Yobu 6 - Chiyawo Bible

Yobu

^1-2 Naga yisawusyo yangu yikaŵe kuti yapimidwe pa sikelo,

³ ni kuti yikasitwepe kupunda mcenga wosope ŵa m'nyasa, ali ni ligongo lyakwe mbecete mwa ukali.

⁴ Pakuti mipamba ja AMBUJE* Ŵamaciligosope jisomile une, nipo cilu cangu cikupikana kupweteka kwa mipambajo. Yakogoya ya Mlungu yisyungulile kuti yilimbane ni une.

⁵ Ana bulu kapena ng'ombe yikusalila pa ndaŵi jiyikulya mopo?

⁶ Ana ŵani ŵampaka alye cakulya cangali njete? Ana ceswela ca mkati mwa lindanda cikusalyolyopela?

⁷ Une yakulya yeleyi ngangusaka kuyipasya, pakuti yikusiyimbuja ku lukosi.

⁸ Ngumŵenda Mlungu kuti atende yingumŵenda une jwalakwejo, soni kuti ambe yinguŵendayo.

⁹ Bola yikaŵe kuti Mlungu akagambe kundusula, ni kulileka ligasa lyakwe kuti linjonanje une.

¹⁰ Masiku gosope mbele ndili mkugapikanila malamusi ga Mlungu, myoyo naga nguwa, tinjisengwa mnope soni ngasinganisya ya yipwetesi ya ciwa.

¹¹ Ana ngwete macili gamti uli kuti mbitilisyejepe kutama cijumi? Ana ligongo cici kuti mbitilisyeje kutama cijumi nambo umi wangu uli wangali cembeceyo?

¹² Ana macili gangu gali mpela ga liganga, kapena kuti ana napanganyidwe ni cisyano?

¹³ Yakuwona, jwangali soni macili gakuti nalikulupusye namsyene; pangali soni kwine kwakuti mpaka mbate cikamucisyo.

¹⁴ Mu ndaŵi ja yakusawusya mpela jeleji pakusasosekwa acimjakwe ŵakulupicika, atamose kuti mwine namlemwecesye Mlungu kapena iyayi.

¹⁵ Nambo jemanja acimjangu mli ŵa unami, mulambwisye une mpela lusulo lwakuwutuka mesi, lwalukusajumilila mwacitema naga ula kwangali.

¹⁶ Jemanjajo ali sulo sya mesi gebilile ndaŵi ja cuku, syasikusaŵaga mesi gakwe gejinji ligongo lya winji wa ula.

¹⁷ Nambo pa ndaŵi ja cawu, mesi ga mu lusulo gakusajumilila.

¹⁸ Ŵandu ŵa pa ulendo akusasepucila kweleko kukusosa mesi, nambo akusagamba kwendajenda ngagasimana mesi, nipo akusawila mcipululu.

¹⁹ Ŵane ŵakwenda pa ngamila* akutyocela ku Tema, nipo akulolesyalolesya mesi mcipululu. Ŵane akutyocela ku Sheba nipo akusakola cikulupi kuti tagasimane mesi.

²⁰ Jemanjaji akusajasa mitima ligongo lyakuti ŵajembeceyaga kugapata mesi, nambo pakwika ku malo kweleko ŵasimene kuti sulo sijumilile.

²¹ Amu ni mundendele une, mliweni likungu lyangu nipo mkutenda woga.

²² Ana nimŵendile kuti mumbe mtuka, kapena kuti mpelece mbote ja cilo kwa mundu jwine jwakwe m'malo mwa une?

²³ Ana une ndite kuti mungulupusye kwa amagongo ŵangu kapena kwa ŵakunjimucila une?

²⁴ Cambone, munjiganye sambano nipo tindame jii; mumanyisye munalemwecesyele.

²⁵ Maloŵe genu gasyesyene gakukamula mtima, nambo yimkuŵeceta m'mwejo yili yangali mate.

²⁶ Ana mkuganisya kuti mpaka mgajongolele maloŵe gangu mciganisyaga kuti maloŵe ga mundu jwajasile mtima gali gangali mate?

²⁷ Jemanja mkusimwaliŵatila ŵanace ŵa masije, ni kwasumisya acalongo acimjenu.

²⁸ Sambano mundolecesye cenene; pakuti ngingumlambusya.

²⁹ Mlece kulambucisya une; pakuti une ndili jwakulungama.

³⁰ Ana mkuganisya kuti nguŵeceta ya unami? Ana une ngakomboleka kulekanganya cindu cambone ku cakusakala?