Yohana 6 - Chiyawo Bible

Yesu akulisya likuga lyalikulungwa lya ŵandu

¹ Kaneko Yesu* ŵajombwece Nyasa ja Galileya (lina lyakwe line Nyasa ja Tibeliya).

² Likuga lyalikulungwa lya ŵandu lyamkuyisye, ligongo ŵayiweni yimanyisyo yakusimonjesya ni yakwaposya ŵandu ŵiŵaliji mkulwala.

³ Yesu ŵakwesile penani pa litumbi ni ŵatemi pasi ni ŵakulijiganya* ŵakwe.

⁴ Ndaŵi ja Cindimba ca Pasaka* ja Ayuda jaŵandicile.

⁵ Yesu piŵalolite ŵaliweni likuga lyalikulungwa lya ŵandu lili mkwisa kwa jwalakwe, ni ŵamwusisye Filipi kuti, “Ana mpaka tukasume kwapi yakulya yakwanila kwalisya ŵandu wosope ŵa?”

⁶ Yesu ŵaŵecete yeleyi kuti amlinje Filipijo; nambo ŵamanyililaga yakatesile.

⁷ Filipi ŵajanjile kuti, “Naga kuti jwalijose akole cakulya camnono, pakusosekwa mbiya syakupunda masilifa* 200 kuti tusume mikate jakwanila.”

⁸ Jwakulijiganya jwakwe jwine lina lyakwe Andileya,* mpwakwe jwa Simoni* Petulo,* ŵamsalile Yesu kuti,

⁹ “Pana mcanda jwine panopano jwakwete mikate msano ja balele* ni somba siŵilipe. Yeleyi ngiyakwanila ŵandu wosopeŵa.”

¹⁰ Nambo Yesu ŵasalile jemanjajo kuti, “Ŵasalile ŵanduwo kuti atame pasi.” (Pa malopo paliji pana manyasi gejinji.) Myoyo ŵandu wosope ŵene ŵatemi pasi; mwikugamo mwapali mpela acalume ciŵandika 5,000.

¹¹ Yesu ŵajigele mikate jila, ni ŵamtogolele Mlungu, kaneko ŵayipelegenye kwa ŵandu ŵiŵatemi pelepowo. Yesu ŵatesile yalumo soni ni somba sila, ni wosope ŵala ŵagaŵene mpela muŵasoselaga.

¹² Wosope ŵene ŵala piŵajikwite, Yesu ŵasalile ŵakulijiganya ŵakwe ŵala kuti, “Alokotanye makombogo; kwende tukagajasa.”

¹³ Myoyo ŵalokotenye sigasiga syosope syene nipo ŵagumbesye likumi ni siŵili ni makombo ga mikate msano ja balele jiŵalile ŵandu jila.

¹⁴ Pakuciwona cimanyisyo cakusimonjesya ciŵatesile Yesu ŵanduwo ŵatite kuti, “Yakuwona aju ni Jwakulocesya* jula, Malemba gaŵecete ya jwalakwe kuti taciyika mcilambo capasi!”

¹⁵ Apa Yesu ŵamanyilile kuti ŵandu ŵala ŵatiji amjigale ni kumjinjisya ucimwene, myoyo jwalakwe ŵatyosile kwawula soni kwitumbi jikape.

Yesu akwenda pa Nyasa ja Galileya

¹⁶ Pikwaswele, ŵakulijiganya ŵa Yesu ŵapite ku nyasa,

¹⁷ ŵakwesile mwiboti, ni ŵawujile kombokanya nyasa kwinjilila ku Kapelenaumu. Cipi catandite, nambo Yesu ŵaliji mkinayicepe kwa jemanjajo.

¹⁸ Pa jele ndaŵijo mbungo jamacili jaliji mkupuga ni matumbela gatandite.

