Yobu 5 - Chiyawo Bible

¹ M'mwe Yobu, mŵilanje sambano jino kuti tulole naga pana jwine jutamjanje m'mwejo. Ana lilayika lyapi liticimkamucisya?

² Lutumbilo ni wiwu yikusamwulaga mundu jwakuloŵela, soni litima likusilimjonanga mundu jwakuloŵela.

³ Une nayiweni mwakusatamila ŵandu ŵakuloŵela, nambo mwacisisimucisya najilwesile nyumba syawo.

⁴ Ŵanace wawo akusaŵa ŵangali citetelo; pakusipaŵa pangali jwalijose kuti ŵacenjele jemanjajo ku nganya ja magambo.

⁵ Ŵandu ŵasala akusiŵalila yakulya jemanjajo, kupwatikapo mbeju tisimesile pa miŵa, ŵandu ŵakudodoloka akusajigala cipanje cakweco.

⁶ Yisawusyo yetu ngaŵa kuti yikusatyocela petaka mpela mujikusasipucila mbeju.

⁷ Ŵandu tacikola yisawusyo kutyocela pa ndaŵi japegwile mpela muwukusatatasicila moto kwawula mwinani.

⁸ Une ngaŵe kuti ndili m'mwejo, ngagalawucile kwa Mlungu ni kumŵenda jwalakwejo kuti angamusye.

⁹ Uwe ngaŵa mkupakombola kupikanicisya masengo gekulungwa gakusatenda Mlungu nipo yakumasya lunda yakwe yili yangali mbesi.

¹⁰ Mlungu akusapeleka ula pa cilambo capasi, soni akusajitilila migunda ja ŵandu.

¹¹ Mlungu akusiŵakwesya ŵandu ŵakusalinondiya soni akusapeleka lukondwa kwa ŵandu ŵakulila.

^12-13 Mlungu akusalepelekasya cilinganyo ca ŵandu ŵakalamuka mwakuti jemanjajo ŵangapindula cilicose. Akusiŵatega ŵandu ŵakalamukawo mu lwawu lwa kukalamuka kwawo, nipo cilinganyo cawo cikusalepeleceka.

¹⁴ Jemanjajo akusaŵaga ali mu cipi atamose kuŵe kuti kwana lilanguka, nipo musi akusakuŵalaga mpela kuti cili cilo.

¹⁵ Mlungu akusiŵakulupusya ŵandu ŵakulaga, ni ŵandu ŵakusoŵa kutyocela kwa amagongo ŵawo.

¹⁶ Mundu jwakulaga akusagumbalilwa ni cikulupi, nambo ŵakusakala akusiŵawugala pakamwa.

¹⁷ Jwana upile mundu jwakusajamucidwa ni Mlungu, mkasimnyosyaga camuko ca Mlungu Jwamaciligosope.

¹⁸ Pakuti jwalakwejo akusamwulasya mundu soni akusagataŵa maŵangago, akusamwulaga mundu, nambo soni akusamposya.

¹⁹ Jwalakwejo tacimkulupusya m'mwejo ku yisawusyo ndaŵi syosope,

²⁰ tacimsamalila mu ndaŵi ja cilala, tacimsamalila soni mu ndaŵi ja ngondo ni kumkulupusya m'mwejo ku ciwa.

²¹ Mlungu tacimkulupusya m'mwejo kwa ŵandu ŵa mabosa, myoyo soni tacimkulupusya mu ndaŵi ja conasiko.

²² Timciseka pa ndaŵi ja conasiko ni sala nipo ngasimjogopa yilombo ya mwitinji.

²³ Mu mgunda mwenu timuciŵa muli mwangali maganga, nipo yinyama ya mwitinji ngisiyimsawusya m'mwejo.

²⁴ Kaneko timcitama mwa mtendele pa nyumba jenu; timciwona soni kuti pangali cine cilicose cakusoŵa pa yilangwa yenu.

²⁵ Timcikola ŵanace ŵajinji, soni yisukulu yenu tiyiciŵa yejinji mpela manyasi.

²⁶ Timcitama ni umi kwa ndaŵi jelewu mpela mujikusakomalila mbeju ja tiligu ni kuja najo ku malo kwakusajilekanganya ni masapi.

²⁷ Yobu, uwetu tuyiwungunyisye yosopeyi, nipo tuyiweni kuti yili yakuwona sambano myipikanile ni kuyikuya yeleyi.