyocela ku lukosyo lwa Yuda ŵayice kwa Yoswa ku Giligala. Jumo jwa jemanjajo, Kalebu mwanace jwa Yefune jwa mwiŵasa lya Akenisi, ŵatite kwa jwalakwe kuti, “Mkumanyilila yiŵaŵecete AMBUJE mu Kadeshi Baneya ya m'mwejo ni une kwa Mose mundu jwa Mlungu.

⁷ Une naliji jwa yaka makumi mcece piŵandumisyaga Mose jwakutumicila jwa AMBUJE kutyocela ku Kadeshi Baneya kukucisonda aci cilamboci. Nayicisye maloŵe ga cikulupi kwa Mose.

⁸ Myoyo, ŵandu ŵinalongene nawo ŵajogoyisye ŵandu. Nambo une mwa cikulupi napikanile AMBUJE Mlungu jwangu.

⁹ Ligongo natesile mwakupikanila, Mose ŵambele cilanga* kuti ŵanace ŵangu ni une mwangakayicila tucipocela cilambo cinacijesileco kuti ciŵe cetu.

¹⁰ Nambo sambano, alole. Yipite yaka 45 ciŵecetele AMBUJE kwa Mose. Jeletu jaliji ndaŵi jiŵajendaga Aisalaeli mcipululu, nipo kutandila pele piŵapelece cilangaco, AMBUJE, asunjile une ciŵela jwa umi. Andole une! Ndili jwa yaka 85 sambano

¹¹ nipo ndili ciŵela jwacilimbile lelo mpela munaŵelele piŵandumisyaga Mose. Ndili jwacilimbile mnope kwa mpaka kuputa ngondo kapena cine cilicoseco mpaka sambano.

¹² Sambano, ambe cilambo ca kwitumbi ciŵaŵisile AMBUJE Cilanga ni une pa lyele lisiku litwalondecesye ya une ni ŵakusonda acimjangu. Paja twasalile jemanja kuti mtundu wawukulungwa wakolanjidwa Aanakimu, wakulimbangana mnope ni wawuli kweleko m'misinda ja mapupa gakulimba. Komboleka kuti AMBUJE taciŵa ni une, nipo tinjatoposya, mpela muŵaŵecetele AMBUJE.”

¹³ Yoswa ŵajaliwasisye Kalebu mwanace jwa Yefune nipo ŵampele jwalakwe msinda wa Hebuloni mpela wakwewakwepe.

¹⁴ Kalebu mwanace jwa Yefune jwa mwiŵasa lya Akenisi ŵapikanile AMBUJE, Mlungu jwa Aisalaeli mwa cikulupi cosope, myoyo AMBUJE ŵampele msinda wa Hebuloni. Yisukulu yakwe yili mkutamape kweleko.

¹⁵ Lina lyakuti Hebuloni pandanda wakolanjidwaga kuti msinda wa Alaba. (Alaba ŵaliji msinda wekulungwa kupunda wa Aanakimu). Sambano mwaliji mwana mtendele mcilambo.