Yohana 10 - Chiyawo Bible

Citagu ca jwakucinga ngondolo

¹ Yesu* ŵatite kuti, “Une ngumsalila jemanja yakuwona: kuti mundu jwakwinjila mwicinga lya ngondolo ni ngapitila pa mlango, nambo kwinjila pa kwelela pane palipose, jwelejo ni mundu jwawiyi soni jwalukwakula.

² Mundu jwakwinjila kupitila pa mlango ni mkucinga ngondolosyo.

³ Mlonda jwa pa mlango akusamwugulilaga jwalakwejo, ngondolo syakwesyo sikasapikana maloŵe gakwe pakusiŵilanga mena gakwe jimojimo, nipo akusasilongolelaga pakopoka pasa.

⁴ Pati asikopwesye ngondolosyo pasa, akasajawulaga pasogolo pakwe, nipo sikasisimkuyaga, ligongo sikugamanyila maloŵe gakwe.

⁵ Ngasisimkuya jwine jwalijose, m'malo mwakwe, ticisimtila jwamti myoyojo ligongo ngasikumanyilila maloŵe gakwe.”

⁶ Yesu ŵasalile jemanjajo cele citaguci, nambo jemanjajo nganamanyilila kose yiŵasosaga kwasalilayo.

Yesu mkucinga jwambone

⁷ Myoyo Yesu ŵaŵecete soni kaŵili kuti, “Une ngumsalila jemanja yakuwona: Une ndili mlango wa ngondolo.

⁸ Wosope ŵene ŵiŵayice kala une mkanimbice ali ŵawiyi nipo ŵalukwakula, nambo soni ngondolo nganisyapikanila.

⁹ Une ni mlango. Jwalijose jwakwinjila kupitila mwa une tacikulupuka, tacijinjila ni kopoka nipo taciyisimana yakulya.

¹⁰ Jwawiyi akasagambaga kwika kuti ajiŵe, kuwulaga ni konanga. Une mbice kuti jemanja mkole umi, umi wakwe wapawinji.

¹¹ “Une ndili mkucinga jwambone, jwakulipeleka kuti mbwe ligongo lya ngondolo.

¹² Mundu jwaganyu, jumkinigaŵa masengo gakwe gakuciga soni jumkanisiŵa syakwe ngondolo, pati aliweni lisogo lilimkwisa, papopo akusasileka ngondolosyo ni kutila, myoyo lisogo lila likusakamulaga jimo, sine sila ni kupwilingana.

¹³ Mundu jwakulembedwa masengojo akusatilaga myoyo ligongo agambile kukulupilila kulembedwa masengo peko basi nipo nganakola nayo masengo ya ngondolosyo.

^14-15 Une ndili mkucinga jwambone. Mpela Atati akumanyilila une nipo soni une ngwamanyilila Atati, yalumo soni une ngusimanyilila ngondolo syangu nombe nasyo sikumanyilila une. Nipo une ngulipeleka kuti mbwe ligongo lya ngondolosyo.

¹⁶ Sipali ngondolo sine syasili syangu simkanisiŵa mwicingamu. Une nguŵajilwa kusisonganya nombe nasyo, nipo tisicipikana maloŵe gangu, nipo tipaciŵa likuga limo ni mkucinga jumo.

¹⁷ “Atati ŵangu akunonyela une ligongo ngulipeleka namsyene kuti mbwe, ni cakulinga cakuti mbe jwa umi soni.

¹⁸ Pangali jwalijose jutacindyocesya umi wangu. Une namsyene ni jungukunda kuti ambulaje. Ngwete macili gakukunda kuti ambulaje, nipo ngwete macili gakupakombola kuŵa jwa umi soni. Napocele kwa Atati ŵangu lyele lilamusili kuti une nayitende yeleyi.”

¹⁹ Ayuda ŵasisyene soni acimsyenepe ligongo lya gele maloŵe ga Yesugo.

²⁰ Ŵandu ŵajinji mwa jemanjajo ŵatite, “Jweleju akwete msimu wakusakala! Myoyo jweleju jwa masoka! Ligongo cici akumpikanila jwalakweju?”

²¹ Nambo ŵane ŵatite, “Mundu jwakwete msimu wakusakala ngaŵa mkupakombola kuŵeceta camti myiyi! Ana msimu ŵakusakala kuŵa mkupakombola kuwugula m'meso ŵandu ŵangalola?”

