Yobu 9 - Chiyawo Bible

Yobu

^1-2 Ngumanyilila kuti yeleyi yili yakuwona, nambi mundu mpaka aŵe uli jwakulungama pameso pa Mlungu?

³ Naga mundu jwine akusaka kusisyana ni Mlungu, jwele mundujo ngaŵa mkupakombola kusisyana najo, ligongo Mlungu akwete yiwusyo yejinji.

⁴ Mlungu ali jwalunda, soni ali jwamacili mnope; ana ŵani ŵa mpaka alimbane ni kumpunda jwalakwejo?

⁵ Jwalakwejo ni jwakusagatenganya matumbi, matumbigo ngamanyilila cilicose, pa ndaŵi jitacigajonanga jwalakwejo gelego.

⁶ Mlungu akusatenganya yilimbilimbi ya cilambo capasi, soni akusasitenda njalamila sya cilambo kuti sitetemele.

⁷ Mlungu akusalilamula lyuŵa kuti likakopoka kundaŵi, soni akusasilekasya ndondwa kuti sikaŵala cilo.

⁸ Mlungu jikape ni juŵapindimukwile ya kwiwunde, nipo jwalakwejo akusajenda pa matala pa panyasa.

⁹ Jwalakwejo ni juŵapanganyisye likuga lya ndondwa sya kumpoto, likuga lya ndondwa sya cilikati ni likuga line lya ndondwa sya kum'mwela.

¹⁰ Jwalakwejo akusatenda yindu yakumasya lunda, akusatenda yindu yakusimonjesya yangaŵalanjika.

¹¹ Mlungu naga ali apitile ciŵandika ni une, jwangamwona jwalakwejo. Naga akumbita une, jwangam'manyilila.

¹² Naga Mlungu akusumula cindu, pangali jwa mpaka amlekasye jwalakwejo. Pangali soni jwa mpaka amwusye Mlungu kuti, “Ana akutenda cici?”

¹³ Mlungu jwangalulekasya lutumbilo lwakwe, jwalakwe ŵajonasile amagongo ŵakwe ŵiŵakamusyanaga ni Lahabu.

¹⁴ Ana tinipakombole uli kupata maloŵe gakuti njanje mwakulicinjilicisya namsyene?

¹⁵ Atamose kuti une ndili mundu jwangalemwa, ngakomboleka kwanga mwakulicinjilicisya namsyene. Ngwenela kuŵenda canasa kwa jwakunjimba une magambo.

¹⁶ Atamose kuti ngaŵilanje ŵalakwewo ni kunjitika, ngangukulupilila kuti ŵalakwewo akagapikene maloŵe gangu.

¹⁷ Jwalakwejo akusamba une yisawusyo mpela mbungo jamacili, akusambweteka ni maŵanga gejinji, nambo pali pangali ligongo lililyose.

¹⁸ Jwalakwe jwangangunda une kuti mbumule, m'malo mwakwe akusamba yisawusyo yejinji.

¹⁹ Naga kuli kulimbana, ni kuti Mlungu ali jwamacili mnope kumbunda une. Ana une mpaka sisyane ni Mlungu ku nganya ja magambo? Ana ŵani mpaka amjimbe jwalakwejo magambo?

²⁰ Atamose kuti ndili jwangalemwa, yakuŵeceta yangu yikomboleka kusisya une. Atamose kuti ndili jwangalemwa, tacisimana kuti ndili jwakulemwa.

²¹ Une ndili jwangalemwa, soni ngangusamala cilicose cakutendekwa kwa une, pakuti umi mbesile nawo.

²² Pangali soni cambone kwa une, ali ni ligongo lyakwe nguti, Mlungu akusiŵawulaga ŵandu ŵakusakala ni ŵambone ŵakwe.

²³ Pandaŵi jakuwa mwacisisimucisya mundu jwangalemwa, Mlungu akusiŵaseka ŵandu ŵangalemwawo pa ndaŵi jali pa yipwetesi.

²⁴ Mlungu naga akupeleka cilambo kwa mundu jwakulemwa kuti acilamulileje, jwalakwejo akusiŵasiŵa m'meso ŵakulamula ŵa cilambomo kuti akalamula mwa cilungamo. Naga ngaŵa Mlungu jwatesile yeleyi, nambi ni ŵani?

²⁵ Masiku gangu gakusawutuka mnope kumpunda mundu jwakuwutuka, mwakuti masiku gangugo gakusamala une ngaciwona cambone cilicose.

²⁶ Masiku ga umi wangu gakusamala mwacitema, mpela mucikusawutucila citotola pa kukamula nguku.

²⁷ AMBUJE,* naga ngwasalila ŵalakwe kuti ngasindandawula soni, ni kuti ngope jangu ngasijiŵa ja canasa nipo tinjisengwa.

²⁸ Nambo ngusakola woga kuti yisawusyo yangu yosope tiyiciyika soni pa une, pakuti ngumanyilila kuti Mlungu ngasajiticisya kuti une ndili jwangalemwa.

²⁹ Pakuti ŵalakwe ngasajila kuti une nganindemwa, nambi cakulisawucisya cici kulimbana ni wawo?

³⁰ Atamose kuti njoje ni sopo cilu cosope kuti naliswejesye,

³¹ Mlungu tacindwinyicisya pa matope, nipo yakuwala yangu timciyinyalapa mpela mwakusanyalapila une ŵandu ŵane.

³² Naga Mlungu akaŵe mundu mpela une, ni kuti tukajile kuŵeceta magambo getu pameso pa ŵakulamula.

³³ Pangali mundu jwampaka atujilanye uwe, jwamti mpaka alamule magambo sikati ja Mlungu ni une.

³⁴ Mlungu akamba une cilango, kogopela kuti tandendekasye une kuti njogopeje.

³⁵ Kaneko ngapakombwele kuŵeceta mwangamjogopa jwalakwejo, nambo ni muyiŵelelemu, ngaŵa mkomboleka kutenda cilicose.