Yoswa 11 - Chiyawo Bible

Yoswa akumpunda Mwenye Yabini ni ayimwene ŵane ŵa ku mpoto

¹ Mwenye Yabini jwa ku Hasoli piŵapikene mbili ja kupunda kwa Aisalaeli, ŵatumisye maloŵe kwa Mwenye Yobabu jwa ku Madoni, ku ayimwene ŵa ku Shimuloni ni Akishafu,

² ni kwa ayimwene ku cilambo ca kwitumbi kumpoto, m'Ciŵata ca Yolodani kum'mwela kwa Nyasa ja Galileya, mwiŵanda mwa matumbi, ni mungulugulu mwa nyasa ciŵandika ni Doli.

³ Jwalakwe ŵatumisye soni maloŵe kwa Akenani ku mbali syosope siŵili sya Yolodani, ku Aamoli, Ahiti, Apelesi, ni Ayebusi ku cilambo ca kwitumbi, yalumo mpaka kwa Ahifi ŵiŵatamaga mwiŵanda mwa Litumbi lya Helimoni mcilambo ca Misipa.

⁴ Jemanjajo ŵayice ni asilikali ŵawo wosope, likuga lya ngondo ni acalume ŵajinji mpela muwukuŵela mcenga mungulugulu nyasa. Ŵakwete soni mahaci gejinji ni mageleta.

⁵ Ŵele ayimwene wosopeŵa ŵasongene pamo ni kupanganya cigono ku Lusulo lwa Melomu. Kweleko ŵapwatikenye ŵa ngondo kuti amenyane ni Aisalaeli.

⁶ AMBUJE* ŵatite kwa Yoswa, “Mkasimwajogopa jemanjajo. Malaŵi ndaŵi mpela jinojino tinjiŵa ndili nawuleje wosope ŵa jemanjaji ligongo lya Isalaeli. Panyuma pa ngondojo, timgalemasye mahaci gawo pakugakata mitasi jekulungwa ja ngongolo sya kunyuma kuti tigalepele kwenda ni kugajoca mageleta gawo.”

⁷ Myoyo Yoswa ni acalume ŵakwe wosope ŵatandite jemanjajo mwakusisimucisya pa Lusulo lwa Melomu.

⁸ AMBUJE ŵapundisye Aisalaeli pa jemanjajo; Aisalaeli ŵatandite ni kwatoposya jemanjajo mpaka kumpoto ku Misilefoti Mayimu ni Sidoni, nipo mpaka kungopoko lyuŵa kwa Ciŵata ca Misipa. Ngondo japitilisye mpaka pangali jumo jwa amagongo juŵasigele jwacijumi.

⁹ Yoswa ŵatesile jemanjajo yiŵamlamwile AMBUJE: jwalakwe ŵagatendesye mahaci gawo kuŵa gelemale ni ŵagajocile mageleta gawo.

¹⁰ Kaneko Yoswa ŵawujile panyuma, ŵasumwile msinda wa Hasoli ni kumwulaga mwenye jwakwe. (Pa jele ndaŵijo Hasoli lyaliji likulungwa lya ma ucimwene gosope genego).

¹¹ Jemanjajo ŵamwuleje jwalijose kweleko; pangali jumo juŵasigele cijumi, nipo msindawo ŵawujocice moto.

¹² Yoswa ŵasumwile misinda josopeji pamo ni ayimwene ŵakwe, ni kumwulagaga jwalijose, mpela muŵalamulile Mose,* jwakutumicila jwa AMBUJE.

¹³ Myoyo, Aisalaeli nginajoca uliwose wa misinda jijataŵidwe pakwela pa yagumuka yiyataŵidwe kala, kutyosyapo msinda wa Hasoli basi, uŵawujocile Yoswa.

¹⁴ Ŵandu ŵa ku Isalaeli ŵajigele katundu josope jwene ni yilangwa yakwe kutyocela ku jele misindaji ni kumsunga kuŵa jwawo. Nambo ŵawuleje mundu jwalijose; pangali jumo juŵasigele jwa cijumi.

¹⁵ AMBUJE ŵaliji ali apelece malamusi gawo kwa jwakutumicila jwawo Mose, Mose ŵaliji ali agapelece kwa Yoswa, nipo Yoswa ŵagapikanile. Jwalakwe ŵatesile yosope yene yiŵamlamwile AMBUJE Mose.

Yoswa akusumula cilambo ciŵamsalile AMBUJE

¹⁶ Yoswa ŵasumwile cilambo cosope ca kwitumbi ni kwiŵanda kwakwe, mbali syosope siŵili kumpoto ni kum'mwela, upande wosope wa Gosheni ni cilambo cejumu ca kum'mwela ni Ciŵata ca Yolodani cakwe.

^17-18 Cilamboco cajendelecele kum'mwela kutyocela ku Litumbi lya Halaki ciŵandika ni Edomu, mpaka ku Baala Gadi kumpoto, m'Ciŵata ca Lebanoni kum'mwela kwa Litumbi lya Helimoni. Yoswa ŵaliji pa ngondo ni ayimwene ŵa cele cilamboci kwa ndaŵi jelewu, nambo ŵakamwile wosopewo ni kwawulaga.

¹⁹ Msinda umope uwatesile mtendele ni ŵandu ŵa ku Isalaeli ni wa Gibiyoni, kuŵatamaga ŵane ŵa Ahifi. Ŵane wosope ŵapundile ku ngondo.

²⁰ AMBUJE ŵatendesye kumula mitima kuti amenyane ni Aisalaeli, kuti jemanjajo ajonasice mnope nipo wosope awulajidwe pangali canasa. Amu ni mwele Mlungu muŵamlamulile Mose.

²¹ Pa jele ndaŵiji, Yoswa ŵapite kukuwujonanga mtundu wa ŵandu ŵalewulewu ŵakolanjidwa Aanakimu ŵiŵatamaga ku cilambo ca kwitumbi ku Hebuloni, Dibili, Anabu, ni mcilambo cosope ca kwitumbi ca Yuda ni Isalaeli. Yoswa ŵamasile kwajonanga jemanjajo ni misinda jawo.

²² Pangali jumo jwa ŵandu ŵa mtundu wa Anakimuwo juŵasigele mcilambo ca Isalaeli; ŵapanandipe, ŵasigele ku Gasa, Gati, ni ku Ashidodi.

²³ Yoswa ŵasumwile cilambo cosope, mpela muŵamlamulile AMBUJE, Mose. Yoswa ŵacipelece kwa Aisalaeli kuŵa cawocawope nipo ŵacigaŵenye m'maupande, upande umo ku lukosyo lululose. Pakumalicisya pakwe mwaliji mwana mtendele mcilambomo.