Yona 4 - Chiyawo Bible

Kupya mtima kwa Yona ni canasa ca Mlungu

¹ Ligongo lya yeleyi, Yona nginasangalala, ni ŵatumbile.

² Myoyo ŵapopesile kwa Mlungu acitiji kuti, “AMBUJE ayitu ni yinjogwepeje pa ndaŵi jinaliji kumangwetu. Ali ni ligongo lyakwe nalinjile kutilila ku Talishishi. Namanyilile kuti ŵalakwe ali Mlungu jwambone mtima ni jwa cinonyelo, cangacenga, soni jwakusacenga nganisyo ni kungapeleka cilango.

³ Myoyo ŵalakwe AMBUJE, conde, agambe kumbulaga, kuli cenene kuti ngambe kuwa kulekangana ni kuti mbe cijumi.”

⁴ AMBUJE ŵawusisye kuti, “Ana mtesile cenene pakutumbila camti myiyi?”

⁵ Yona ŵakopwece mu msindamo ni kutama pasi cakungopoko lyuŵa kwa msinda. Kweleko ŵalitaŵile cisakasa ni kutama mwelemo mu mbwilili, kwembecela kuti alole yitiyitendecekwe ku msindako.

⁶ Sambano AMBUJE ŵamelesye citela ca mbalika kuti cape Yona mbwilili ni kutyosya yisawusyo yakwe. Yona ŵasengwile mnope ligongo lya citela ca mbalikaco.

⁷ Nambo kundaŵi kwakwe kumasikusiku, Mlungu ŵatumisye nyongolosi kuti jikalye citela ca mbalikaco, ni canyasile.

⁸ Lyuŵa pilyakopwece, AMBUJE ŵajitandisye mbungo jamtukuta kuti jipuje kutyocela kungopoko lyuŵa. Lyuŵa lyamjocile Yona pa mtwe mpaka ŵalembwice. Myoyo ŵamŵendile Mlungu kuti jwalakwejo bola agambe kuwa, ŵatite kuti, “Kuli cenene bola ngambe kuwa kulekangana ni kuti mbe cijumi.”

⁹ Nambo Mlungu ŵamwusisye kuti, “Ana mtesile cenene kutumbila ligongo lya citela ca mbalikaci?” Jwalakwejo jwatite kuti, “Elo, ndesile cenene kutumbila. Kutumbila kwakwe kuli kwakuwa nako.”

¹⁰ AMBUJE ŵaŵecete ni une acitiji kuti, “Ana m'mwe mkucitendela canasa citela ca mbalikaci cele canganicikamula masengo, m'mwejo ngaŵaga ni umwacipandile ni kucikusya. Citela celeci cakusile pa cilo cimo, soni cawile pa lisiku limo.

¹¹ Nambi une, ana ngangwenela kuwupikanila canasa msinda wekulungwa wa Ninefe? Mwemulatu mwana ŵandu ŵakupunda 120,000 ŵangalemwa, nambo soni mwana yilangwa yejinji.”