Yobu 8 - Chiyawo Bible

Bilidadi

^1-2 Ana timŵeje mli kuŵeceta maloŵe gelega mpaka cakaci? Maloŵe genu gali gangali mate.

³ Mlungu jwangakotesya kulamula kwakwe; Ana Mlungu mpaka alepele kutenda yakulungama?

⁴ Komboleka kuti mwine mwakwe ŵanace ŵenu ŵamlemwecesye Mlungu, ali ni ligongo lyakwe Mlungu ŵapele jemanjajo cilango ligongo lya ulemwa wawo.

⁵ Mumsosejesoseje Mlungu Jwamaciligosope, ni kumŵenda jwalakwejo kuti amtendele canasa.

⁶ Naga mli ŵaswela mtima ni ŵakulungama, Mlungu tacimlolela. Tacimpa yindu yambone kuŵa mbote jenu.

⁷ Yipanje yimwakwete pandanda yaliji yapanandi, kulekanganya ni yipanje yitimcikola msogolo.

⁸ Sambano, ngumŵenda kuti mwusye kwa ŵandu ŵa ula syakala, ni mwungunye yiŵasimene nayo acinangolo ŵetu.

⁹ Umi wetu ukusaŵa wawujipi mwakuti ngatukusamanyilila kandu. Masiku getu pa cilambo capasi pano gakusapita mpela mucikusapitila ciwilili.

¹⁰ Ana ŵandu ŵa ula syakalawo ngaŵa kumjiganya, ni kumsalila lunda lwawolo?

¹¹ Ana litete ni magugu mpaka yimele cenene kumalo kwakuli kwangali mesi?

¹² Naga kwangali mesi, yeleyi yikusanyala yili yangakomala.

¹³ Amu ni mwakusatendela ŵandu ŵamliŵalile Mlungu. Ŵandu ŵangamjogopa Mlungu akusajonasika ali ŵangali cikulupi.

¹⁴ Kulimba mtima kwakwe kukusaŵa kwangali mate, yindu yakusayikulupililaga yili mpela ulusi wa lundandambuli.

¹⁵ Jwalakwejo akusajegama pa nyumba jakwe, nambo nyumbajo jikusaŵa jangalimba kose. Naga akujikamula mnope nyumbajo jikusaŵa jangalimbangana.

¹⁶ Mundu jwakusakala ali mpela manyasi gagali pa lyuŵa, ali mpela manyasi gigatambele mu mgunda.

¹⁷ Miciga jakwe jikusatambala pa maganga, nipo jikusakanilila pa lwala.

¹⁸ Nambo naga jikucuŵidwa, pangali jwalijose jwa mpaka amanyilile kuti jaliji pelepo micigajo.

¹⁹ Lukondwa lwa ŵandu ŵakusakala lwangakaŵa kumala, kaneko ŵandu ŵane ŵakusakala akusayika ni kujigala malo gawo.

²⁰ Mlungu tacipocela ŵandu ŵakulungama, nambo ŵangalungama ngasiŵakamucisya.

²¹ Mlungu tacimtendesya m'mwejo kuti msece, soni timcigumila mwa lukondwa.

²² Ŵandu ŵakusaŵengana ni m'mwejo tacitenda soni, nipo Mlungu tacijonanga malo gakutama ŵandu ŵangalumbana.