Yohana 18 - Chiyawo Bible

Acakulungwa ŵa Ayuda akumkamula Yesu

¹ Yesu piŵapopesile myiyi, ŵatyosile ni ŵakulijiganya* ŵakwe ni kwawula pesi lusulo lwakolanjidwa Kidiloni. Kwele kumaloko kwaliji kwana mgunda, nipo Yesu* ni ŵakulijiganya ŵakwe ŵajinjile mu mgundamo.

² Yudasi, juŵampelece Yesu jula, nombe najo ŵakumanyilile kumaloko, ligongo kakajinji Yesu ŵasimanganaga ni ŵakulijiganya ŵakwe kweleko.

³ Myoyo Yudasi ŵalilongolele likuga lya asilikali ŵa Aloma,* ni alonda ŵane ŵa ku Nyumba ja AMBUJE ŵiŵatumisye acakulungwa ŵa ŵakutaga mbopesi ni Afalisi* ku mgundako, jemanjaji ŵajigele mawupanga gawo, ŵanyakwile soni nyali ni muli syakwe.

⁴ Yesu ŵayimanyilile yosope yene cile yiyatiji yimtendecele, myoyo jwalakwe ŵajawile pasogolo ni kuja kwawusya jemanjajo kuti, “Ana ŵani ŵakwalolesya?”

⁵ Jemanjajo ŵajanjile, “Yesu jwa ku Nasaleti.” Jwalakwe jwatite, “Ni une jwene.” Yudasi jwakumpelekajo, ŵajimi papopo ni jemanjajo.

⁶ Yesu piŵatite kwa jemanjajo, “Ni une jwene,” ŵawujile munyuma nipo ŵagwile pasi.

⁷ Yesu ŵawusisye soni kaŵili, “Ana ŵani ŵakwalolesya?” Jemanjajo ŵatite, “Yesu jwa ku Nasaleti.”

⁸ Yesu ŵatite, “Une ngati namsalile kalape jemanja kuti ni une jwene, myoyo, naga jemanja mkundolesya une, mwalece ŵandu ŵaneŵa ajawuleje.”

⁹ (Jwalakwe ŵaŵecete yeleyi kuti yiŵaŵecete kala yitendece yakuti: “Atati, nganinjasa atamose jumo jwa ŵele ŵiŵambele une.”)

¹⁰ Simoni* Petulo,* juŵakwete upanga, ŵawukopwesye ni kata lipikanilo lya ku mlyo lya jwamasengo jwa jwamkulungwa jwa ŵakutaga mbopesi.* Jwamasengojo lina lyakwe lyaliji Malikosi.

¹¹ Yesu ŵatite kwa Petulo, “Mwucisye upanga wenu mwigonelo mwakwe! Ana mkuganisya kuti une ngangusosa kumwela mgawo wa yisawusyo mu litala lyalinganyisye Atati ŵangu kuti ndaje?”

Ŵapite najo Yesu kwa Anasi

¹² Kaneko asilikali ŵa Aloma ni jwamkulungwa jwakulamula pamo ni alonda ŵa Ayuda ŵamkamwile Yesu, ni kumtaŵa,

¹³ ni ŵamjigalile jwalakwejo kwa Anasi ŵele ŵiŵaliji akwegwe ŵawo ŵalume ŵa Kayafa juŵaliji jwamkulungwa jwa ŵakutaga mbopesi m'caka celeco.

¹⁴ Kayafajo ni jwele juŵaliji ali ŵasalile acakulungwa ŵa Aloma kuti kwaliji kwambone kuti mundu jumo awe m'malo mwa ŵandu wosope.

Petulo ŵamkanile Yesu

¹⁵ Simoni Petulo pamo ni jwakulijiganya jwine ŵamkuyaga Yesu. Jwakulijiganya jwinejo jwaliji jwakumanyika mnope kwa jwamkulungwa jwakutaga mbopesi, myoyo ŵalongene ni Yesu ku luŵala lwa mkati mwa nyumba ja jwamkulungwa jwa ŵakutaga mbopesi.

¹⁶ Nipo Petulo ŵaliji mkulola yiyaliji mkutendekwa pa cipata. Kaneko jwakulijiganya jwine jwakopwece, nipo jwaliji mkuŵeceta ni mwali juŵalindililaga pa cipata jula, ni ŵamjinjisye Petulo.

¹⁷ Mwali pa cipatapo ŵaŵecete ni Petulo, “Wawo nganaŵa soni jumo jwa ŵakulijiganya jwa aju munduju?” Petulo ŵajanjile kuti, “Iyayi, nganimba une.”

¹⁸ Kwaliji mkusisima, myoyo ŵamasengo ni alonda ŵakolesisye moto wa makala ni ŵajimi kusyungulila pamotopo, ni jemanjajo ŵajotaga. Myoyo Petulo ŵajawile papopo kuja kwima ni kotaga nawo motowo.

Jwamkulungwa jwa ŵakutaga mbopesi akumwusya Yesu

¹⁹ Jwamkulungwa jwa ŵakutaga mbopesi ŵamwusisye Yesu ya ŵakulijiganya ŵakwe ni ya majiganyo gakwe.

²⁰ Yesu ŵajanjile kuti, “Une ndaŵi syosope naliji mkuŵeceta mwagopoka mwakuti jwalijose jwa cilambo capasi ni kupakombola kupikana, yakwiganya yangu yosope yatendekaga m'nyumba syakupopelela ni mu Nyumba ja AMBUJE, mwakasasonganaga ŵandu wosope. Une nganimbeceteje cindu cilicose mwakusisa.

