Yona 2 - Chiyawo Bible

Lipopelo lya Yona

¹ Pandaŵi jiŵaliji Yona mlutumbo mwa somba mula, ŵapopesile kwa Mlungu acitiji kuti:

² “AMBUJE pa ndaŵi jinaliji pa yisawusyo napopesile kwa ŵalakwe nipo ŵalakwe ŵanjanjile. Pandaŵi jinaliji mcilambo ca ŵawe nalilile kwa ŵalakwe kuti angamusye mwakuti ŵalakwe ŵapikene lipopelo lyangu.

³ Ŵalakwe ŵambonyisye m'nyasa jakusokoka, mkati musyesyene mwa nyasa, nipo matumbela ga m'nyasamo gasyungulile une.

⁴ Naganisyaga kuti tanjasile kwakutalikangana ni ŵalakwe. Ana tinjijilola soni uli Nyumba jawo jeswela?

⁵ Mesi gandecesye mu lukosi, nyasa jakusokoka jasyungulile. Mwakuti manyasi ga m'nyasa gasyenjile mu mtwemu.

⁶ Napite kusi kusyesyene, mungulugulu mwa matumbi, ku cilambo kwele mipilingiso jambugalile mpaka kalakala. Nambo ŵalakwe AMBUJE, Mlungu jwangu, ŵangopwesye ku malembeko ndili cijumi.

⁷ Pinaweni kuti une kwaliji kuwa, nakumbucile ŵalakwe AMBUJE, lipopelo lyangu lyayice kwa ŵalakwe m'Nyumba jawo jeswela mnope.

⁸ Ŵandu ŵakulambila milungu ja unami akusajasa cikulupi cawo.

⁹ Nambo une tinjipeleka mbopesi kwa ŵalakwe ni maloŵe gakutogolela, yinatesile cilanga* kwa ŵalakwe tinjiyitenda nditu. Cikulupusyo cikusatyocela kwa ŵalakwe.”

¹⁰ Pelepo AMBUJE ŵajilamwile somba jila kuti jimlukulile Yona pamkuli.