Ŵandu ŵamkanile Yesu

²² Ku Yelusalemu kwaliji kwana cindimba ca ndaŵi jakukumbucila kupelecedwa soni kwa Nyumba ja AMBUJE. Jaliji ndaŵi jakusisima.

²³ Yesu ŵaliji mkwendajenda mu Nyumba ja AMBUJE mwipenu lyakolanjidwa Lipenu lya Solomoni.

²⁴ Ŵandu ŵane ŵasongene ni kumsyungulila nipo ŵamwusisye kuti, “Ana tagambe kutuleka tuli mkusimongape mpaka cakaci? Atusalile mwakupikanika cenene yakuwona yisyesyene: ana wawojo ali Klistu* jula?”

²⁵ Yesu ŵajanjile kuti, “Une namsalile kala jemanja, nambo nganasaka kungulupilila. Yindu yinguyitenda peyo mwamacili ga Atati ŵangu yikundendela une umboni.

²⁶ Nambo jemanja ngamkukulupilila, pakuŵa nganimŵa ngondolo syangu.

²⁷ Ngondolo syangu sikusapikana maloŵe gangu, une ngasasimanyililaga, nipo sikusanguyaga.

²⁸ Une ngusapelekaga umi wangamala* kwa ŵakunguya ŵangu, nipo ngasawa kose. Pangali jwakupakombola kusumula une ŵakunguya ŵanguwo.

²⁹ Atati ŵangu ŵiŵambele une ŵanduwo ali ŵakulungwa kupunda yosope yene, nipo pangali jwalijose jwakupakombola kusumula ŵele ŵanduwo kwa Atati ŵakwasamalila jemanjajo.

³⁰ Atati ni une tuli ŵakulumbikana yalumo mpela mundu jumo.”

³¹ Myoyo Ayuda ŵalokotenye soni maganga kuti amponye Yesu.

³² Yesu ŵawusisye kuti, “Une mbanganyisye masengo gambone gamajinji gimgaweni jemanja giŵasalile Atati ŵangu kuti nagatende, ana mwa gele masengo gambonega gapi gamkusosela kumbonya nago une maganga kuti mbwe?”

³³ Ayuda ŵala ŵajanjile kuti, “Uwe ngatukusosa kwasoma wawojo maganga ligongo lya masengo galigose gambone iyayi, nambo ligongo lyakuti wawojo akumlemwecesya Mlungu! Wawo agambile kuŵa mundu wamba, nambo akulinga kulitenda Mlungu wawo asyenepe!”

³⁴ Yesu ŵajanjile kuti, “Ana ngati yilembedwe m'Malamusi ga jemanja kuti Mlungu ŵatite, ‘Jemanja mli milungu.’

³⁵ Tukumanyilila kuti yigakuŵeceta Malemba yili yakuwona mpaka kalakala, nipo Mlungu ŵakolasile ŵele ŵanduwo milungu. Ŵeleŵa ni ŵandu ŵiŵapele maloŵe ga Mlungu.

³⁶ Kwamba ya une, Atati ŵasagulile une ku gele masengoga nipo ŵandumisye ku cilambo capasi. Sambano jemanja akupakombola camtuli kuŵeceta kuti une ngumlemwecesya Mlungu pa ligongo lyakuti naŵecete kuti une ndili Mwanace jwa Mlungu?

³⁷ Myoyotu mkangulupilila une naga ngangutenda yindu yakusosa Atati ŵangu kuti nayitende.

³⁸ Nambo naga nguyitenda, atamose jemanja ngamkungulupilila une, nambope akulupilile yitendo yanguyo, pakusosa kuti jemanja m'manyilile kuti Atati ali mwa une ni kuti une ndili mwa Atati.”

³⁹ Papopo Ayuda ŵala ŵasakaga kumkamula nambo jwalakwejo ŵalikulupwisye.

⁴⁰ Myoyo Yesu ŵawujile soni pesi pa Lusulo lwa Yolodani kumalo kwele Yohane* ŵaliji mkwabatisya ŵandu pandanda kula, nipo ŵatemi kukoko.

⁴¹ Ŵandu ŵajinji ŵayice kwa jwalakwejo, ni ŵatite kuti, “Yohane nganatendaga yindu yakumasya lunda, nambo yosope yiŵaŵecete yakwamba mundu aju yaliji yakuwona.”

⁴² Ŵandu ŵajinji ŵamkulupilile Yesu kweleko.