¹⁹ Ŵakulijiganya ŵala ŵaliji ali apalese liboti makilomita ciŵandika msano kapena msano ni jimo piŵam'weni Yesu ali mkwenda pacanya pa mesi, ni kwikaga ciŵandika ni libotilyo, jemanjajo ŵajogwepe.

²⁰ Yesu ŵasalile kuti, “Akatenda woga, ndili une!”

²¹ Kaneko ŵamkundile kwinjila mwibotimo, ni mwangakaŵa libotilyo lyayice pamkuli.

Ŵandu akumlolesya Yesu

²² Kundaŵi kwakwe likuga lya ŵandu lilyaliji lisi line lya nyasa lyamanyilile kuti lyapali liboti limope basi kweleko. Jemanjajo ŵamanyilile kuti Yesu nganajawula mu lyele libotilyo ni ŵakulijiganya ŵakwe, nambo kuti ŵakulijiganyawo ŵatyosile muli mwangali Yesujo.

²³ Maboti gane gakutyocela ku Tibeliya, gayice kukocesya ku mkuli ciŵandika ni ku malo kulyalile likuga lya ŵandu lila mikate Ambuje ali atogolele kwa Mlungu.

²⁴ Likuga lila pilyayiweni yakuti kwaliji kwangali Yesu kweleko, atamose ŵakulijiganya ŵakwe, lyakwesile mu gele mabotigo ni kwawula ku Kapelenaumu kukumlolesya Yesu.

Yesu ali cakulya cakupeleka umi

²⁵ Ŵandu ŵala piŵamsimene Yesu lisi line lya nyasa, ŵamwusisye kuti, “Mwalimu, ŵayice lisikuci akuno?”

²⁶ Yesu ŵajanjile kuti, “Ngumsalila jemanja yakuwona kuti mkundolesya une ngaŵa ligongo lyakuti mwapikanicisye yimanyisyo yakusimonjesya yangu, nambo ligongo mwalile mikate ni kwikuta.

²⁷ Alimbicileje kuti apate yakulya yakwatendesya ŵandu kuti aŵeje ni umi wa mpaka kalakala ngaŵa kupata yakulya yayikusajonasika. Yeleyi ni yakulya yitacapa jemanja Mwanace jwa Mundu,* ligongo Mlungu, Atati, alosisye kuti amsagwile jwalakwejo.”

²⁸ Myoyo jemanjajo ŵamwusisye kuti, “Ana uwe tukwenela kutenda cici kuti tupanganye masengo gakugasosa Mlungu kuti tugatende?”

²⁹ Yesu ŵajanjile kuti, “Mlungu cakusosa kuti jemanja acitende cili cakuti jemanja mkulupiciceje mwa jwele pejo juŵamtumisyejo.”

³⁰ Jemanjajo ŵamwusisye kuti, “Ana timtende cakusimonjesya camtuli kuti tuciwone ni tumkulupilile? Timtende cici?

³¹ Acinangolo ŵetu ŵalile mana mcipululu, mpela mwalembele m'Malemba kuti, ‘Jwalakwe ŵapele mikate jakutyocela kwinani kuti alye.’ ”

³² Yesu ŵatite kuti, “Ngumsalila jemanja yakuwona kuti, yiŵapele Mose* jemanja nganiyiŵa yakulya yakutyocela kwinani, pakuŵa ali Atati ŵangupe basi ŵakumpaga jemanja yakulya yisyesyene yakutyocela kwinani.

³³ Pakuŵa yakulya yakusapelekaga Mlungu ni jwalakwejo jwakusatulukaga pasi pano kutyocela kwinani ni akusapelekaga umi usyesyene kwa ŵandu ŵa cilambo cosope capasi.”

³⁴ Ŵanduwo ŵamŵendile Yesu kuti, “Ambuje, atupeje uwe yele yakulyayi masiku gosope.”

³⁵ Yesu ŵasalile kuti, “Une ni mkate wakupeleka umi, ŵele ŵakwisa kwa une ngasijakola soni sala, ŵele ŵakukulupilila mwa une ngasijakola soni njota.

