Yohana 1 - Chiyawo Bible

Liloŵe lya Umi

¹ Pandanda lyapali Liloŵe, Liloŵe lyaliji ni Mlungu, Liloŵelyo lyaliji Mlungu.

² Kutandila pandanda pasyesyene Liloŵe lyaliji ni Mlungu.

³ Mlungu ŵapanganyisye yindu yosope yene kupitila mwa jwalakwe, mwa yiwumbe yosopeyi pangali cindu cimo ciŵacipanganyisye pangali jwalakwe.

⁴ Liloŵe lyaliji ndande ja umi, ni wele umiwo ni uwayice ni lilanguka kwa ŵandu.

⁵ Lilangukalyo likusaŵalaga mcipi, ni cipico ngaŵa mkulisimisya lilangukalyo.

⁶ Mlungu ŵamtumisye jwa mtenga jwakwe, lina lyakwe Yohane,*

⁷ juŵayice kukwasalila ŵandu ya lilangukalyo, ni kuti wosope awupikane utengawo ni kuwukulupilila.

⁸ Jwalakwe msyene nganaŵa lilanguka, nambo ŵayice kukusala ya lilangukalyo.

⁹ Ali ni lilanguka lisyesyene, lilanguka lyalikwisa mcilambo capasi ni kumulicilaga pa jwalijose.

¹⁰ Liloŵe lyaliji mcilambo capasi, ni atamose Mlungu ŵapanganyisye cilambo capasi kupitila mwa jwalakwe, nambope cilambo capasi nganicim'manyilila jwalakwe.

¹¹ Jwalakwe ŵayice ku cilambo cakwe, nambo ŵandu ŵakwe ŵene nganampocela.

¹² Nambope, ŵane ŵampocele ni ŵakulupilile mwa jwalakwe, myoyo kwa ŵelewo jwalakwe ŵapele macili gakuŵa ŵanace ŵa Mlungu.

¹³ Jemanjajo ngaŵa kuti ŵaŵele ŵanace ŵa Mlungu mwa matala gakupagwila ŵandu, mpela ŵanace ŵakwete acatati ŵawo iyayi. Mlungu msyene ni juŵaliji atati ŵawo.

¹⁴ Liloŵe lyaŵele mundu, ni ŵatemi pasikati petu. Twaluweni lumbili lwakwe, lumbili luŵalupocele mpela mwanace jumope jwa Atati. Mwa jwelejo ŵatulosisye umbone mtima wa Mlungu ni usyesyene.

¹⁵ Yohane ŵaŵecete ya jwalakwe. Ŵagumisile kuti, “Aju ni junaŵecetaga ya jwalakwe pinatiji pala kuti, ‘Jwalakwe akwisa panyuma pangu, nambo ali jwamkulungwa kumbunda une, ligongo jwalakwe ŵapali une mkanimbagwe.’ ”

¹⁶ Mwa kugumbala kwa umbone mtima wakwe atupele uwe wosope ŵene upile, wakuyana ni upile ujakwe.

¹⁷ Mlungu ŵapelece Malamusi kupitila mwa Mose,* nambo umbone mtima ni usyesyene yayice kupitila mwa Yesu Klistu.

¹⁸ Kutandilila kalakala pangali atamose jumo juŵam'weni Mlungu, akaŵe Mwanace jumo pejo, jwali jwakulandana ni Mlungu soni ali pakuŵandikana ni Atatigwe, ni jwamtendesye kuti Mlungujo amanyice.

Utenga wa Yohane M'batisi

¹⁹ Acakulungwa ŵa Ciyuda ŵa m'Yelusalemu ŵatumile ŵakutaga mbopesi ŵane ni Alefi kwa Yohane, kukumwusya kuti, “Ana wawo ŵani?”

²⁰ Yohane ŵajitice nganakana, nambo ŵaŵecete mwangasisa ni mwakupikanika, kuti: “Une nganimba Klistu.”

²¹ Jemanjajo ŵamwusisye kuti, “Nambi sambano wawo ŵani? Ana wawo Eliya?”* Yohane ŵajanjile kuti, “Iyayi, ngaŵa une.” Jemanjajo ŵawusisye kuti, “Ana wawo ŵakulocesya?” Jwalakwe ŵajanjile kuti, “Iyayi.”

²² Jemanjajo ŵatite kuti, “Atusaliletu ana ŵalakwe ŵani? Tukusosa tujigale yisyesyene kuti tukasalile ŵatutumile uwewo. Ana cici citasale cakwayana ni ya wawojo asyene?”

²³ Yohane ŵajanjile pakugakuya malemba ga jwakulocesya* Yesaya gakuti: “Une ni ‘liloŵe lya jwine jwakwe jwakugumila mcipululu: akusala kuti, Kolosyani litala lyakupita Ambuje!’ ”

²⁴ Ŵamitenga, ŵiŵatumidwe ni Afalisi* ŵala,

²⁵ ŵamwusisye Yohane kuti, “Naga nganimŵa Klistu, kapena Eliya, kapena Jwakulocesya, ligongo cici mkubatisya?”

²⁶ Yohane ŵajanjile kuti, “Une ngumbatisya ni mesi, nambo pasikati penu pajimi jumo jungakum'manyilila.

²⁷ Jwalakwe akwisa panyuma pangu, nambo nganguŵajilwa amta panandi kugopola ngonji sya sapato syakwe.”

²⁸ Ayi yosopeyi yatendekwe m'Betaniya kungopoko lyuŵa kwa Lusulo lwa Yolodani, kuŵabatisyaga Yohane.

