Yohana 13 - Chiyawo Bible

Yesu ŵacapile sajo sya ŵakulijiganya ŵakwe

¹ Lyaliji lisiku lyakuti Cindimba ca Pasaka* caliji mkaniciyice ni piŵamanyilile Yesu* kuti ndaŵi jakuti jwalakwe atyoce pa cilambo capasi ni kwawula kwa Atati ŵakwe jakwanile. Jwalakwe ndaŵi syosope pa cilambo capasi pano ŵanonyele ŵandu ŵiŵamkulupilile, nipo ŵanonyele mpaka pa mbesi pa umi wakwe.

² Yesu ni ŵakulijiganya* ŵakwe ŵaliji mkulya pamo ligulo. Satana* ŵatendesye Yudasi, mwanace jwa Simoni* Isikaliyoti kuti akole nganisyo syakumpeleka Yesu.

³ Yesu ŵamanyilile kuti Atati ŵakwe ŵampele macili gosope gene, jwalakwe ŵamanyilile kuti ŵatyocele kwa Mlungu nipo ŵaliji mkwawula kwa Mlungu.

⁴ Myoyo Yesu ŵajimi ni ŵawusile mkanjo wakwe, ni ŵataŵile mciwunu mwakwe nguwo jakupukutila.

⁵ Kaneko ŵatasile mesi mwibeseni ni kutanda kucapa sajo sya ŵakulijiganya ŵala ni kwapukuta ni nguwo jiŵawete mciwunu jila.

⁶ Yesu ŵayice kwa Simoni Petulo,* juŵamwusisye kuti, “Ambuje, ana akusosa kucapa sajo syangu?”

⁷ Yesu ŵamjanjile kuti, “Wawo ngakumanyilila pa sambano jino yingutenda une, nambo tacipikana cenene pasogolo pakwe pa yele yinduyi.”

⁸ Petulo ŵajanjile kuti, “Ngasiyikomboleka mu ndaŵi jilijosejo kuti wawo tacape sajo syangu!” Yesu ŵajanjile kuti, “Naga nganjapa kose sajo syawo, wawojo ngasaŵa soni jwakulijiganya jwangu.”

⁹ Simoni Petulo ŵajanjile kuti, “Ambuje, naga myoyo ni akagamba kunjapa sajopesyo iyayi! Nambo acape magasa gangu ni mtwe wakwe soni!”

¹⁰ Yesu ŵajanjile kuti, “Ŵandu ŵajosile akuŵa ali aswejele mnope nipo ŵangalajila soni kulicapa acimsyene, nambo akasagamba kulicapa sajope basi. Jemanja wosope aswejele nditu, nambo jumope jwa jemanja nganaswejela.”

¹¹ (Yesu ŵaliji ali am'manyilile kala jutacimpeleka jwakwe, ni ligongo lyakwe ŵatite kuti, “Jemanja wosope aswejele, nambo jumope jwa jemanja nganaswejela.”)

¹² Yesu piŵacapile sajo syawo sila, ŵawete mkanjo wakwe ula soni ni kuwujila kuja kutama pa malo pakwe piŵalilaga yakulya pala. Kaneko jwalakwe ŵawusisye kuti, “Nambo akumanyilila gopolela kwa yele yindu yingambile kuyitendayi?”

¹³ Jemanja akasangolangaga une kuti Mwalimu ni Ambuje, nipo akulondola cenene pakungolangaga myoyo, pakuŵa yakungolangayi ni une jwene.

¹⁴ Myoyo une jundili Ambuje ŵawo ni Mwalimu jwawo, ngambile kucapa sampanoji sajo syawo. Jemanja nombe nawo soni akuŵajilwa kucapa sajo sya acimjawo.

¹⁵ Une napele jemanja cisyasyo, kuti nombe nawo tacitenda soni mpela yinatendele une.

¹⁶ Une ngumsalila jemanja yakuwona kuti: pangali acikapolo ŵakusaŵa ni ulamusi wakwapunda ambuje wawo, nipo soni jwakutumidwa ngaŵa kumpunda mkutumajo.

¹⁷ Pakuŵapo sambano jemanja amanyilile kuti yimbecete uneyi yili yakuwona, tacilupata lukondwa lwawo naga ayitendeje yele yinduyo.

¹⁸ “Une nganguŵeceta ya jemanja wosope iyayi, ngwamanyilila cenenepe ŵandu ŵinasagwile. Nambo yikuŵajilwa kutendeka yigakusala Malemba kuti, ‘Mundu junagaŵene najo mkate wangu ŵanjimucile.’

¹⁹ Ngwasalila cile jemanja ya yeleyi mkaniyitendece, kuti patiyicitendekaga, tacikulupilila kuti ‘Une ni Jundili.’

