Yoswa 13 - Chiyawo Bible

AMBUJE akumlamula Yoswa kuti ajigale cilambo cicasigele

¹ Pandaŵi jelejo ŵaliji ali acekulwipe mnope. AMBUJE* ŵatite kwa jwalakwe, “M'mwe mcekulwipe mnope, nambo cilambo cisigelepe cakuti msumule:

² upande wesope wa Filisitiya ni Geshuli,

³ yalumo soni upande wosope wa Afimu kum'mwela. (Cilambo cakutyocela ku Lusulo lwa Siho, ku malile ga Iguputo, mpaka kumpoto ku malile ga Ekiloni, caŵalanjidwaga ca Kenani; ayimwene ŵa Afilisiti ŵatamaga ku Gasa, Ashidodi, Ashikeloni, Giti, ni Ekiloni).

⁴ Pana soni cilambo ca Akenani, ni Meala (cicaliji ca Asidoni), mpaka ku Afeki, ku malile ga Aamoli;

⁵ cilambo ca Agebala; Lebanoni josope kungopoko lyuŵa, kutyocela ku Baala Gadi, kukuli kum'mwela kwa Litumbi lya Helimoni, mpaka ku Mpata wa Hamati.

⁶ Cele cilambo cakuti mcipundeci cikupwatikanya upande wosope wa Asidoni, ŵakutama ku cilambo ca kwitumbi pasikati pa Matumbi ga Lebanoni ni Misilefoti Mayimu. Une tinjatoposya pakwakoposya ŵele ŵandu wosopeŵa pitiŵaŵandicileje ŵandu ŵa ku Isalaeli. M'mwe mkusosekwa kucigaŵa cilamboco mwa ŵandu ŵa ku Isalaeli, mpela munamlamulile m'mwejo kuti mtende.

⁷ Myoyo sambano, gaŵani aci cilamboci mwa mitundu jine msano ni mcecejo ni litika lya lukosyo lwa Manase, kuti ciŵe cawocawope.”

Gaŵanya kwa upande wa kungopoko lyuŵa kwa Lusulo lwa Yolodani

⁸ Mitundu ja Lubeni ni Gadi ni litika line lya lukosyo lwa Manase ŵaliji ali apocele cilambo ciŵapele jemanjajo Mose,* jwakutumicila jwa AMBUJE; cicaliji mbali ja kungopoko lyuŵa kwa Lusulo lwa Yolodani.

⁹ Upande wawo wajendelecele ku Aloeli (pa ngulugulu pa Ciŵata ca Alinoni) ni msinda wa pasikati pa cele ciŵataco ni kuwanganya cawe cosope kutyocela ku tawuni ja Medeba mpaka ku msinda wa Diboni.

¹⁰ Upande wawo wajendelecele mpaka kungopoko lyuŵa kwa malile ga Aamoni. Upandewo wapwatice soni misinda josope jiŵalamulilaga Mwenye Sihoni, jwa Aamoli, kutyocela ku msinda wa Heshiboni.

¹¹ Upandewo wapwatice soni Giliyadi, yigawo ya Geshuli ni Maaka, litumbi lyosope lya Helimoni, ni Bashani josope mpaka ku Saleka.

¹² Japwatice ucimwene wa Ogi, jwakusigala jwa Lefayimu, juŵalamulile ku Ashitaloti ni Edileyi. Mose ŵaliji ali ŵapundile ŵanduŵa ni kwakoposya.

¹³ Myoyo, Aisalaeli nganiŵatoposya ŵandu ŵa Geshuli ni Maakati; jemanjajo ali mkutamape mu Isalaeli.

¹⁴ Mose nginapeleka cilambo ku lukosyo lwa Lefi. Mpela muŵaŵecetele AMBUJE kwa Mose, jemanjajo ŵaliji ŵamti apoceleje yakwagaŵila ya mbopesi syakutinisya pa malo gakupelecela mbopesi yakupelecedwa kwa AMBUJE Mlungu ŵa Isalaeli mpela cipanje cawo.

