Yona 1 - Chiyawo Bible

Yona nganiŵapikanila AMBUJE

¹ Lisiku line AMBUJE ŵapelece utenga kwa Yona mwanace jwa Amitayi.

² Mjawule ku msinda wekulungwa wa Ninefe likulungwa lya Asiliya kukwasalila ŵandu kuti, AMBUJE akuweni kusakala mitima kwa ŵanduwo.

³ Nambo Yona pakusaka kwatila AMBUJE, ŵanyakwice kwawulaga ku msinda wa Yopa, kwele kuŵacisimene combo cakuja ku Talishishi. Jwalakwejo jwasumile tikiti ni kwinjila mcombomo kuti nombe najo ajawule ku Talishishi, ni cakulinga cakuti ŵatile AMBUJE.

⁴ Nambo AMBUJE ŵatandisye mbungo jamacili pa nyasapo, mwakuti jatandite kuŵindukuka mnope mtande wa mbungo jamacili, mwakuti combo casigele panandi konasika.

⁵ Ŵandu ŵakwenda pa nyasa mkuli welewuwo ŵatesile woga, mwakuti jwalijose jwalililaga kwa Mlungu jwakwe. Myoyo ŵatandite kuponya katundu m'nyasa kuti comboco cipepuce. Pandaŵi jelejo Yona ŵaliji ali atulucile mkati musyesyene mwa combo, ali mlugono lwa kuwa nalo.

⁶ Myoyo jwakwendesya combo ŵayice kwa Yona jula ni kumwusya kuti, “Ana m'mwe mkutenda cici? M'mwe mpaka mgone camti myiyi? Mjimuce, ni mŵilanje kwa Mlungu jwenu mwine tatukamusye kuti tukamilwa.”

⁷ Ŵandu ŵakwenda pa nyasa mkuli welewu ŵala ŵatandite kusalilana acitiji kuti, “Kwende tulondole cisango kuti tumpate jwayice ni likungu lyamti myiyili.” Ŵalondwele cisangoco mwakuti cagwilile Yona.

⁸ Myoyo ŵawusisye kuti, “Mtusalile, ana likungu lyeleli litugwilile ligongo lya ŵani? Ana mkusakamula masengoci? Nambi mkutyocela kwapi? Ana kumangwenu ni kwapi? Ana kutyocela ku mtundu wapi?”

⁹ Jwalakwejo jwajanjile kuti, “Une ndili Mhebeli, ngusinalambila AMBUJE, Mlungu jwa Kwinani, juŵapanganyisye nyasa ni mkuli.”

¹⁰ Ŵandu ŵakwenda pa nyasa mkuli welewu ŵala ŵatesile woga mnope, ni ŵamwusiye Yonajo kuti, “Ana mtesile cici?” Jemanjajo ŵaliji ali ayimanyi kala kuti Yonajo akwatila AMBUJE pakuti jwalakwejo ŵaliji ali ŵasalile kala jemanjajo.

¹¹ Mbungo jamacili jila jaliji mkupitilisya, myoyo ŵamwusiye Yonajo kuti, “Ana tumtende cici kuti nyasa jiŵe bata?”

¹² Yona ŵasalile jemanjajo kuti, “Cambone mgambe kumbonya m'nyasamu, pitimtende myoyo nyasa tijiŵe bata. Ngumanyilila kuti une ni jundili jwakulemwa, ali ni ligongo lyakwe mbungo jamaciliji jikusawusya mwamti myiyi.”

¹³ Ŵandu ŵakwenda pa nyasa mkuli welewu ŵala ŵalinjilile kupalasa combo cila kuti cikakocele pamkuli, nambo ŵalepele, pakuti matumbela gatupile mnope.

¹⁴ Myoyo ŵapopesile kwa AMBUJE acitiji kuti, “AMBUJE akakunda kuti uwe tumilwe ligongo lya umi wa mundu aju. Akatujimba magambo ligongo lyakuwulaga mundu jwangalemwa. Yosopeyi yitendekwe ligongo lya lisosa lya ŵalakwe AMBUJE.”

¹⁵ Piŵaŵecete myoyo ŵamkamwile Yona ni kumponya m'nyasa. Papopo nyasajo jatesile bata.

¹⁶ Yeleyi yatendekasisye ŵandu ŵakwenda pa nyasa mkuli welewu ŵala kuti atende woga mwakuti ŵapelece mbopesi kwa AMBUJE ni kutenda cilanga* cakuti tacatumicila AMBUJE.

¹⁷ AMBUJE ŵatumile somba jekulungwa kuti jamile Yona. Mwakuti Yonajo ŵatemi mlutumbo mwa sombajo masiku gatatu, cilo ni musi.