²⁰ Une ngwasalila jemanja yakuwona kuti: mundu jwakumpocela jwalijose jungumtumisya une akumbocela soni une, nipo mundu jwakumbocela une akwapocela ŵele ŵiŵandumile une.”

Yesu akulocesya ya ndaŵi jitacipelecedwa kwa amagongo ŵakwe

²¹ Yesu ali aŵecete yeleyi, ŵalasile mnope mu mtima nipo ŵaŵecete mwangasisa kuti, “Ngumsalila jemanja yakuwona kuti: jumo jwa jemanja tambelece kwa amagongo.”

²² Ŵakulijiganya ŵala ŵalolegene jwine ni mjakwe, ali ŵakusimonga mnope ya mundu jusyesyene juŵamgambaga Yesu.

²³ Jumo jwa ŵakulijiganya ŵala juŵamnonyelaga Yesu mnope jula, ŵatemi ku mkono ŵa mlyo ŵa Yesu.

²⁴ Simoni Petulo ŵamkodwele jwelejo ni kumsalila kuti, “Mwawusye Ambujewo jwakumgamba.”

²⁵ Myoyo jwakulijiganyajo ŵasejelele kwa Yesu ni kumwusya kuti, “Ambuje, ana akwagamba ŵani?”

²⁶ Yesu ŵajanjile kuti, “Tindoŵece mkate mu msusi, ni kuwupeleka kwa jwalakwejo, jutinampejo ni jujojo.” Myoyo ŵajigele mkate, ni kupamba mu msusi, kaneko ŵawupelece kwa Yudasi, mwanace jwa Simoni Isikaliyoti.

²⁷ Ndaŵi jijojo ali nalya pejo Yudasi mkatewo, Satana ŵatandite kwalamulila. Yesu ŵamsalile kuti, “Janguyani kutenda yimkusosa kuyitendayo!”

²⁸ Mwa ŵandu ŵiŵatemi piŵalyaga yakulyapo pangali jumo juŵapikanicisye ligongo lyakwe liŵaŵecetele yeleyi Yesu kwa Yudasi.

²⁹ Pakuŵa Yudasi ŵaliji jwakusunga msaku wa mbiya, ŵakulijiganya ŵane ŵaganisyaga kuti Yesu ŵamtumile kuti ajawule akasume yiŵayisosaga jemanjajo kupanganyicisya masengo pa cindimbapo, kapena kuti ŵape yindu ŵandu ŵakulaga.

³⁰ Yudasi ŵapocele mkate kala nipo ndaŵi jijojo ŵakopwece pasa. Celeci caliji cilo.

Lilamusi lya sambano

³¹ Yudasi ali atyosile, Yesu ŵatite kuti, “Sambano ŵandu taciluwona lumbili lwa Mwanace jwa Mundu,* sambano ŵandu taciluwona lumbili lwa Mlungu kupitila mwa jwalakwe.

³² Nipo naga ŵandu taciluwona lumbili lwa Mlungu kupitila mwa jwalakwe, myoyo Mlungu tacilosya lumbili lwa Mwanace jwa Mundu mwa jwalakwe msyene, nipo tacilulosya lumbililo mwangakaŵa.

³³ Ŵanace ŵangu, tindame namwe kwa ndaŵi japanandipe basi. Jemanja timcindolesyaga une, nambo sambano ngumsalila yinasalile acakulungwa ŵa Ayuda* kuti, ‘Jemanja ngaŵa mkupakombola kwawula kungwawula une iyayi.’

³⁴ Nipo sambano une ngumpa jemanja lilamusi lyasambano lyakuti: Mnonyelaneje jwine ni mjakwe. Mpela munanonyele une mula, jemanja akuŵajilwa soni kuti anonyelaneje jwine ni mjakwe.

³⁵ Naga mkunonyelana jwine ni mjakwe, pelepo ŵandu wosope tacimanyilila kuti jemanja mli ŵakulijiganya ŵangu.”

Yesu akuŵecetela cile yakuti Petulo tacimkana jwalakwejo

³⁶ Simoni Petulo ŵamwusisye jwalakwe kuti, “Ana akwawula kwapi Ambuje?” Yesu ŵamjanjile kuti, “Wawo ngaŵa mkupakombola kunguya kungwawula une sambano jino, nambo pasogolo pakwe tacinguya.”

³⁷ Petulo ŵajanjile kuti, “Ambuje, ligongo cici une ngaŵa mkupakombola kwakuya wawojo sambano jino, unetu ndili cile kuti mbwe m'malo mwa wawo!”

³⁸ Yesu ŵamjanjile kuti, “Wawo akupakombola camtuli kuŵeceta kuti ali cile kuwa m'malo mwa une? Une ngwasalila wawojo yakuwona kuti: tambala mkanatongole wawo taciŵeceta katatu kuti ngakumanyilila une.”