³⁶ Nambo nasalile jemanja kuti, atamose ambweni une nambo ngasakulupilila.

³⁷ Jwalijose jwambele une Atati ŵangu taciyika kwa une. Ni jwalijose jwakwisa kwa une ngaŵa kumjasa kusa,

³⁸ ligongo natulwice pasi pano kutyocela kwinani ngaŵa kukutenda yinguyisosa une nambo yakusosa Mlungu juŵandumile une kuti nayitende.

³⁹ Yakusosa Mlungu juŵandumile une ni yakuti ngajasa jwalijose jwa ŵandu wosope ŵele ŵambele une jwalakwejo, nambo ngusosekwa kuti tinajimusye ku ŵawe wosope ŵenewo pa lisiku lyakumalicisya.

⁴⁰ Pakuŵa yakusosa Atati ŵangu ni yakuti, wosope ŵakumanyilila une kuti ndili Mwanace jwa Mlungu ni kungulupilila akole umi wangamala.* Ni tinjajimusya ku ŵawe pa lisiku lyakumalisya.”

⁴¹ Ayuda ŵala ŵatandite kunyinyita ligongo lyakuti Yesu ŵatite kuti, “Une ndili mkate uwatulwice kutyocela kwinani.”

⁴² Myoyo jemanjajo ŵatite kuti, “Ana ajuju ngati Yesu mwanace jwa Yosefe, ngaŵa ni jweleju? Uwe tukwamanyililatu cenenepe babagwe ni mamagwe. Sambano jwalakwe akupakombola camtuli kuŵeceta kuti, ŵatulwice kutyocela kwinani?”

⁴³ Yesu ŵajanjile kuti, “Alece kunyinyita jemanja acimsyenepe.

⁴⁴ Pangali mundu jwampaka apakombole kwisa kwa une nambo akaŵe naga Atati ŵiŵandumilewo akumlongolela kwa une, ni tinjimjimusya pa lisiku lyakumalisya.

⁴⁵ Jumo jwa ŵakulocesya ŵalembile kuti, ‘Mlungu ni jutacajiganya wosope.’ Jwalijose jwakwapikana Atati ni kulijiganya kutyocela kwa ŵelewo akwika kwa une.

⁴⁶ Ayi ngayikugopolela kuti jwalijose ŵaweni Atati iyayi, jwele jwali jwakutyocela kwa Mlungu ni jwele pejo juŵaweni Atati.

⁴⁷ Une ngumsalila jemanja yakuwona kuti, mundu jwakukulupilila mwa une akwete umi wangamala.

⁴⁸ Une ndili mkate wakupeleka umi.

⁴⁹ Acinangolo ŵawo ŵalile mana mcipululu, nambo ŵawile.

⁵⁰ Nambo mkate wakutuluka kutyocela kwinani uli wakuti, jwalijose jwakuwulya ngasawa kose.

⁵¹ Une ndili mkate wa umi uwatulwice kutyocela kwinani. Naga mundu akulya wele mkatewu taciŵa ni umi mpaka kalakala. Mkate wawumi utinjimpa jwalakwe ni cilu cangu, cingucipeleka kwa ŵandu ŵa cilambo cosope capasi kuti akole umi.”

⁵² Myoyo Ayuda ŵatumbile ni kutanda kukangana acimsyenepe. Jemanjajo ŵawusisye kuti, “Jwele munduju mpaka atupe uwe cilu cakwe kuti tulye camtuli?”

⁵³ Yesu ŵasalile kuti, “Une ngumsalila jemanja yakuwona kuti, naga ngakulya cilu ca Mwanace jwa Mundu ni kumwa miasi jakwe, nditu ngasakola umi.

⁵⁴ Ŵele ŵakulya cilu cangu ni kumwa miasi jwangu akwete umi wangamala, ni tinjajimusya ku ŵawe pa lisiku lyakumalicisya.

