Yohana 3 - Chiyawo Bible

Yesu ni Nikodemo

¹ Ŵapali jwamkulungwa jwine jwa Ciyuda lina lyakwe Nikodemo, jwa likuga lya Afalisi.*

² Jweleju ŵajawile kwa Yesu* cilo ni ŵatite kuti, “Mwalimu, uwe tukumanyilila kuti wawo ni mwalimu juŵatumisidwe ni Mlungu. Pangali mundu jwampaka apakombole kuyitenda yakusimonjesya yakuyitenda ŵalakwe naga Mlungu nganaŵa najo.”

³ Yesu ŵajanjile kuti, “Une ngwasalila yakuwona kuti: pangali jwakupakombola kuwuwona Ucimwene wa Mlungu* naga nganapagwa soni kaŵili.”

⁴ Nikodemo ŵawusisye kuti, “Ana mundu jwamkulungwa mpaka apagwe kaŵili camtuli? Pakuŵa yili yangakomboleka kuti jwalakwe ajinjile mcitumbo ca mamagwe ni kupagwa soni kaŵili!”

⁵ Yesu ŵajanjile kuti, “Une ngwasalila jemanja yakuwona kuti, pangali jwampaka apakombole kwinjila mu Ucimwene wa Mlungu ali jwangapagwa mwa mesi ni Msimu.

⁶ Ku cilu mundu akusapagwaga mwa acinangolo, nambo ku usimu akusapagwaga mwa Msimu.

⁷ Akasimonga cinguŵecetela kwa jemanja kuti wosope ŵene akwenela kupagwa kaŵili.

⁸ Mbungo jikasapujila kujikusosa, jemanja akusajipikana lisegwe lyakwe, nambo ŵangamanyilila kujikusatyocela kapena kujikwawula. Yili myoyo kwa jwalijose jwakupagwa mwa Msimu.”

⁹ Nikodemo ŵawusisye kuti, “Yeleyi mpaka yikombolece camtuli?”

¹⁰ Yesu ŵajanjile kuti, “Ana wawo ngakumanyilila yeleyi kutendaga ali mwalimu jwamkulungwa mu Isalaeli?”

¹¹ Une ngwasalila yakuwona kuti: “Uwe tukuŵeceta yitukuyimanyilila ni kusala yituyiweni, nambope pangali jumo jwa jemanja jwakusosa kwiticisya utenga wetu.

¹² Jemanja ngakungulupilila une pingumsalila yindu ya cilambo acino, nambi tacingulupilila camtuli pitinasalile yindu ya kwinani?

¹³ Ni pangali mundu jumo juŵakwesile kwawula kwinani nambo Mwanace jwa Mundupe basi juŵayice pasi pano kutyocela kwinani.”

¹⁴ Mpela muŵatendele Mose* kuti ŵalikolece pa citela lijoka lya bulonsi mcipululu, yalumo soni Mwanace jwa Mundu* akuŵajilwa kumkwesya,

¹⁵ kuti jwalijose jutamkulupilile jwalakwe akole umi wangamala.*

¹⁶ Pakuŵa Mlungu ŵacinonyele cilambo capasi mnope mwakuti jwalakwe ŵampelece Mwanace jwakwe jumopejo, ni kuti jwalijose jwakukulupilila mwa jwalakwe akawa nambo akole umi wangamala.

¹⁷ Pakuŵa Mlungu nganamtumisya Mwanace jwakwe mcilambo kuti aŵe jwakulamula magambo ga ŵandu, nambo kuti ŵakulupusye.

¹⁸ Ŵandu ŵakukulupilila mwa Mwanacejo ngakwalamula, nambo ŵakakukulupilila ŵalamwile kala, ligongo nganakulupilila mwa Mwanace jwa Mlungu jumopejo.

¹⁹ Amu ni muciciŵela cilamulo cakwe: lilanguka liyice mcilambo capasi, nambo ŵandu akunonyela cipi kupunda lilanguka, ligongo yitendo yawo yili yakusakala.

²⁰ Wosope ŵene ŵakusatenda yakusakala akusaliŵenga lilanguka soni ŵangayika kulili lilanguka, ligongo ngakusosa kuti yitendo yawo yakusakala yiwonecele pakulanguka.

²¹ Nambo ŵandu ŵakutenda yayili yakuwona akusayika kulili lilanguka kuti lilangukalyo lilosye kuti yiŵayitesileyo yaliji yakumpikanila Mlungu.

Yesu ni Yohane

²² Panyuma pa yeleyi, Yesu ni ŵakulijiganya* ŵakwe ŵajawile ku upande wa Yudeya, kuŵatemi ni jemanjajo ndaŵi panandi soni ŵabatisye.

²³ Yohane* nombe najo ŵabatisyaga mu Ainoni, ngaŵa kwakutalikangana ni ku Salimu, ligongo gapali mesi gamajinji mu gele malogo. Ŵandu ŵaliji mkwawula kwa Yohane ni ŵabatisyaga.

²⁴ (Pelepa ni kuti Yohane ŵaliji mkanaponyedwe mu ukayidi.)

²⁵ Ŵakulijiganya ŵane ŵa Yohane ŵatandite kukangana ni Myuda jwine ya ngani ja msyungu wakuliswejesya.

²⁶ Ni jemanjajo ŵajawile kwa Yohane ni ŵamwusisye kuti, “Mwalimu, ana akumkumbucila mundu juŵaliji najo lisi lya kungopoko lyuŵa kwa Yolodani, jwejula juŵamtendelaga umboni jula? Jwalakwejotu ali mkubatisya sambano jino ni mundu jwalijose akuwutucila kwa jwalakwejo!”

²⁷ Yohane ŵajanjile kuti, “Pangali mundu jwampaka akole cilicose naga Mlungu nganacipeleka kwa jwalakwe.

²⁸ Jemanja acimsyene ali mboni syangu kuti une natite, ‘Une nganimba Mkulupusyo, nambo andumile kuti longolele pasogolo pa jwalakwe.’

²⁹ Jwakulombedwa akusaŵa m'myala mwa jwakulombela, nambo mjakwe jwa jwakulombela, jwakusajimililaga ni kupikanilaga, akuŵa jwakusangalala pakupikana maloŵe ga jwakulombela. Myoyo soni une kusengwa kwangu kukwanile.

³⁰ Jwalakwe akwenela kuŵa jwamkulungwa nambo une mbe jwamnondi.”

Yesu ŵatyocele kwinani

³¹ Jwele jwakutyocela kwinani ali jwamkulungwa kwapunda wosope. Jwele jwakutyocela pa cilambo capasi ali jwapacilambo capasi ni akusaŵecetaga yindu ya pa cilambo capasi, nambo jwele jwakutyocela kwinani ali penani pa wosope.

³² Jwalakwe akusasala yayiweni ni kuyipikana, nambo pangali atamose jumo jwakuwupocela utenga wakwe.

³³ Nambo jwalijose jwakuwupocela utenga wakwe akusimicisya kuti Mlungu ali ŵakuwona.

³⁴ Pakuŵa jwele jwatumidwe ni Mlungu akusaŵeceta maloŵe ga Mlungu, ligongo Mlungu akusampaga macili gosope ga Msimu.

³⁵ Atati akusamnonyelaga Mwanace jwawo soni yosope yene ayiŵisile m'myala mwakwe.

³⁶ Jwalijose jwakukulupilila mwa Mwanace akwete umi wangamala, jwalijose jwangampikanila Mwanace ngasakola umi, nambo Mlungu tacapa yisawusyo mpaka kalakala.