Yona 3 - Chiyawo Bible

Yona akuja ku Ninefe

¹ AMBUJE ŵaŵecete ni Yona kaŵili ni kumsalila kuti,

² “Mnyakuce ni mjawule ku Ninefe, msinda wekulungwa ula ni mkalalicile utenga utinimsalile une.”

³ Yona ŵanyakwice, ni ŵajile ku Ninefeko, pakukuya maloŵe giŵaŵecete AMBUJE. Msindawo waliji wekulungwa mnope, mwakuti mundu ŵajigalaga masiku gatatu kuti awujende.

⁴ Yona ŵajinjile mu msindamo ni kwenda ulendo wa lisiku limpepe. Myoyo ŵatandite kulalicila acitiji kuti, “Pitigamale masiku makumi mcece, msinda wa Ninefe tiwujonasice!”

⁵ Ŵandu ŵa ku Ninefe ŵamkulupilile Mlungu. Ŵajenesye kuti jwalijose jwamkulungwa kapena jwamnandi, alijime kulya ni awale cisaka.

⁶ Mwenye wa ku Ninefe piŵapikene yeleyo, watulwice pa mpando wakwe wa ucimwene ni kuwula mkanjo ni kuwala cisaka ni kuja kutama nawo pa citutu.

⁷ Myoyo mwenyewo ŵajenesye kupitila ku Ninefe kuti, “Ali lili lilamusi lyakutyocela kwa mwenye ni nduna syakwe: ‘Mundu jwalijose akalya cakulya cilicose, nombe nayo yilangwa yekulungwa ni ya ŵana yikalya cilicose. Yikalya kandu, atamose mesi yikamwa.

⁸ Ŵandu wosope awale yisaka nombe nayo yinyama ayiwece yisaka. Ŵanduwo agumilileje kwa Mlungu ni macili gawo gosope. Jwalijose alece ndamo syakwe syakusakala ni yitendo yakwe ya ngalwe.

⁹ Ana mkumanyilila cici, mwine Mlungu komboleka kutukululucila, ni kuleka kututumbilila, ngatujonanga uwe.’ ”

¹⁰ Mlungu ŵayiweni yiŵatesile ŵanduwo ni mwele muŵalecele ndamo syawo syakusakala. Myoyo ŵakululwice, mwakuti nganiŵapa soni cilango jemanjajo cele ciŵatite kuti tacapa.