²¹ Sambano, ligongo cici akumbusya une? Ŵawusye ŵandu ŵiŵambikene une yinasalile jemanjajo, akumanyilila yinaŵecete.”

²² Piŵaŵecete Yesu yeleyi, jumo jwa asilikali ŵakulondela Nyumba ja AMBUJE juŵaliji pelepo ŵamputile Yesu likofi, ni ŵatite, “M'mwe, ŵamsalile ŵani kuŵeceta camti myoyo kwa Jwamkulungwa jwa ŵakutaga mbopesi!”

²³ Yesu ŵamjanjile, “Naga une mbecete cindu cakulemwa, amsalile mundu jwalijose panopano cakulemwaco. Nambo naga mbecete cilungamo, ligongo cici akumbuta?”

²⁴ Kaneko Anasi ŵamtumisye jwalakwe kwa Kayafa Jwamkulungwa jwa ŵakutaga mbopesi.

Petulo akumkana Yesu kaŵili

²⁵ Aji ndaŵiji Petulo ŵaliji cimile palapala ni kotaga moto. Myoyo ŵandu ŵane ŵamwusisye kuti, “Ana wawo nganaŵa soni ŵamo mwa ŵakulijiganya ŵa jwele munduju?” Nambo Petulo ŵakanile yeleyo ŵatite, “Iyayi, nganimba une.”

²⁶ Jumo jwa ŵamasengo ŵa Jwamkulungwa jwa ŵakutaga mbopesi jwapawulongo ni mundu juŵamkatile Petulo lipikanilo jula, ŵamwusisye Petulo kuti, “Ana nganinawona wawojo ali najo Yesu mu mgunda mula?”

²⁷ Petulo ŵakanile soni kuti, “Iyayi” nipo ndaŵi jijojo tambala ŵatongwele.

Acakulungwa ŵa Ayuda akumjimba magambo Yesu pameso pa Pilato

²⁸ Ŵalaŵilile kundaŵi kumjigala Yesu kutyocela ku nyumba ja Kayafa kwawula ku nyumba ja bwanamkubwa.* Acakulungwa ŵa Ayuda nganajinjila mkati mwa nyumbajo, ligongo ŵasosaga kuti akalisakasya, pakusosa kuti akapakombole kulya yakulya ya cindimba ca Pasaka.*

²⁹ Myoyo Pilato* ŵakopwece pasa kuja kukwawusya jemanjajo kuti, “Ana munduju akumjimba magambo gamti uli?”

³⁰ Kwanga kwawo kwaliji mwakuti, “Uwe ngamkanitumpeleka m'myala mwa ŵalakwe akaŵe kuti nganalemwa.”

³¹ Pilato ŵasalile jemanjajo kuti, “Myoyotu amjigale jemanja acimsyene kuti akamjimbe magambo malinga ni malamusi gawo.” Jemanjajo ŵajanjile kuti, “Uwe malamusi gangatukunda kumwulaga mundu jwalijose.”

³² (Ayi yaliji myiyi kuti gatendece maloŵe ga Yesu, giŵaŵecete pakusala ya mutaciwila.)

³³ Pilato ŵawujile soni m'nyumba ni ŵamŵilasile Yesu. Kaneko ŵamwusisye kuti, “Ana m'mwejo mli mwenye jwa Ayuda?”

³⁴ Yesu ŵamwusisye kuti, “Ana cele ciwusyoci cikutyocela kwa wawojo kapena ŵandu ŵane ni ŵiŵasalile wawojo ya une?”

³⁵ Pilato ŵajanjile kuti, “Ana wawo akuganisya kuti une Myuda? Ŵandu ŵawotu pamo ni acakulungwa ŵa ŵakutaga mbopesi ni ŵiŵapelece wawo m'myala mwangu. Ana wawo atesile cici?”

³⁶ Yesu ŵajanjile kuti, “Ucimwene wangu nganiwuŵa kose wa cilambo capasi pano, ukaŵe wa cilambo capasi pano, ŵakunguya ŵangu akatesile ngondo kuti une ngapelecekwa m'myala mwa acakulungwa ŵa Ayuda. Une Ucimwene wangu nganiwuŵa wa cilambo capasi pano iyayi!”

³⁷ Myoyo Pilato ŵamwusisye jwalakwejo kuti, “Ana ni kuti m'mwejo mli mwenye?” Yesu ŵajanjile kuti, “Mkuŵeceta m'mwejo kuti une ndili mwenye. Une napagwile nipo nayice pa cilambo capasi pano ni ligongo limo lyele lyakuti, mbecete yindu yakuwona. Jwalijose jwali mbali ja yakuwona akusambikanila.”

³⁸ Pilato ŵamwusisye, “Ana yakuwona yakwe ni yamti uli?” Kaneko Pilato ŵakopwece soni pasa kwa ŵandu kukumsalila kuti, “Une ngangupakombola kose kuliwona ligongo lyakumjimbila magambo munduju.

Pilato akumpeleka Yesu kuti amwulaje

³⁹ Nambo pakuŵapo caka cilicose pa cindimba ca Pasaka ngasinagopolelaga jemanja mkayidi, ana akusosa kuti nagopolele mwenye jwa Ayuda?”

⁴⁰ Jemanjajo ŵamjanjile mwagumila, “Iyayi, ngaŵa jwelejo! Uwe tukumsosa Balaba!” (Balaba ŵaliji jwaciswamba.)