Yohana 8 - Chiyawo Bible

Ŵamkamwile jwamkongwe ali mkutenda cikululu

¹ Yesu* ŵajawile Kwitumbi lya Olifi.*

² Kundaŵindaŵipe ŵawujile soni ku Nyumba ja AMBUJE kula. Ŵandu wosope ŵasongene ni kumsyungulila Yesu, ni jwalakwe ŵatemi pasi ni kutanda kwajiganya.

³ Aciŵalimu ŵagopolela Malamusi ni Afalisi* ŵayice ni jwamkongwe juŵamkamwile ali mkutenda cikululu, ni ŵamjimice pameso pa ŵandu wosope ŵene ŵala.

⁴ Acimsalilaga Yesu kuti, “Mwalimu, aju jwamkongweju amkamwile ali mkutenda cikululu.

⁵ M'malamusi getu, Mose* ŵalamwile kuti jwamkongwe jwamti myoyojo akuŵajilwa kuwulajidwa pakumponya maganga. Wawojo akuti uli pa yeleyi?”

⁶ Jemanjaji ŵaŵecete yeleyi pakusosa kumtega Yesu, kuti amjimbe magambo. Nambo jwalakwe ŵajineme ni ŵalembile pasi ni cala cakwe.

⁷ Ali cimile papopo ni kumwusyaga Yesu yiwusyo, jwalakwe ŵajinamukwice ni ŵatite kwa jemanjajo, “Jwalijose jwa jemanja jumkinatendeje ulemwa* atande kumponya maganga jwamkongwejo.”

⁸ Myoyo ŵajineme soni kaŵili ni ŵalembile pasi.

⁹ Piŵapikene yeleyi, jemanjajo ŵatyosile, jumojumo kutandila ŵiŵaliji acakulungwawo. Yesu ŵamlesile jika, pamo ni jwamkongwe jula ali agambile kwima palapala piŵaliji pala.

¹⁰ Kaneko Yesu ŵajinamukwice ni ŵamwusisye jwamkongwejo kuti, “Ana ali kwapi ŵamjimbileje magambo ŵala? Pangali jwalijose jwasigele jwakuti amgomece m'mwejo kuti mkuŵajilwa kuwa?”

¹¹ “Pangali atamose jumo jwasigele jwakunjimba magambo bwana.” Yesu ŵamsalile kuti, “Myoyo, ni une jwakwe soni ngangumjimba magambo. Jawulagani, nambo mkaja kutenda ulemwa soni.”

Yesu ali lilanguka lya ŵandu ŵa cilambo capasi

¹² Myoyo Yesu ŵaŵecete kwa Afalisiwo soni. Jwalakwe ŵatite, “Une ndili lilanguka lya ŵandu ŵa cilambo capasi. Jwalijose jutaŵe jwakulijiganya jwangu tacikola lilanguka lyakupeleka umi ni ngasajenda soni mcipi.”

¹³ Afalisi ŵatite kwa jwalakwe, “Ana sambano uli mkulitendela mwasyenepe umboni, yimkuŵecetayi nganiyiŵa yakuwona.”

¹⁴ Yesu ŵajanjile, “Iyayi, atamose ngulitendela namsyene umboni, yinguŵeceta une yili yakuwona, ligongo ngukumanyilila kunatyocele ni kungwawula.

¹⁵ Jemanja akulamula mpela mwakusalamulila ŵandu masiku gosope acimjawo, unetu ngangumlamula mundu jwalijose.

¹⁶ Nambo yikaŵe kuti ngulamula, kulamula kwangu kukaliji kwacilungamo, pakuŵa ngangutenda yeleyi pa une jikape, Atati ŵangu ŵiŵandumisye une, ali pampepe ni une mu yitendo yangu.

¹⁷ M'malamusi ga jemanja mwana aga maloŵega gakuti, naga umboni ŵa ŵandu ŵaŵili ukukamulana cimo, ni kuti yakuŵecetayo yili yakuwona.

¹⁸ Une ngutenda umboni wa une namsyene, ni Atati ŵiŵandumisye une nombe nawo akundendela soni umboni.”

¹⁹ Jemanjajo ŵamwusisye kuti, “Atati ŵenuwo ali kwapi?” Yesu ŵajanjile kuti, “Jemanjatu ngamkumanyilila une kusyesyene atamose Atati ŵangu, pakuŵa mkamanyilile une, mkamanyilile Atati ŵangu soni.”

²⁰ Yesu ŵaŵecete yele yindu yosopeyi piŵajiganyaga mu Nyumba ja AMBUJE, mcipinda muŵaŵisile mabokosi gakupelecela mbopesi. Ni pangali juŵamkamwile, ligongo ndaŵi jakwe jaliji mkanijikwane.

