Yohana 19 - Chiyawo Bible

¹ Kaneko Pilato* ŵalamwile kuti amjigale Yesu* ni akampute.

² Asilikali ŵapanganyisye cisoti ca ucimwene cakuluka kutyocela ku nyambi sya miŵa ni kum'weca mu mtwe mwakwe, kaneko ŵam'wecice mkanjo wa papo.

³ Ŵayikagayikaga kwa jwalakwe ni kumtendaga, “Akole umi welewu mwenye jwa Ayuda!” Nipo ŵajawulaga ni kuja kumputa makofi.

⁴ Pilato ŵakopwece soni pasa ni kuja kuŵeceta ni likuga lya ŵandu ŵala kuti, “Alole, une ngumkoposya mundujo pasa pano kuti jemanja amanyilile kuti nganguliwona ligongo lililyose lyakumjimbila magambo jwalakwejo.”

⁵ Myoyo Yesu ŵakopwece pasa, ali awete cipewa ca ucimwene ca miŵa ni mkanjo wa papo. Pilato ŵatite kwa jemanjajo, “Alole! Ajutu mundu jula!”

⁶ Acakulungwa ŵa ŵakutaga mbopesi ni asilikali ŵakulondela Nyumba ja AMBUJE piŵam'weni jwalakwe, ŵagumisile kuti, “Amkomele pa msalaba! Amkomele pa msalaba!” Pilato ŵatite kwa jemanjajo, “Amjigale jemanja acimsyene, ni akamkomele pa msalaba. Une nganguliwona ligongo lililyose lyakumjimbila magambo jwalakweju.”

⁷ Likuga lya ŵandulyo lyajanjile kuti, “Uwe tukwete lilamusi, malinga ni lyele lilamusilyo, jweleju akuŵajilwa kuti awe, ligongo alitesile msyeneju kuti ali Mwanace jwa Mlungu.”

⁸ Pilato piŵapikene yeleyi, ŵajogwepe mnope.

⁹ Ŵajinjile soni m'nyumba ni ŵamwusisye Yesu kuti, “Ana mkutyocela kwapi?” Nambo Yesu nganajanga kandu kalikose.

¹⁰ Pilato ŵatite kwa jwalakwe, “Ana wawo ngakusosa kuŵeceta ni une? Ngakumanyilila kuti une ngwete macili gakuti ni kwagopola wawojo nambo soni gakukunda kuti wawojo ŵakomele pa msalaba.”

¹¹ Yesu ŵajanjile kuti, “Wawo ngamkanapakombola kwalamula ŵandu kuti andendele une yindu nambo ligongo Mlungu ŵakundile kuti atende. Myoyo mundu jwambelece une kwa wawojo ni jwapundile kola ulemwa.”*

¹² Piŵapikene yeleyi Pilato ŵalinjile kusosa nditu kuti amgopole Yesu. Nambo likuga lya ŵandu lyagumisile kuti, “Naga akumgopola jwelejo, ni basi wawojo nganaŵa mjakwe jwa Kayisala! Jwalijose jwakulitenda msyene kuti ali mwenye, akusisyana ni Kayisala!”

¹³ Pilato piŵapikene gele maloŵega, ŵamkopwesye Yesu pasa ni ŵatemi pa citengu cakulamulila magambo pa malo gakolanjidwa “Pa liganga lyakusepa”. (Mcihebeli lina lyakwe “Gabata”.)

¹⁴ Ndaŵi jaliji ciŵandika 12 koloko jamusi lisiku lyakulilinganyicisya cile cindimba ca Pasaka.* Pilato ŵatite kwa Ayuda ŵala, “Aju mwenye jwenu!”

¹⁵ Jemanjajo ŵagumisile kuti, “Amwulaje! Amwulaje! Amkomele pa msalaba!” Pilato ŵawusisye jemanjajo kuti, Ana akusosa kuti une nimkomele pa msalaba mwenye jwawoju? Acakulungwa ŵa ŵakutaga mbopesi ŵajanjile kuti, “Mwenye jutukwete uwe ni Kayisalape basi!”

¹⁶ Kaneko Pilato ŵampelece Yesu kwa jemanjajo kuti akamkomele pa msalaba. Myoyo asilikali ŵamtyosisye Yesu.

Yesu akumkomela pa msalaba

¹⁷ Ŵakopwece pasa, ali anyakwile msalaba wakwe, nipo ŵayice kumalo giŵagakolangaga kuti, “Malo ga Cikalakasa”. (Mu ciŵeceto ca Cihebeli gakusakolanjidwa kuti “Gologota”.)

¹⁸ Kweleko ni kuŵamkomele jwalakwe, nipo soni ŵakomele ŵandu ŵaŵili, jumo mbali ja ku mkono wamlyo, jwine mbali ja ku mkono wa mciji wa Yesu, nipo Yesu ŵaliji pasikati pa jemanjajo.

¹⁹ Pilato ŵalembile cimanyisyo ni kuciŵika pa msalaba. Maloŵe gakwe galiji gakuti, “Yesu jwa ku Nasaleti, Mwenye jwa Ayuda.”

²⁰ Ŵandu ŵajinji ŵaciŵalasile, ligongo malo giŵamkomele Yesu nganigaŵa kwakutalicila ni msinda. Cimanyisyoco ŵacilembile myiŵeceto ya Cihebeli, Cilatini ni Cigiliki.*

²¹ Acakulungwa ŵa ŵakutaga mbopesi ŵamsalile Pilato kuti, “Akasalemba kuti ‘Mwenye jwa Ayuda’, nambo kuti, ‘Jwele munduju ŵatite kuti, “Une ni mwenye jwa Ayuda.” ’ ”

²² Pilato ŵajanjile kuti, “Une linembile ni lembile basi.”

