Yohana 14 - Chiyawo Bible

Yesu ali litala lya kwa Atati

¹ Yesu* ŵasalile ŵakulijiganya* ŵakwe kuti, “Mitima jawo jikalagaga mnope, akulupilile mwa Mlungu nipo soni akulupilile mwa une.

² M'nyumba ja Atati ŵangu mwana malo gejinji, ni ngwawula kukumlinganyicisya malo jemanja. Yikaŵe kuti nganiyiŵa myoyo, ngamkaninamsalila yeleyi.

³ Patinjawule kuja kukumlinganyicisya jemanja malo, tinjiwuja nipo tinjajigalila kwa une namsyene kuti akatame kungutama une.

⁴ Jemanja mkulimanyilila litala lyakwawula kumalo kungwawula une.”

⁵ Tomasi* ŵawusisye kuti, “Ambuje, uwe ngatukukumanyilila kwakwawula wawojo, ni mpaka tupakombole camtuli kulimanyilila litala lyakuja kuyicila kweleko?”

⁶ Yesu ŵamjanjile kuti, “Une ndili litala, usyesyene, ni umi, pangali mundu jwakwawula kwa Atati akaŵe kupitila mwa une basi.”

⁷ Jwalakwe ŵasalile ŵakulijiganyawo kuti, “Pakuŵa jemanja sambano mumanyilile une, timcamanyilila Atati ŵangu soni, nipo kutandilaga sambano jino mpaka pasogolo jemanja akwamanyilila soni ŵaweni.”

⁸ Filipi ŵatite kwa Yesu, “Ambuje, atulosye uwe Atati ŵawowo, uwe yeleyo ni yitukusosa.”

⁹ Yesu ŵajanjile kuti, “Une mbele ndili ni jemanja wosope kwa ndaŵi jelewu, ni mosopemo ngamkumanyilila une Filipi? Mundu jwambweni une ŵaweni soni Atati. Nambi ligongo cici mkuŵeceta kuti, ‘Atulosye Atati’?

¹⁰ Ana Filipi ngamkukulupilila kuti Atati alumbikene ni une nipo une lumbikene ni Atati? Yesu ŵaŵecete kwa ŵakulijiganya ŵakwe kuti, maloŵe gimbecete ni jemanja, ngagakutyocela kwa une jikape iyayi. Atati, ŵakusatamaga mwa une ni ŵakupanganya gele masengo gakwega.”

¹¹ Angulupilile une yingwasalilayi kuti une lumbikene ni Atati nipo Atati alumbikene ni une. Naga ngakukulupilila yinguŵecetayi, akulupilile ligongo lya yindu yindesileyi.

¹² Une ngwasalila jemanja yakuwona: ŵele ŵakukulupilila mwa une tacitenda yindu yakusimonjesya mpela yingutenda une jemanjajotu taciyitenda atamose yindu yakupunda yeleyi ligongo une ngwawula kwa Atati ŵangu.

¹³ Nipo tinjitenda cilicose citaciŵenda mu lina lyangu, mwakuti lumbili lwa Atati tiluciwoneka kupitila mwa Mwanace.

¹⁴ Naga akuŵenda cilicose mu lina lyangu, une tinjicitenda.

Cilanga ca Msimu Ŵaswela

¹⁵ “Naga jemanja akunonyela une, tacigapikanila malamusi gangu.

¹⁶ Une tinjaŵenda Atati, nipo tacimpa Namangoswe jwine, jutaciŵa ni jemanja mpaka kalakala.

¹⁷ Namangoswejo ni Msimu jutaciwumbula yakuwona ya Mlungu. Ŵandu ŵa cilambo capasi ngaŵa mkupakombola kumpocela jwalakwe, ligongo ngaŵa mkupakombola kumwona kapena kum'manyilila. Nambo jemanja mkum'manyilila, ligongo akutama ni jemanja nipo taciŵa mkati mwa jemanja.

¹⁸ “Pitinjawule ngasinaleka kuŵa jika ŵangali ŵakumkamucisya, une timbice soni kwa jemanja.

¹⁹ Mwa ndaŵi japanandi ŵandu ŵa cilambo capasi ngasambona soni une, nambo jemanja timcimbona, nipo pakuŵa une ndili umi sambano, jemanja soni timcikola umi.

²⁰ Pitiliciyika lyele lisikulyo, jemanja timcimanyilila kuti une lumbikene na Atati ŵangu nipo kuti jemanja mlumbikene ni une, mpela mulumbikanile une ni jemanja.

²¹ “Ŵele ŵakupikanila ni kutenda yinalamwile kuti ayitende jemanjajo ni ŵakunonyela une. Myoyo Atati ŵangu tacanonyela ŵele ŵakunonyela unejiwo, une soni tinjanonyela jemanjajo ni kuliwonesya namsyene kwa ŵelewo.”

²² Yudasi (jwine ngaŵa Yudasi Isikaliyoti)* ŵatite, “Ambuje, tiyikombolece camtuli kuti wawojo taciliwonesya asyene kwa uwepe nambo ngaŵa kwa ŵandu ŵa cilambo capasi?”

²³ Yesu ŵamjanjile kuti, “Jwakunonyela une taciyitenda yindu yinamlamwile kuti ayitende. Atati ŵangu tacimnonyela, nipo Atati ŵangu pamo ni une tuciyika kwa jwalakwe ni kutamaga ni jwalakwe.

²⁴ Jwele jwakakunonyela une jwangapikanila ni kuyitenda yele yingumlamula kuti ayitende. Nipo maloŵe gimgapikene jemanja kutyocela kwa une nganigaŵa nganisyo sya une namsyene iyayi, nambo gakutyocela kwa Atati, ŵiŵandumisye une.

²⁵ “Mbecete gele maloŵega kwa jemanja pindili ciŵela yalumo ni jemanja.

²⁶ Namangoswe, jwali Msimu Ŵaswela, jutacimtumisya Atati mu lina lyangu, tacajiganya jemanjajo cilicose ni kwakumbusya yosope yene yinasalile jemanjajo.

²⁷ “Mtendele ni ungumlecela jemanja, mtendele wakwe wa une namsyene ni ungwapa. Nganguwupeleka mpela mwakupelecela ŵandu wa cilambo capasi. Akasadandawula ni kulaga pa yindu yitiyitendece, akatenda woga uliwose.

²⁸ Jemanja ŵambikene une ndili mkwasalila kuti, ‘Ngutyoka, nambo tinjiyika soni kwa jemanja.’ Yikaŵe kuti jemanja akunonyela une, jemanja akaliji ŵakusangalala kuti ngwawula kwa Atati, pakuŵa Atati ali ŵakulungwa kumbunda une.

²⁹ Une nasalile cile yeleyi jemanja mkaniyitendece, kuti patiyicitendekapo, jemanja tacikulupilila.

³⁰ Nganapakombola kuŵeceta ni jemanja kwakupitilisya mnope, ligongo jwakulamula jwa cilambo capasi ali mkwisa. Jwelejo ngaŵa mkupakombola kundamula une.

³¹ Nambo ŵandu ŵa cilambo capasi akuŵajilwa kumanyilila kuti une ngwanonyela Atati, ni ligongo lyakwe ngasindendaga cilicose mpela mwakundamulila une kuti nacitende. Ajimuce, kwende tutyoce apano tujawuleje.