Jemanja ngaŵa mkupakombola kwawula kungwawula une

²¹ Yesu ŵasalile jemanjajo soni kuti, “Une ngwawula, jemanja timcindolesya nambo pakuŵapo kuti mkupitilisya kutenda ulemwa timciwa nawo. Jemanja ngaŵa mkupakombola kwawula kungwawula une.”

²² Myoyo acakulungwa ŵa Ayuda* ŵaŵecetaga ni kuwusyanaga acimsyenepe, “Jweleju akuti uwe ngaŵa mkupakombola kwawula kwele kwakwawula jwalakwejo. Ana maloŵega gakugopolela kuti taciliwulaga msyene?”

²³ Yesu ŵajanjile kuti, “Jemanja mli ŵa cilambo capasi cino, nambotu une ngutyocela kwinani. Jemanja akutyocela pa cilambo capasi pano, nambotu une ngangutyocela kose pa cilambo capasi pano.

²⁴ Ni ligongo lyakwe namsalile kuti naga mkupitilisya ni ulemwa wenuwo timciwa. Timciwa ni ulemwa wenuwo naga ngamkukulupilila kuti ‘Une Ndili Jundili.’ ”

²⁵ Ayuda ŵamwusisye kuti, “Ana wawoji ali ŵani?” Yesu ŵajanjile, “Kusala ni kunamsalile jemanja kula kutandila pandanda pene.

²⁶ Une ngwete yindu yakuyiŵeceta yejinji ya jemanja, soni pana yejinji yakumjimba nayo magambo. Nambo jwele juŵandumile une ali jwakuwona, ni ngumsalila jemanja pa cilambo capasi pano, yele peyo yinayipikene kutyocela kwa jwalakwe.”

²⁷ Ŵanduwo nganapikanicisya kuti Yesu ŵaŵecetaga kwa jemanjajo yakwamba Atati ŵakwe ŵakwinani.

²⁸ Myoyo jwalakwe ŵatite kwa jemanjajo, “Pitamkwesye Mwanace jwa Mundu* pa msalaba, ni pitacimanyilila kuti ‘Une Ndili Jundili’, myoyo soni tacimanyilila kuti jwangatenda cindu cilicose mwamacili ga une jikape, nambo kuti ngasaŵecetaga yele peyo yasalile Atati kuti nayiŵecete.

²⁹ Ni kuti jwele juŵandumisye unejo ali yalumo ni une nganandeka jikape, ligongo masiku gosope ngasatendaga yiyikumnonyela jwalakwejo.”

³⁰ Ŵandu ŵajinji ŵiŵampikene Yesu ali mkuŵeceta yele yinduyi ŵakululupilile mwa jwalakwe.

Cakuwona cikusicagopola ŵandu

³¹ Myoyo Yesu ŵaŵecete kwa ŵandu ŵiŵakulupilile mwa jwalakwe ŵala kuti, “Naga mkuyitenda yinajiganyisye une, nditu jemanja mli ŵakulijiganya* ŵangu,

³² timcicimanyilila cakuwona, ni cakuwonaco ticicimgopola jemanja.”

³³ Jemanjajo ŵajanjile kuti, “Uwe tuli yisukulu ya Abulahamu* soni nganituŵeje acikapolo ŵa mundu jwine jwalijose. Nambi wawo akugopolela cici, pakuŵecetaga kuti, ‘Timciŵa ŵagopoka?’ ”

³⁴ Yesu ŵajanjile kuti, “Une ngumsalila jemanja yakuwona: jwalijose jwakutenda ulemwa ali kapolo jwa ulemwawo.

³⁵ Kapolo jwangaŵa nawo mwiŵasa ndaŵi josope, nambo mwanace.

³⁶ Nambo naga mwanacejo akumgopola, jwalakwejo taciŵa mlukosyo.

³⁷ Ngumanyilila kuti mli yisukulu ya Abulahamu, nambope mkusaka kumbulaga ligongo lyakuti ngasimgapocela majiganyo gangu m'mitima mwenu.

³⁸ Une ngusaŵeceta yele yinayiweni kwa Atati ŵangu, nambo jemanja mkusatendaga yiŵamsalile atati ŵenu.”

³⁹ Jemanjajo ŵajanjile kuti, “Atati ŵetu ali Abulahamu.” Nambo Yesu ŵasalile jemanjajo kuti, “Jemanja mkaŵe ŵanace ŵa Abulahamu ŵene, mkatesile yindu yakulandana ni yiŵatesile Abulahamu.

⁴⁰ Cinacitesile une ni cakumsalila jemanja yakuwona yinayipikene kutyocela kwa Mlungu, nambo jemanja mkusosa kumbulaga. Ayi ngaŵa yiŵayitesile Abulahamu!

