Yohana 20 - Chiyawo Bible

Yesu ŵajimwice ku ŵawe

¹ Kumasikusiku kwa lisiku lya mlungu, cipi cili ciŵela, Maliya jwa ku Magadala ŵajawile ku malembe nipo ŵasimene kuti liganga lya pa mbanga jakwinjilila m'malembemo pangali.

² Ŵajawile ali mkuwutuka kwa Simoni* Petulo* ni jwakulijiganya jwine juŵamnonyelaga Yesu* jula, nipo ŵasalile jemanjajo kuti, “Ŵandu ŵatyosisye Ambuje ŵala ku malembe, nipo ngatukumanyilila kuŵaŵisile!”

³ Kaneko Petulo ni jwakulijiganya jwinejo ŵajawile ku malembeko.

⁴ Ŵaŵili wosopewo ŵaliji mkuwutuka, nambo jwakulijiganya jwinejo ŵawutwice mnope kumpunda Petulo ni ŵaliji jwandanda kuja kwika ku malembe.

⁵ Jwalakwe ŵajineme ni kusiwona sanda siŵamŵijilile sila, nambo nganajinjila.

⁶ Simoni Petulo juŵamkuyaga nombe najo ŵayice, ni ŵajinjile mwilembemo. Jwalakwe ŵasiweni sanda siŵamŵijililesyo sili pasi.

⁷ Nambo soni ŵajiweni nguwo jijaliji kumtwe kwa Yesu. Jeleji nganijiŵa pamo ni nguwo sine sila nambo kuti jaliji jajiŵilije mpela muŵawalile.

⁸ Kaneko jwakulijiganya jwine jula, juŵatandite kwika pa lilembepo, ŵajinjile nombe najo, ŵalolite nipo ŵakulupilile.

⁹ (Jemanjajo ŵaliji mkanapikanicisyepe pa jele ndaŵiji yiyalembedwe m'Malemba kuti jwalakwe akuŵajilwa kwimuka ku ŵawe.)

¹⁰ Kaneko ŵakulijiganya* ŵala ŵawujile kumangwawo.

Yesu akuwonecela kwa Maliya jwa ku Magadala

¹¹ Maliya ŵajimi pasa ciŵandika ni lilembelyo ni kulilaga. Ali mkulilape yilayila, ŵajineme ni kulingulila mwilembemo,

¹² nipo ŵagaweni malayika* gaŵili mwelemo gewale yeswela gali gatemi piwaliji mtembo wa Yesu, limo kumitwe ni line kumatambalicilo.

¹³ Jemanjajo ŵamwusisye jwamkongwejo kuti, “Ana, ligongo cici mkulila?” Jwamkongwejo ŵajanjile kuti, “Ŵandu ŵatyosisye Ambuje ŵangu, ni ngangumanyilila kuŵaŵisile!”

¹⁴ Kaneko ŵagalawice nipo ŵam'weni Yesu ali ajimi pelepo, nambo jwalakwe nganamanyilila kuti ŵaliji Yesu.

¹⁵ Yesu ŵamwusisye kuti, “M'mwe ŵakongwe, ligongo cici mkulila? Ana mkwasosa ŵani?” Jwalakwejo ŵaganisyaga kuti ŵaliji mundu juŵapanganyaga masengo mu mgundamo, myoyo ŵamsalile mundujo kuti, “Naga ali wawojo ŵiŵamtyosisye, bwana, asalile kwamŵisile, nipo tinjawule ngamjigale.”

¹⁶ Yesu ŵatite kwa jwalakwe, “Maliya!” Jwalakwe ŵagalawucile kuŵaliji Yesu ni ŵaŵecete Mcihebeli kuti, “Laboni!” (Kugopolela kuti “Mwalimu.”)

