Yobu 7 - Chiyawo Bible

¹ Umi wa mundu pa cilambo capasi uli mpela masengo gakusawusya ga usilikali, masiku gakwe gali mpela ga mundu jwa ganyu.

² Kapolo akusasosasosa m'bwilili, yalumo soni nombe najo jwamasengo akusasaka malipilo gakwe.

³ Ndaŵi syosope ngusagamba kulaga, cilo cilicose ngusasimana ni yisawusyo.

⁴ Cilo pakugona, ngusaliwusya kuti, ana tikuce cakaci? Cilo cili celewu, une jwangagona lugono, ngusagamba kugalagata mpaka kumasikusiku.

⁵ Cilu cangu cigumbele ni mbisu, nipo cikukopoka uwowu.

⁶ Masiku gangu gakusawutuka gangali cembeceyo, gakusawutuka kupunda macini gakupanganyicisya nguwo.

⁷ Mlungu jwangu akaliŵalila kuti, umi wangu uli mpela mpweya; soni meso gangu ngasigawona soni yindu yambone.

⁸ Ŵele ŵakumbona sambano jino, ngasambona soni. Pandaŵi jitacisosasosaga une tinjiŵa ndili mbwile.

⁹ Mpela mulikusasimilila liwunde, yalumo soni mundu naga akuwa jwalakwejo jwangawuja soni kutyocela ku malembe.

¹⁰ Jwalakwejo jwangawujila soni ku nyumba jakwe soni jwangakumbucilidwa ni acalongo acimjakwe.

¹¹ Myoyo ngasindeka kuŵeceta, tinjiŵeceta ligongo lya yipwetesi yayili mu mtima mwangu. Ngwenela kudandawula ligongo lya yipwetesi ya mu umi wangu.

¹² Ana ligongo cici mkusimulondela ndaŵi syosope? Ana mkuganisya kuti une ndili nyasa kapena cilombo cam'nyasa cakogoya?

¹³ Naga ngugona kuti mbumule, Ngwembecela kupumula pa yipwetesi yangu.

¹⁴ Wawo akusanjogoya une pakumba sagamisi syakusakala.

¹⁵ Myoyo ngasagwile kuwa kulekangana ni kupilila pa yisawusyo ya mcilu mwangu.

¹⁶ Mbesile ni umi wangu, Une ngaŵa mkutama ni umi masiku gosope. Andece, pakuti umi wangu uli mpela mpweya.

¹⁷ Ana ligongo cici mundu ali jwakusosekwa mnope pameso pa wawo, mwakuti ŵala akusapikanila yakutenda jwalakwejo?

¹⁸ Ŵalakwe akusamlolecesya jwalakwejo masiku gosope soni akusamlinga ndaŵi jilijose.

¹⁹ Ana tacileka cakaci kundolecesya une kuti mbate lipesa lyakuti mbumule.

²⁰ Naga ngutenda ulemwa, ana wawo cikusicapweteka ni cici, ana ŵalakwe ali ŵakwalolela ŵandu? Ligongo cici ambutile une mwakuwilisyawilisya? Ligongo cici une ndili mpela msigo wawusito wakuti wawo awunyakule?

²¹ Ana ligongo cici ŵalakwe ngakungululucila ulemwa wangu ni kundyocesya yileŵi yangu? Pakuti ndaŵi jakuti njinjile mwilembe jisigele panandi, ŵalakwe tacisosasosa une, nambo tinjiŵa ndili mbwile.