Yohana 5 - Chiyawo Bible

Yesu akuposya mundu jwamlemale

¹ Panyuma pa yeleyi, Yesu* ŵajawile ku cindimba ca Pasaka* ca Ayuda ku Yelusalemu.

² Mu Yelusalemu mwana litamanda lina lyakwe Betisata Mcihebeli, pakuŵandikana ni Cipata ca Ngondolo, lyana tulindo msano pambali pakwe.

³ Likuga lyalikulungwa lya ŵandu ŵakulwala ŵagonaga mtulindomo, ŵangalola, ŵalemale, ni ŵawe yiŵalo.

⁵ Pelepo ŵapali mundu jwamlume juŵalwalaga kwa yaka 38.

⁶ Yesu ŵam'weni ali cigonele pa malopo, ni ŵamanyilile kuti mundujo ŵalwasile kwa ndaŵi jelewu, ni ŵamwusisye kuti, “Ana mkusosa kuŵa cenene?”

⁷ Jwamlume jwakulwala jula ŵajanjile kuti, “Bwana, nganingola jwalijose akuno jwakunjigalila mwitamanda pati mesi agatenganyisye, pingulinjilila kuti njinjile, jwine akusaŵa ajinjile kalape mwelemo.”

⁸ Yesu ŵamsalile kuti, “Mjimuce, mnyakule ugono wenu, ni mjende.”

⁹ Ndaŵi jijojo mundu jula ŵaposile, ŵanyakwile ugono wakwe ni ŵatandite kwenda. Ayi ŵayitesile pa lisiku lyakupumula* lya Ayuda,

¹⁰ ni acakulungwa ŵa Ciyuda ŵamsalile mundu juŵamposisye jula kuti, “Lelo ni lisiku lyakupumula lyetu, nipo malamusi getu ngagakumkunda kuti m'mwejo mnyakule ugono wenu.”

¹¹ Jwalakwe ŵajanjile kuti, “Mundu jwambosisye ni jwasalile une kuti nyakule ugono wangu njawuleje.”

¹² Jemanjajo ŵamwusisye kuti, “Jwele mundujo nduni juŵamsalile m'mwejo kuti mtende yeleyi?”

¹³ Nambo mundu juŵamposisyejo nganamanyilila kuti Yesu ŵaliji ŵani, pakuŵa paliji pana likuga lya ŵandu, soni Yesu ŵaliji ali apite.

¹⁴ Kaneko, Yesu ŵamsimene mundu jula m'Nyumba ja AMBUJE ni ŵamsalile kuti, “Mpikane, m'mwejo mli cenene sambano, ni mkasimtenda soni ulemwa* nimkaŵa kumwonecela cindu cakogoya.”

¹⁵ Kaneko mundujo ŵatyosile ni ŵasalile acakulungwa ŵa Ciyuda ŵala kuti Yesu ni juŵamposisye.

¹⁶ Ni ŵatandite kumsawusya Yesu, ligongo ŵapanganyisye masengo gakuposya lisiku lyakupumula lya Ayuda.

¹⁷ Yesu ŵajanjile jemanjajo kuti, “Atati ŵangu akupanganya masengo masiku gosope, ni une soni ngwenela kupanganya masengo.”

¹⁸ Ligongo lyakuti Yesu ŵaŵecete yeleyi, acakulungwa ŵa Ciyuda ŵapundile kusosa kumwulaga, ngaŵa ligongo lyakasa Lilamusi lya lisiku lyakupumulape, nambo soni ŵatite kuti Mlungu ŵaliji Atati ŵakwe ni mulyele litalali ŵalilandenye jwalakwe msyene ni Mlungu.

Mlungu akupeleka macili kwa Mwanagwe

¹⁹ Pelepo Yesu ŵajanjile jemanjajo kuti, “Ngumsalila jemanja yakuwona kuti, Mwanace ngaŵa mkupakombola kutenda cilicose pajika, akusapanganya yelepeyo yakusayiwona ali mkuyitenda Atatigwe. Yakusayitenda Atati, nombe najo Mwanace akusayitendaga myoyo.

²⁰ Pakuŵa Atati akusamnonyelaga Mwanace ni akusamlosyaga yosope yakuyipanganya jwalakwe. Jwalakwe tacimlosya Mwanagwe atamose yindu yakuti ayipanganye kupunda yeleyi, ni jemanja wosope timcisimonga.

²¹ Mpela mwakwimucisya Atati ŵandu ŵawe ni kwapa umi, yalumo soni Mwanace akupeleka umi kwa ŵele ŵasosile kwapa.

²² Atamose kulamula kwene, Atati ŵangalamula jwalijose. Ampele mwanagwawo macili gosope gakulamula,

²³ myoyo ŵandu wosope tacimpa ucimbicimbi mwanagwawojo mpela mwakwapela ucimbicimbi Atati. Jwalijose jwangakumcimbicisya Mwanacejo ngakwacimbicisya soni Atati ŵiŵamtumisye Mwanacejo.