⁵⁵ Pakuŵa cilu cangu cili cakulya cisyesyene, ni miasi jangu jili cakumwa cisyesyene.

⁵⁶ Ŵele ŵakulya cilu cangu ni kumwa miasi jangu akutama mwa une ni une ngutama mwa jemanjajo.

⁵⁷ Atati ŵa umi ŵandumile une, ni ligongo lya jemanja une soni ndili umi. Yalumo soni jwakundya une taciŵa umi ligongo lya une.

⁵⁸ Myoyo welewu ni mkate uwatulwice kutyocela kwinani, nganiwuŵa mpela mkate uŵalile acinangolo ŵa jemanja. Ŵawile panyuma pakwe, nambo ŵele ŵakulya awu mkatewu taciŵa umi mpaka kalakala.”

⁵⁹ Yesu ŵaŵecete yeleyi piŵajiganyaga m'nyumba jakupopelela m'Kapelenaumu.

Maloŵe gakupeleka umi wangamala

⁶⁰ Ŵakulijiganya ŵakwe ŵajinji ŵayipikene yeleyi ni ŵatite kuti, “Aci cijiganyoci cili cakusawusya mnope kucijiticisya. Ŵani ŵampakana ajiticisye yakuŵeceta Yesuyi?”

⁶¹ Mwangalajila kumsalila, Yesu ŵamanyilile msyenepe kuti ŵakulijiganya ŵala ŵatandite kunyinyilika ya yeleyi, myoyo jwalakwe ŵawusisye jemanjajo kuti, “Ana yeleyi yikumtendekasya jemanja kusosa kwasa cikulupi cenu?

⁶² Nambi uli naga akamwone Mwanace jwa Mundu ali kuwujila ku malo kuŵaliji kala?

⁶³ Msimu wa Mlungu ni ukasiwupelekaga umi, macili ga ŵandu ngaŵa mkutenda cilicose. Maloŵe gimbecete kwa jemanja gakwatendesya kuti akole Msimu wa Mlungu ŵakupeleka umi.

⁶⁴ Nambope ŵane ŵa jemanja ngamkukulupilila.” (Kutandila pandanda pene Yesu ŵamanyilile ŵele ŵiŵaliji ŵamti ngasakulupilila soni jwele jutacimpeleka jwalakwejo.)

⁶⁵ Yesu ŵapitilisye kuti, “Ali ni ligongo lyakwe namsalile jemanja kuti, pangali jwalijose jwampaka apakombole kwika kwa une akaŵe Atati amtendesye jwalakwejo kuti apakombole kutenda myoyo.”

⁶⁶ Ŵakulijiganya ŵajinji ŵa Yesu ŵawujile munyuma ligongo lya yeleyi soni nganajenda najo kose.

⁶⁷ Myoyo jwalakwe ŵawusisye ŵakulijiganya likumi ni ŵali ŵala kuti, “Nambi jemanja akusosa nombe nawo kutyoka?”

⁶⁸ Simoni Petulo ŵamjanjile kuti, “Ambuje, mpaka tujawule kwa ŵani? Wawojo akwete maloŵe gakupeleka umi wangamala.

⁶⁹ Ni sambano uwe tukulupilile ni kumanyilila mwakusimicisya kuti ŵalakwe ali ŵaswela ŵiŵayice kutyocela kwa Mlungu.”

⁷⁰ Yesu ŵajanjile kuti, “Namsagwile jemanja ŵakwana likumi ni ŵaŵili, ngaŵa myoyo? Nambo jumo jwa jemanja ali jwakusakala.”

⁷¹ Jemanjaji ŵamgambaga Yudasi, mwanace jwa Simoni Isikaliyoti, pakuti atamose kuti jwalakwejo jwaliji jumo jwa ŵakulijiganya likumi ni ŵaŵili, jwelejo ni juŵaliji jwakumpeleka Yesu kwa amagongo ŵakwe.