⁴¹ Jemanja mkutenda yiŵatesile atati ŵenu.” Jemanjajo ŵajanjile, “Mlungu msyene ni ŵali Atatipe ŵitukwete, ni uwe tuli ŵanace wakwe ŵasyesyene.”

⁴² Yesu ŵasalile kuti, “Akaŵe kuti Mlungu ali Atati ŵenu asyesyene, jemanja mkanonyele une, ligongo une nayice akuno kutyocela kwa Mlungu. Nganimbika mwamacili ga une jika namsyene, nambo ŵatesile kundumisya.

⁴³ Ligongo cici jemanja ngakuyipikana yinguŵeceta? Yili myoyo ligongo ngakusaka kuwupikanila utenga wangu?

⁴⁴ Satana* ni jwali atati ŵenu jemanja, ni mkasasosa kutenda yindu yakusasosa kutenda atati ŵenuwo. Kutandila pandanda pasyesyene jwalakwe ŵaliji jwakuwulaga ŵandu ndaŵi syosope soni nganatameje kuŵa ku mbali ja yakuwona, mwangali cakuwona cilicose mwa jwalakwe. Pakuŵeceta ya unami, akwamba kutenda yawukusosa umi wakwe, pakuŵa ali jwa unami ni ali atati ŵa unami wosope.

⁴⁵ Nambo une ngusala yakuwona, ni ligongo lyakwe jemanja ngamkungulupilila une.

⁴⁶ Nduni mwa jemanja jwa mpaka alosye pakulanguka kuti une jwana ulemwa? Naga ngumsalila yakuwona, ligongo cici jemanja ngamkungulupilila?

⁴⁷ Jwele jwali jwakutyocela kwa Mlungu akusapikanilaga maloŵe ga Mlungu. Nambo jemanja ngakutyocela kwa Mlungu, ni ligongo lyakwe akukana kupikanila.”

Yesu ŵapali Abulahamu mkinapagwe

⁴⁸ Ayuda ŵala ŵamwusisye Yesu kuti, “Ana uwe mpela twalemwisye pakuŵeceta kuti wawojo ali Msamaliya,* soni akwete msimu wakusakala?”

⁴⁹ Yesu ŵajanjile kuti, “Une nganingola msimu wakusakala. Une ngwacimbicisya Atati ŵangu, nambo jemanja ngamkunjimbicisya une.

⁵⁰ Unetu ngangulisosela ucimbicimbi namsyene. Nambo pana jwine jwakwe jwakusosa kuti une ngapocele ucimbicimbi. Jwalakwejo ni jwakulamula mwa cilungamo.

⁵¹ Une ngumsalila jemanja yakuwona: jwalijose jwakutenda yinimjiganyisye kuti ayitende ngasawa kose.”

⁵² Jemanjajo ŵamsalile kuti, “Sambano tusimicisye kuti wawo akwete msimu wakusakala! Abulahamu ŵawile, soni ŵakulocesya ŵawile, ni wawojo akuti jwalijose jwakutenda yamjiganyisye kuti ayitende ngasawa kose.

⁵³ Atati ŵetu Abulahamu ŵawile, nambi wawo akuŵeceta camtuli kuti ali ŵakulungwa kwapunda Abulahamu? Ŵakulocesya nombe nawo ŵawile. Ana wawo akulitenda kuti ali ŵani?”

⁵⁴ Yesu ŵajanjile kuti, “Naga yikaŵe kuti ngulicimbicisya namsyene, wele ucimbicimbiwo ukaliji wangali mate. Ŵele ŵakunjimbicisya une ni ŵali Atati ŵangu ŵenewo ŵakwatenda jemanja kuti ali Mlungu ŵawo.

⁵⁵ Jemanja nganiŵamanyilileje Atatiwo, nambo une ngwamanyilila. Nambo ningajile kuti ngangwamanyilila ni ngaliji une jwa unami mpela jemanja. Nambo ngwamanyilila ni ngusimbikanilaga maloŵe gawo.

⁵⁶ Atati ŵenu jemanja, Abulahamu, ŵasengwile kuti akajiweni ndaŵi ja kwika kwangu, myoyo ŵajiwonele cile ni ŵasangalele.”

⁵⁷ Jemanjajo ŵamjanjile kuti, “Wawo nganakwane kose yaka 50 myoyo akuŵeceta camtuli kuti am'weni Abulahamu?”

⁵⁸ Yesu ŵajanjile kuti, “Une ngumsalila jemanja yakuwona kuti, Abulahamu mkinapagwe, une naliji ndili mbali.”

⁵⁹ Myoyo jemanjajo ŵalokotenye maganga kuti amponye, nambo Yesu ŵajuŵile ni kutyoka mu Nyumba ja AMBUJE mula.