Mwanace jwa Ngondolo ja Mlungu

²⁹ Kundaŵi kwakwe Yohane ŵam'weni Yesu ali mkwisa kwa jwalakwe, ni ŵatite kuti, “Aju ni Mwanace Jwangondolo jwa Mlungu, jwakutyosya ulemwa* wa cilambo capasi!

³⁰ Jweleju ni junagambaga jula pinaŵecetaga kuti, ‘Mundu akwisa panyuma pa une, nambo ali jwamkulungwa kupunda une, ligongo jwalakwe ŵapali une mkanimbagwe.’

³¹ Une nganimanyilila kuti taciŵa jwamti uli, nambo nayice kukubatisya ni mesi kuti nimtendekasye jwalakwe amanyice kwa ŵandu ŵa Isalaeli.”

³² Yohane ni ŵapelece awu umboniwu wakuti: “Naweni Msimu ali mkutuluka kutyocela kwinani mpela ngunda ni kutama pa jwalakwe.

³³ Une naliji jwangamanyililape kuti ŵaliji jwelejo, nambo Mlungu, ŵiŵandumisye une kukubatisya ni mesi, ŵaliji ali asalile une kuti, ‘Timciwuwona Msimu uli mkutuluka ni kutama pa mundu, jwelejo ni jwakasabatisyaga ni Msimu Ŵaswela.’

³⁴ Yohane ŵatite kuti, ‘Une nayiweni ayi yili mkutendedwa nipo ngutendela umboni kuti jwalakweju ali Mwanace jwa Mlungu.’ ”

Ŵakulijiganya ŵandanda ŵa Yesu

³⁵ Kundaŵi kwakwe Yohane ŵaliji ali ajimi pa malo palapala, pampepe ni ŵakulijiganya* ŵakwe ŵaŵili.

³⁶ Piŵam'weni Yesu* ali mkwenda, Yohanejo jwatite kuti, “Mlole, Mwanace Jwangondolo jwa Mlungu.”

³⁷ Ŵakulijiganya ŵaŵili ŵala piŵagapikene maloŵego, ŵamkuyisye Yesujo.

³⁸ Yesu piŵagalawice ŵaweni kuti jemanja jila akumkuya, nipo ŵawusisye kuti, “Ana mkusaka cici?” Jemanjajo ŵajanjile kuti, “Labi,* ana akutama kwapi?” (Liloŵe lyakuti “Labi” ligopolela kuti, “Cemwalimu”.)

³⁹ Yesu ŵajanjile kuti, “Ayice akakuwone.” (Jeleji jaliji ciŵandika 4 koloko ja ligulo.) Ni ŵalongene najo ni kukuwona kuŵatamaga, ni lisikulyo lyamalile ali najo yalumo.

⁴⁰ Jumo jwa jemanjajo ŵaliji Andileya,* mpwakwe jwa Petulo.*

⁴¹ Candanda ciŵatesile Andileya ni kuja kukwasimana akulu ŵawo Simoni* ni kwasalila kuti, “Uwe tumsimene Mesiya.”* (Liloŵeli kugopolela kwakwe ni kuti, “Klistu.”)

⁴² Kaneko Andileya ŵamjigalile Simoni kwa Yesu. Yesu ŵamlolite ni ŵatite kuti, “Wawo lina lyawo Simoni mwanace jwa Yohane, nambo tacikolanjidwa Kefa.” (Linali yalumo ni kuti Petulo,* gopolela kuti, “lwala.”)

Yesu akwaŵilanga Filipi ni Nataniyeli

⁴³ Kundaŵi kwakwe Yesu ŵaganisisye kuti ajawule ku Galileya. Jwalakwe ŵamsimene Filipi ni ŵasalile kuti, “Anguye une!”

⁴⁴ (Filipi ŵatyocelaga ku Betisaida, ku msinda kuŵatamaga Andileya ni Petulo.)

⁴⁵ Filipi ŵamsimene Nataniyeli ni ŵamsalile kuti, “Uwe tumsimene mundu jula juŵalembile Mose m'buku ja Malamusi ni ŵakulocesya ŵakwe soni ŵalembile ya jwalakwe. Jwalakwe ni Yesu mwanace jwa Yosefe, jwa ku Nasaleti.”

⁴⁶ Nataniyeli ŵawusisye kuti, “Ku Nasaleti mpaka kukopoce cilicose cambone?” Filipi ŵajanjile kuti, “Ayice alole.”

⁴⁷ Yesu piŵam'weni Nataniyeli ali mkwisa kwa jwalakwe, ŵaŵecete ya Nataniyelijo kuti, “Aju ni m'Isalaeli msyesyene, mwa jwalakwe mwangali unami!”

⁴⁸ Nataniyeli ŵamwusisye Yesu kuti, “Une amanyilile camtuli?” Yesu ŵajanjile, “Une naweni wawo ndaŵi jiŵaliji pasi pa citela ca mkuju pala mkanaŵilanjidwe ni Filipi.”

⁴⁹ Nataniyeli ŵajanjile kuti, “Mwalimu, wawo ni Mwanace jwa Mlungu! Soni mwenye jwa Isalaeli!”

⁵⁰ Yesu ŵatite, “Ana akukulupilila ligongo lyakuti nasalile kuti naweni ndaŵi jiŵaliji pasi pa citela ca mkuju? Taciyiwona yindu yayikulungwa yakupunda yeleyi!”

⁵¹ Ni ŵasalile jemanjajo kuti, “Une ngwasalila jemanja yakuwona kuti: tacikuwona kwinani kuli kuwugwice malayika* ga Mlungu gali mkukwela ni kutulucila pa Mwanace jwa Mundu.”*