²³ Asilikali ŵala piŵamasile kumkomela pa msalaba Yesu, ŵajigele yakuwala yakwe ni kuyigaŵanya pacece, msilikali jwalijose ŵajigele cakuwala cakwe. Ŵajigele soni mkanjo, uŵawupanganyisye ni nguwo jimo jangali lutoto palipose.

²⁴ Asilikali ŵala ŵasalilene kuti, “Kwende tukawupapula, nambo kuti kwende tutende cisango kuti tumwone jutawujigale.” Ayi yatendekwe kuti malemba gatendekwe gakuti: “Ŵagaŵene acimsyenepe yakuwala yangu nipo mkanjo wangu ŵawulondolele cisango.” Nipo ayi ni yiŵayitesile asilikali ŵala.

²⁵ Ŵiŵajimi ciŵandika ni msalaba wa Yesu ŵaliji mamagwe, ni mamagwe ŵanandi, Maliya ŵamkwawo ŵa Kiliyopa, ni Maliya jwa ku Magadala.

²⁶ Yesu ŵaweni mamagwe ni jwakulijiganya juŵamnonyelaga jula ali ajimi pelepo, myoyo ŵatite kwa mamagwe, “Jwalakweju ni mwanagwenu.”

²⁷ Kaneko ŵamsalile jwakulijiganya jula kuti, “Aŵa ni mama ŵenu.” Kutandila jele ndaŵijo jwakulijiganya jula ŵajigele mama ŵala ni kujaga kutama nawo kumangwakwe.

Ciwa ca Yesu

²⁸ Yesu ŵamanyilile kuti yosope yene sambano yayice pambesi, nipo pakusosa kuti yitendece yigatite Malemba, jwalakwe ŵatite kuti, “Jingwete njota.”

²⁹ Paliji pana lulo, lwagumbala ni finyo jwamcesuce, myoyo ŵaloŵece siponji mu finyojo ni kujisomeka ku litete ni kujikwesya mpaka kukamwa kwakwe.

³⁰ Yesu ŵamwele finyojo kaneko ŵatite kuti, “Yosope yene yitendekwe!” Kaneko ŵajinamisye mtwe wakwe ni ŵawile.

Asilikali ŵamsomile Yesu mu mbalati

³¹ Acakulungwa ŵa Ayuda* ŵamŵendile Pilato kuti ŵakunde akatemangule ngongolo sya ŵandu ŵiŵakomele pa msalaba ŵala, ni kuti akayitulusye yilu yawo pa misalabapo. Ŵaŵendile myiyi ligongo lyaliji lisiku lya Msano, nipo nganasosa kuti yiluyo yiŵe pa misalabapo lisiku lyakupumula lya Ayuda, pakuŵapo lisiku lyakupumula lya Ayuda lilyayikagalyo lyaliji lyalikulungwa.

³² Myoyo asilikali ŵajawile ni kuja kutemangula ngongolo sya mundu jwandanda soni kaneko sya mundu jwine jula ŵiŵakomele pamo ni Yesu ŵala.

³³ Nambo piŵayice pa Yesu, ŵamsimene ali awile kala, myoyo nganatemangula ngongolo syakwe.

³⁴ Nambope jumo jwa asilikaliwo ŵasomile mumbalati mwa Yesu ni lipanga lyakwe, nipo ndaŵi jijojo miasi ni mesi yakopwece yalumo.

³⁵ (Jwele juŵayiweni yeleyi yili mkutendeka ni jwaŵecete yele yinduyi, kuti jemanja nombe nawo akulupilile. Yiŵaŵecete jwalakwejuyi yili yakuwona, nipo akumanyilila kuti akuŵeceta yakuwona.)

³⁶ Yeleyi yatendece myiyi kuti yiyalembedwe m'malemba yiŵe yakuwona yakuti: “Pangali atamose limo lya mawupa gakwe litacilitemangula.”

³⁷ Nipo pana malemba gane gigalembedwe kuti, “Ŵandu tacimlolecesya jwele juŵamsomile ni lipangajo.”

Akusika mtembo wa Yesu

³⁸ Panyuma pa yele yinduyi, Yosefe juŵatyocelaga ku msinda wa Alimateya, ŵamŵendile Pilato naga kwaliji kwakomboleka kuwujigala mtembo wa Yesu. (Yosefe ŵaliji jwakulijiganya jwa Yesu, nambo mwakulisisa, ligongo ŵajogopaga acakulungwa ŵa Ayuda.) Pilato ŵamsalile kuti akukomboleka kuja kujigala mtembowo, myoyo Yosefe ŵajawile ni kuja kuwutyosya.

³⁹ Nikodemo, juŵajawile pandanda kuja kukumlola Yesu cilo jula, ŵajawile ni Yosefe, ali ajigele mawuta gakununjila ga mule* gakuwanganya ni aloye gakusitopa ciŵandika makilogalamu 30.

⁴⁰ Ŵele ŵandu ŵaŵiliŵa ŵajigele mtembo wa Yesu ni kuwuŵijilila mu nguwo jeswela ja bafuta pamo ni mawuta gakununjila gala mpela mwakusatendelaga pa misyungu ja Ayuda jakulinganyicisya mtembo pakuja kukuwusika.

⁴¹ Pa malo piŵamwulajile Yesu wapali mgunda, uwakwete lilembe lyasambano mumkanamsiceje mundu jwalijose citandilile.

⁴² Pakuŵapo lyaliji lya Msano, lisiku lyakupumula lya Ayuda mkinilikwane, pakuti lilembe lyaliji pakuŵandicila, myoyo ŵasicile mtembo wa Yesu mwelemo.