²⁴ “Une ngwasalila jemanja yakuwona kuti: ŵele ŵakugapikana maloŵe gangu ni kwakulupilila ŵele ŵiŵandumile une akwete umi wangamala.* Ngasiŵalamula, nambo kuti atyosile ku ciwa kwawula ku umi wangamala.

²⁵ Une ngumsalila jemanja yakuwona kuti: ndaŵi jili mkwisa soni jiyice kala jakuti ŵandu ŵele ŵakuŵa mpela ŵawile tacigapikana maloŵe ga Mwanace jwa Mlungu, ni kuti ŵele ŵitacigapikanawo tacikulupilila ni tacikola umi.

²⁶ Mpela muyiŵelele kuti Atati ŵangu ni ŵakusiŵapaga ŵandu umi myoyo soni amtesile Mwanagwawo kuŵa jwakupeleka umi.

²⁷ Ni ampele Mwanacejo macili gakulamula, ligongo ali Mwanace jwa Mundu.*

²⁸ Akasimonga pa yeleyi; pakuŵa jili mkwisa ndaŵi jakuti ŵawile wosope tacigapikana maloŵe gakwe

²⁹ ni tacikopoka m'malembe mwawo: ŵele ŵatesile cenene tacijimuka ni kuŵa umi, ni ŵiŵatesile yakusakala tacijimuka ni kwajimba magambo.

Ŵakumtendela Yesu umboni

³⁰ “Une ngaŵa mkupakombola kutenda kandu kalikose mwa une jikape; ngusalamulaga mwele pemo mpela mwakusasalilaga Atati ŵangu, myoyo kulamula kwangu kuli kwambone, ligongo ngangutenda yinguyisosa une, nambo yele peyo yakusosa Atati ŵangu ŵiŵandumile une kuti nayitende.

³¹ “Naga ngulitendela umboni une namsyene, ni umboni wangu uli wangakwanila.

³² Nambo apali jwine jwakwe jweleju ni Atati ŵangu ŵakusatendaga umboni wa une, ni ngumanyilila kuti yakuŵeceta jwalakwe ya une yili yakuwona.

³³ Jemanja ŵatumisye ŵamitenga ŵawo kwa Yohane,* ni jwalakwejo ŵaŵecete ya une yiyaliji yakuwona.

³⁴ Ngaŵa kuti ngukulupilila umboni wa mundu jwalijose; nambo kuti nguŵeceta yeleyi kuti jemanja akulupuce.

³⁵ Yohane ŵaliji mpela nyali jakolela ni jakuŵala, nipo jemanja mwasakaga kusengwa ni lilanguka lyakwelyo kwa kandaŵi.

³⁶ Nambo une ngwete umboni wa une jika wakupunda wele uŵapelece Yohane: welewu ni umboni wa yingutenda, yayili yitendo yiŵambele Atati ŵangu kuti nayitendeje, yeleyi yikuŵeceta ni kulosya kusyesyene mumbelele une, soni yingutendayo yikulosya kuti ndumidwe ni Atati ŵangu.

³⁷ Ni Atati ŵiŵandumile unewo, nombe nawo akundendela une umboni. Jemanja nganagapikaneje maloŵe gawo atamose kujiwona ngope jawo.

³⁸ Jemanja ngamkugasunga maloŵe gawo m'mitima mwenu, pakuŵa ngakumkulupilila jwele juŵamtumisye Atatijo.

³⁹ Jemanja akulijiganya Malemba, ligongo akuganisya kuti taciwupata umi wangamala m'Malembamo. Malemba gakwe ni gagaga gakuŵeceta ya une!

⁴⁰ Posepo jemanja ngakusosa kwika kuti alijiganye kwa une kuti akole umi.

⁴¹ “Une ngangwembeceya ucimbicimbi kutyocela kwa ŵandu.

⁴² Nambo ngumanyilila mumŵelele jemanja, soni ngumanyilila kuti jemanja ngakumnonyela Mlungu.

⁴³ Une mbice ni ulamusi wa Atati ŵangu, nambo jemanja nganimumbocela kose; nambo pitayicepo jwine ni ulamusi wakwe jemanja timcimpocela.

⁴⁴ Jemanja kumnonyela kupocela ucimbicimbi kutyocela kwa ŵandu, nambo ngamkulinjilila kutenda yindu yamti jumope jwali Mlungu mpaka ŵalapilile; nambi sambano yikomboleka camtuli kuti jemanja mungulupilile une?

⁴⁵ Akaganisyaga kuti, une ni jutinjimjimba magambo jemanja pameso pa Atati ŵangu, Mose* jumkumkulupililajo kuti mpaka amkamucisye ni jujojo ni jutacimjimba magambo jemanja.

⁴⁶ Yikaŵe kuti jemanja mwamkulupilile Mose kusyene, mkangulupilile une, ligongo jwalakwe jwalembile ya une.

⁴⁷ Nambo pakuŵa ngamkukulupilila yiŵalembile, ana mpaka mkulupilile camtuli yinguŵeceta une?”