Yoswa 1 - Chiyawo Bible

Mlungu akumlamula Yoswa kuti acipunde cilambo ca Kenani pa ngondo

¹ Mose* jwakutumicila jwa AMBUJE* ŵawile, myoyo AMBUJE ŵaŵecete ni Yoswa mwanace jwa Nuni, juŵaliji mkamusi jwa Mose. AMBUJE ŵaŵecete kwa Yoswa kuti,

² “Mose jwakutumicila jwangu awile, sambano m'mwejo mliŵicile cilepe, ni ŵandu wosope ŵa ku Isalaeli, ni mjomboce Lusulo lwa Yolodanilu, kuti mjinjile mcilambo cingucipeleka kwa jemanjaji.

³ Malo galigose gatiluliŵate lusajo lwenu nagapelece kwa jemanja, mpela munamsalilile Mose mu cilanga.*

⁴ Malile genu tigacityocela ku cipululu cakum'mwela mpaka ku matumbi ga Lebanoni kumpoto, kutyocela ku lusulo lwalukulungwa lwa Yufuleti kungopoko lyuŵa, kupitila ku cilambo ca Ahiti, mpaka ku Nyasa ja Mediteleniyani kungapilo lyuŵa.

⁵ Pangali jutacimpunda m'mwejo pimli cijumi. Une tinjiŵa ni m'mwejo mpela munaŵelele ni Mose. Tinjiŵa ni m'mwejo masiku gosope ngasinimleka.

⁶ Mŵe ŵamacili ni ŵakulimba mtima, pakuti timciŵa jwakwalongolela aŵa ŵanduŵa pitacijinjilaga mcilambo cinatesile cilanga kwa acinangolo ŵawo kuti tinacipelece kwa jemanjaji.

⁷ Mgambe kuŵa ŵamacili ni ŵakulimba mtima, mlolecesye kuti mpikanile yosope yene yigakumjiganya Malamusi giŵamlamwile Mose jwakutumicila jwangu. Mkasimgaleka pakugalawucila ku mkono wamlyo kapena wa mciji nipo timcipunda kulikose kutimcijawulaga.

⁸ Msimicisyeje kuti buku ja Malamusi jikuŵalanjidwa ndaŵi syosope syakupopela ŵandu. Mjiganicisyeje musi ni cilo, nipo mlolecesyeje kuti mkupikanila yosope yene yilembedwe mwelemo. Myoyo timcisicila ni kupunda kwakwe.

⁹ Kumbucilani kuti nimlamwile m'mwejo kuti mŵe ŵamacili ni ŵakulimba mtima! Mkajogopa kapena kwasa mtima, pakuŵa une, AMBUJE Mlungu jwenu, ndili ni m'mwejo kulikose kutimjawuleje.”

Yoswa akupeleka ukumu kwa ŵandu

¹⁰ Myoyo Yoswa ŵalamwile acimlongola kuti,

¹¹ ajawule ku cigono nipo akasalile ŵandu kuti, “Alinganye cile yakulya, ligongo mu ndaŵi jakwanila masiku gatatu tajomboce Lusulo lwa Yolodani kuja kukwinjila cilambo citacipelece AMBUJE Mlungu jwenu kwa jemanja.”

¹² Yoswa ŵatite kwa mitundu ja Lubeni ni Gadi ni kwa hafu ja lukosyo lwa Manase kuti,

¹³ “Mkumbucile maloŵe giŵamsalile Mose jwakutumicila jwa AMBUJE kuti AMBUJE Mlungu jwenu tacimpa jemanja cele cilamboci kumbali ja kungopoko lyuŵa kwa Yolodani kuti ciŵe ca jemanja.

¹⁴ Aciŵamkwenu, ŵanace ŵenu, ni yilangwa yenu tiyicitamaga apano, nambo asilikali ŵenu, ali ajigele yida ya ngondo, tacijomboka kuja kwa Aisalaeli acimjawo kukwakamusya,

¹⁵ mpaka ali ajinjile mcilambo ca kungapilo lyuŵa kwa Lusulo lwa Yolodani ciŵampele AMBUJE Mlungu jwenu. Pitacipeleka malo ku ngosyo syosope sya ku Isalaeli, ni taciwujila ni kutamilicika apano, mcilambo cawo kungopoko lyuŵa kwa Yolodani, ciŵapelece Mose jwakutumicila jwa AMBUJE kwa jemanja.”

¹⁶ Jemanjajo ŵamjanjile Yoswa kuti, “Uwe tucitenda yosope yene yatusalile soni tucijawula kulikose kutacitutuma.

¹⁷ Uwe tucapikanila wawojo, mpela mutwampikanilaga Mose, nipo AMBUJE Mlungu jwawo aŵe ni wawojo mpela muŵaŵelele ni Mose!

¹⁸ Jwalijose jutaciwusya ya ulamusi wawo kapena kunyosya line mwa lilamusi lyawo taciwulajidwa. Aŵe ŵamacili ni ŵakulimba mtima!”