Yohana 2 - Chiyawo Bible

Ulombela wa ku Kana

¹ Gali gapite masiku gaŵili kwaliji kwana ulombela mu msinda wa Kana m'Galileya. Mama ŵawo ŵa Yesu* ŵaliji kukoko,

² nambo soni Yesu ni ŵakulijiganya* ŵakwe ŵaŵilasile ku ulombelako.

³ Piŵamasile finyo, mama ŵawo Yesu ŵamsalile jwalakwe kuti, “Ŵanduŵa ŵangali finyo amasile.”

⁴ Yesu ŵajanjile kuti, “Mama, ngakuŵajilwa kusalila une yakutenda, ndaŵi jangu nganijikwane.”

⁵ Mama ŵawo Yesu ŵasalile ŵamasengowo kuti, “Agambe kutenda yiliyose yitiŵasalileyo.”

⁶ Ayuda ŵakwete malamusi gakuliswejesya pakupopela, pa lyele ligongoli yapali yiŵiga ya maganga msano ni cimo ukulu wakwe, cilicose kwinjilamo ma lita 75 mpaka 100.

⁷ Yesu ŵasalile ŵamasengo ŵala kuti, “Agumbasye ayi yiŵigayi ni mesi.” Jemanjajo ŵagumbesye yiŵigayo mpaka mu ngomo.

⁸ Kaneko jwalakwe ŵasalile kuti, “Atece sambano ni ajigale akapelece kwa jwamkulungwa jwa cindimba.” Ni ŵamjigalile mesigo.

⁹ Sambano galiji gali gasandwice finyo ni jwalakwe ŵamwele. Nganamanyilila kose kuŵatyocele jwele finyoju (nambo, ŵamasengo ŵiŵatecile mesi ŵala ni ŵiŵamanyilile.) Ni ŵamŵilasile msyene ulombela jwamlume

¹⁰ ni ŵatite kwa jwalakwe, “Jwalijose akusapelekaga finyo jwambone mnope pandanda, ni acalendowo ali ajikwite, ni akusapelekaga finyo wamba. Nambo ŵagambile kusalasya finyo jwambonejo mpaka sambano jino!”

¹¹ Yesu ŵapanganyisye cakusimonjesya candandaci ku Kana m'Galileya, kuŵalosisye lumbili lwakwe, ni ŵakulijiganya ŵakwe ŵakulupilile mwa jwalakwe.

¹² Panyuma pa yeleyi, Yesu, mama ŵawo, acapwakwe, ni ŵakulijiganya ŵakwe ŵajawile ku Kapelenaumu ni ŵatemi kweleko masiku gakuŵalanjika.

Yesu akwawula ku Nyumba ja AMBUJE

¹³ Jaliji ndaŵi jakuŵandicila Cindimba ca Pasaka,* ni Yesu ŵajawile ku Yelusalemu.

¹⁴ M'Nyumba ja AMBUJEMO ŵasimene ŵandu ali mkusumisya ng'ombe, ngondolo, ni ngunda, ni ŵandu ŵakutenda malonda ga gakucenga mbiya ali atemi pigaliji matebulo gawo.

¹⁵ Yesu ŵapanganyisye cikoti ca ngonji ni ŵakopocesye wosope kusa kwa Nyumba ja AMBUJE, pampepe ni ngondolo ni ng'ombe syakwe. Ŵapikwisye matebulo giŵatendelaga malonda gakucenganya mbiya ni kusimwanya mbiyasyo.

¹⁶ Ŵalamwile ŵiŵasumisyaga ngunda kuti, “Asikoposye amuno ngundasyo! Akajitenda nyumba ja Atati ŵangu kuŵa malo ga malonda!”

¹⁷ Ŵakulijiganya ŵakwe ŵakumbucile kuti malemba gakuti, “Ambuje Mlungu, cinonyelo cangu ca pa nyumba jawo, ticicimbulajisya une.”

¹⁸ Acakulungwa ŵa Ciyuda ŵamwusisye ciwusyo cakuti, “Ana cici cakusimonjesya campaka apanganye ni kutulosya uwe kuti wawo akuŵajilwa kutenda yeleyi?”

¹⁹ Yesu ŵajanjile kuti, “Agwisye Nyumba ja AMBUJEJI, nipo tinjitaŵa soni gali gapite masiku gatatu.”

²⁰ Jemanjajo ŵamwusisye kuti, “Tacijitaŵa soni pa masiku gatatupe basi? Jamasiletu yaka 46 ali mkutaŵa jele Nyumba ja AMBUJEJI!”

²¹ Nambo Nyumba ja AMBUJE jiŵagambaga Yesu caliji cilu cakwe.

²² Jwalakwe piŵamjimwisye ku ŵawe, ŵakulijiganya ŵakwe ŵakumbucile kuti jwalakwe ŵaliji ali aŵecete yeleyi, piŵagakulupilile Malemba ni yiŵaŵecete Yesu.

Yesu akumanyilila muwuŵelele umi wa ŵandu

²³ Piŵaliji Yesu m'Yelusalemu pa ndaŵi ja cindimba ca Pasaka, ŵandu ŵajinji ŵakulupilile mwa jwalakwe piŵayiweni yakusimonjesya yiŵayipanganyisye.

²⁴ Nambo Yesu nganasosa kuti ŵanduwo akole macili pa jwalakwe ligongo ŵamanyilile wosope mitima jawo.

²⁵ Paliji pangasosekwa soni kuti jwine amsalile ya ŵanduwo, ligongo ŵamanyilile msyene kalape yiyaliji m'mitima mwawo.