Yohana 15 - Chiyawo Bible

Yesu ali mpeleya usyesyene

¹ “Une ndili citela ca mpeleya usyesyene, nipo Atati ŵangu ni ŵakuwulimila.

² Akusakataga lunyambi lulilose lwakusimanika mwa une lwangasogola yisogosi, nipo akusasamalilaga lunyambi lwakusogola yisogosi pakulusandulila nyambi wamba, kuti luŵe lwakusalala ni kusogola yisogosi yejinji.

³ Jemanja msalele kala ligongo lya utenga wangu unapele.

⁴ Jemanja mŵe ŵakulumbikana mwa une, nipo une tinjiŵa jwakulumbikana mwa jemanja. Lunyambi ngakomboleka kusogola cisogosi pajika, nambo mpaka yikombolece kusogola naga luli lulumbikene ni citela ca mpeleya. Yalumo soni jemanja ngakomboleka kusogola cisogosi nambo akaŵe mli mlumbikene ni une.

⁵ “Une ndili citela ca mpeleya, nipo jemanja mli nyambi syakwe. Mundu jwakutamape mwa une, nipo une mwa jwalakwe, tacisogola yisogosi yejinji, pakuŵa naga pangali une jemanja ngakomboleka kutenda cilicose.

⁶ Jwalijose jwakakutamape mwa une akumponya pasa mpela lunyambi nipo akasajumulaga, syelesi ni nyambi syakasasisonganya ŵandu ni kusiponya pamoto, ni sikusakolelaga.

⁷ Naga akutama mwa une nipo maloŵe gangu gakutama mwa jemanja, ni kuti timciŵenda cilicose cimkucisosa, nipo timcicipocela.

⁸ Naga jemanja msogwele yisogosi yejinji, tiyicilosya kuti mli ŵakulijiganya* ŵangu, myoyo lumbili lwa Atati ŵangu tiluciwonecela.

⁹ Mpela Atati anonyele une, myoyo soni une nanonyele jemanja. Mtameje mu cinonyelo canguco.

¹⁰ Naga mkupikanila malamusi gangu, tinjipitilisya kumnonyela jemanja, mpela mundendele une pakupikanila malamusi ga Atati ŵangu, nipo akupitilisya kunonyela.

¹¹ “Nimsalile ayi kuti lukondwa lwangu luŵe mwa jemanja ni soni kuti lukondwa lwenu luŵe lwekwanile.

¹² Lilamusi lyangu ni ali lyakuti: Mnonyelaneje jwine ni mjakwe, mpela une mungusinamnonyelela jemanja.

¹³ Cinonyelo cekulungwa cele mundu kukomboleka kola kwa acimjakwe cili kupeleka umi wakwe kwa jemanjajo.

¹⁴ Jemanja mli acimjangu naga mkusatendaga yele yinamlamulile kuti myitendeje.

¹⁵ Ngangumkolanga jemanja kuti mli ŵakutumicila, ligongo jwakutumicila jwangamanyilila cele cakutenda ambujegwe. Myoyo, ngumkolanga jemanja kuti ŵakutumicila nambo ngumkolanga kuti acimjangu ligongo nimsalile yosope yimbikene kutyocela kwa Atati ŵangu.

¹⁶ Jemanja nganimusagula une; Une ni junamsagwile jemanja kuti mjawule ni mkasogole yisogosi yejinji, yele yili yakutamilisya. Myoyo Atati tacimpa yiliyose yitimwaŵende mu lina lyangu.

¹⁷ Myoyo, lilamusi lyangu kwa jemanja ni ali: anonyelaneje jwine ni mjakwe.

Ŵandu ŵa cilambo capasi tacimŵenga jemanja

¹⁸ “Naga ŵandu ŵa cilambo capasi akumŵenga jemanja mgambeje kukumbucila kuti ŵatandite kumbenga une.

¹⁹ Yikaŵe kuti jemanja mli ŵa pacilambo capasi, ŵanduwo akamnonyele mpela acimjawo. Nambo une namsagwile jemanja kumtyosya pasikati pawo, nipo nganaŵa acimjenu, ni ligongo lyakwe akumŵenga.

²⁰ Mkumbucile maloŵe ginasalile gakuti: ‘Ŵamasengo ŵangapunda ambuje ŵakwe.’ Naga ŵandu ŵasawisye une, tacimsawusya jemanja soni, nambo naga ŵapikanile maloŵe gangu, tacimpikanila soni maloŵe genu.

²¹ Nambo jemanjajo tacitenda yosope yakumsawusya jemanjayi ligongo mli ŵa une, pakuŵa jemanjajo ngakwamanyilila ŵele ŵiŵandumile une.

²² Yikaŵe kuti nganimbika ni kuŵeceta nawo, ngamkanakola ulemwa,* nambo muyiŵelelemu, ngaŵa mkukana kuti nganamanyilila kuti yiŵatasileyo yaliji ya ulemwa.

²³ Jwalijose jwakumbenga une akwaŵenga soni Atati ŵangu.

²⁴ Jemanjajo ngamkanimkola ulemwa yikaŵe kuti, nganindenda yakusimonjesya pasikati penu yimkanayitendeje jwalijose citandilile, nambo muyiŵelelemu, ngati ŵayiweni yinayitesile une, nipo akutuŵenga wosope uwe Atati ŵangu ni une jwakwe.

²⁵ Myoyopeyo, ayi yaŵajilwe kuwoneka kuti yitendece yiyalembedwe m'buku ja Malamusi yakuti: ‘Ŵagambile kumbenga pangali ligongo kose.’

²⁶ “Nambo pana jwele jwakolanjidwa kuti Jwakukamucisya jutinjimtumicisya kutyocela kwa Atati. Jwakukamucisyajo ni Msimu wa yakuwona, wakutyocela mwa Atati. Jwalakwejo pitaciyika tacindendela une umboni.”

²⁷ Jemanja nombe nawo timcindendela une umboni ligongo mwatemi ni une kutandila pandanda.