¹⁷ Yesu ŵamsalile kuti, “Mkasimungamula, ligongo nganingwele kuwujila kwinani kwa Atati. Nambo m'malo mwakwe mjawule kwa acalongo acimjangu ni mkasalile kuti une nguwujila kwa ŵele ŵali Atati ŵangu ni Atati ŵenu, Mlungu jwangu ni Mlungu jwenu.”

¹⁸ Myoyo Maliya jwa ku Magadala ŵajawile ni kwasalila ŵakulijiganya ŵala kuti jwalakwe ŵaweni Ambuje nipo ŵalondecesye jemanjajo yiŵamsalile Yesu jwalakwejo.

Yesu akuwonecela kwa ŵakulijiganya ŵakwe

¹⁹ Lyaliji lya Mlungu ligulo kuli kuswele, nipo ŵakulijiganya ŵasongene pamo ali awugele matanga mcipinda muŵalijimo, mtande wakwajogopa acakulungwa ŵa Ayuda.* Kaneko Yesu ŵayice ni kwima pasikati pawo. Jwalakwe ŵatite, “Mtendele uŵe ni jemanja.”

²⁰ Ali aŵecete gele maloŵega, ŵalosisye jemanjajo maŵanga ga m'magasa mwakwe ni mumbalati mwakwe. Ŵakulijiganyawo ŵaliji ŵakusangalala mnope piŵaweni Ambuje.

²¹ Yesu ŵaŵecete nawo kaŵili, “Mtendele uŵe ni jemanja. Mpela Atati ŵandumisye une, une soni ngumtumisya jemanja.”

²² Kaneko ŵapepelele lipuje pa jemanjajo ni ŵatite, “Apocele Msimu Ŵaswela.

²³ Naga jemanja mkwakululucila ŵandu ulemwa* wawo, jemanjajo akululucidwe, naga jemanja ngakwakululucila, jemanjajo taciŵa ŵangakululucikwa.”

Yesu ni Tomasi

²⁴ Jumo jwa ŵakulijiganya likumi ni ŵaŵili ŵala, ŵaliji Tomasi (lina lyakwe line lyaliji Jwamaŵila), jweleju nganaŵa pamo ni acimjakwewo piŵalilosyaga Yesu kwa jemanjajo.

²⁵ Ni ŵakulijiganya ŵanewo ŵamsalile kuti, “Uwe twaweni Ambuje!” Nambo Tomasi ŵasalile jemanjajo kuti, “Naga ngangugawona maŵasi ga m'magasa mwakwe mujapite misomali ni kuŵika cala cangu pa gele maŵasigo ni kuŵika ligasa lyangu mumbalati mwakwe, ngasingulupilila kose.”

²⁶ Gali gapite masiku msano ni gatatu ŵakulijiganya ŵakwe ŵala ŵasongene soni mkati mwa nyumba mula, nipo Tomasi ŵaliji nawo yalumo. Matanga galiji gewugale ni maloko, nambo Yesu ŵayice ni kwima pasikati pawo nipo ŵatite, “Mtendele uŵe ni jemanja.”

²⁷ Kaneko ŵamsalile Tomasi kuti, “Aŵice cala cawo pegasa pangu, nipo agalole magasa gangu, kaneko atambasukule mkono wawo ni awuŵice mumbalati mwangu. Alece kukayicila nipo akulupilileje!”

²⁸ Tomasi ŵatite, “Ambuje ŵangu ni Mlungu jwangu!”

²⁹ Yesu ŵatite kwa jwalakwe, “Ana mkulupilile ligongo mumbweni? Akwete upile ŵele ŵakukulupilila atamose nganambona une!”

Cakulinga ca bukuji

³⁰ Yesu piŵaliji ni ŵakulijiganya ŵakwe, ŵapanganyisye yakusimonjesya yine yayijinji yimkanalemba mu jele bukuji.

³¹ Nambo ayi yinduyi ayilembile kuti jemanja mkulupilile kuti Yesu ali Klistu,* Mwanace jwa Mlungu, nipo kuti jemanja akole umi pakukulupilila mu lina lyakwe.