Upande uŵapelece Mose ku lukosyo lwa Lubeni

¹⁵ Mose ŵaliji ali apelece kambali ka cilambo kwa maŵasa ga lukosyo lwa Lubeni mpela kawokawope.

¹⁶ Upande wawo wajendelecele mpaka ku Aloeli (pa mbali pa Ciŵata ca Alinoni) ni msinda wa pasikati pa cele ciŵataco ni japwatice cituluka cosope kusyungulila Medeba.

¹⁷ Japwatice Heshiboni ni misinda josope pa citulukapo: Diboni, Bamoti Baala, Beti Baalameyoni,

¹⁸ Yahasi, Kedemoti, Mefati,

¹⁹ Kiliyataimu, Sibima, Seleti Sahala petumbi lya ciŵataco,

²⁰ Beti Piyoli, mwiŵanda mwa Litumbi lya Pisiga, ni Beti Yeshimoti.

²¹ Japwatice misinda josope ja mcituluka ni ucimwene wosope wa mcimwene Sihoni jwa Aamoli, juŵalamulilaga ku Heshiboni. Mose ŵampundile jwalakwejo, yalumo soni ni ayimwene ŵa Midiyani: Efi, Lekemu, Suli, Huli ni Leba. Wosope ŵaŵalamulilaga cilambo m'malo mwa Mwenye Sihoni.

²² Mwa ŵele ŵiŵawulajidwe ni ŵandu ŵa ku Isalaeli ŵaliji Balamu mwanace jwamlume jwa Bewoli.

²³ Yolodani galiji malile ga lukosyo lwa Lubeni kungapilo lyuŵa. Aji jaliji misinda ni misi jiŵapelece ku maŵasa ga lukosyo lwa Lubeni mpela jawojawope.

Upande uŵapelece Mose ku lukosyo lwa Gadi

²⁴ Mose ŵaliji ali apelece soni mbali ja cilamboco kwa maŵasa ga lukosyo lwa Gadi mpela cawocawope.

²⁵ Upande wawo wapwatikenye Yasa ni misinda josope ja Giliyadi, litika lya cilambo ca Aamoni mpaka ku Aloya, jijili kungopoko lyuŵa kwa Laba;

²⁶ cilambo cawo cajendelecele ku Lamati Misipa ni Betonimu, kutyocela ku Heshiboni mpaka ku Mahanaimu mpaka kumalile ga Lodebala.

²⁷ Mciŵata ca Yolodani upande wawo wapwatice Beti Halamu, Beti Nimila, Sukoti, ni Safoni, misi jijasigele ja ucimwene wa Mwenye Sihoni jwa Heshiboni. Malile gawo ga kungapilo lyuŵa galiji Lusulo lwa Yolodani mpaka kumpoto ku Nyasa ja Galileya.

²⁸ Jeleji jaliji misinda ni misi jiŵapelece kwa maŵasa ga lukosyo lwa Gadi mpela gawogawope.

Mbali jiŵapelece Mose kungopoko lyuŵa kwa Manase

²⁹ Mose ŵaliji ali apelece kambali ka cilambo kwa maŵasa ga hafu ga lukosyo lwa Manase mpela kawokawope.

³⁰ Upande wawo wajendelecele ku Mahanaimu ni japwatikenye Bashani josope, ucimwene wosope wa Ogi, mwenye jwa ku Bashani, yalumo soni ni misi 60 ja Yaili ku Bashani.

³¹ Japwatikenye litika lya Giliyadi, nambo soni Ashitaloti ni Edileyi, mulikulungwa mwa misinda ja ucimwene wa Ogi ku Bashani. Gosopega gapelece kwa hafu ja maŵasa gigakopwece kutyocela kwa Makili mwanace jwa Manase.

³² Mwelemu ni muŵagaŵile Mose cilambo ca kungopoko lyuŵa kwa Yeliko ni Yolodani piŵaliji ali mwilambo lya Mowabu.

³³ Nambo Mose nginapeleka malo galigose ku lukosyo lwa Lefi. Jwalakwe ŵasalile jemanjajo kuti cipanje cawo caliji camti ticiŵe mbali jimo ja yakupeleka ya kwa AMBUJE Mlungu jwa Aisalaeli.