Yobu 42 - Chiyawo Bible

¹ Sambano Yobu ŵajanjile AMBUJE.

Yobu

² “Ngumanyilila kuti wawo akukomboleka kutenda yindu yosope, cakusaka kutenda ŵalakwe, pangali soni jwine jwampaka asisye.

³ Ŵalakwe ŵambusisye une kuti, ‘Ana ŵani ŵelewo ŵakusaka kusokonesya mapulani gangu pakuŵeceta maloŵe gangali lunda?’ Yisyene kuti naŵecete yindu yakuti nganinayimanyilila, yindu yakusimonjesya kwa une yele nganinayimanyilila.

⁴ Ŵalakwe ŵasalile une kuti mbikanicisye nipo njanje yiwusyo ya ŵalakwe.

⁵ Nagambaga kupikana ya ŵalakwe ni mapikanilo ganguga, nambo sambano naweni ni meso ganguga.

⁶ Ali ni ligongo lyakwe ngutenda soni pa yosope yinaŵecete, myoyo ngupesya ulemwa pakulitaga liwu ni luwundu mu mtwe mwangu.”

Maloŵe gambesi

⁷ AMBUJE* piŵaŵecete ni Yobu, ŵamsalile Elifasi jwa ku Temani kuti, “Une nimtimbilile m'mwejo ni acimjenu ŵaŵiliwo, ligongo lyakuti jemanja nganimŵeceta yindu yambone yakwamba une, mpela mwaŵecetele jwakutumicila jwangu Yobu.

⁸ “Sambano ngusaka kuti jemanja mjawule kwa Yobu mkapelece ng'ombe sya mikambako msano ni siŵili ni ngondolo sya mikambako msano ni siŵili kuti mkapelece mbopesi jakutinisya kwa une. Kaneko mtumiki jwangu Yobu tacimpopelela jemanja pakutipo kuti lipopelo lyakwelyo tinjilipocela, soni ngasimbeleka cilango mtande wa kuloŵela kwenu.”

⁹ Myoyo Elifasi jwa ku Temani, Bilidadi jwa ku Shuwa ni Sofali jwa ku Naama ŵajawile, nipo ŵatesile yiŵalamwile AMBUJE. Nipo AMBUJEWO ŵajanjile lipopelo lya Yobu.

¹⁰ Kaneko Yobu ŵapopelele acimjakwe ŵala, nipo AMBUJE ŵamwucisye soni Yobu yipanje yakwe yosope pakuyitupiya soni kupunda muyaŵelele pandanda.

¹¹ Kaneko acalongo acimjakwe wosope ŵa Yobu, acalumbugwe, ni wosope ŵaŵam'manyililaga jwalakwejo ŵayice kwa jwalakwejo kulya nawo cakulya m'nyumba mwakwemo. Jemanjajo ŵamtulesye Yobu ni kumtamika mtima pasi ligongo lya yipwetesi yiŵayikundile AMBUJE kuti yimgwile jwalakwejo. Jwalijose mwa ŵandu ŵiŵayicewo ŵampele Yobu mbiya ni mbete ja golidi.*

¹² Myoyo AMBUJE ŵampele upile Yobu pa masiku gakwe gakumalisyaga kupunda pandanda pala. Sambano jwalakwejo jwakwete ngondolo 14,000, ngamila* 6,000, ng'ombe sya mikambako 2,000 ni acibulu ŵa mikambako 1,000.

¹³ Jwalakwejo ŵaŵelece soni ŵanace ŵacalume ŵakwana msano ni ŵaŵili ni ŵanace ŵacakongwe ŵatatu.

¹⁴ Mwanace jwandanda kupagwa mwa acakongwe ŵala ŵampele lina lyakuti Yemima. Jwaŵili kupagwa ŵaliji Kesiya, jwatatu kupagwa ŵaliji Keleni Hapuki.

¹⁵ Ŵanace ŵacakongwe ŵa Yobu ŵaliji ŵakusalala kupunda acakongwe wosope ŵa mcilambomo. Yobu ŵapele jemanjajo mbuwa ja yipanje yakwe, pamo ni acalumbugwe.

¹⁶ Kaneko Yobu ŵatemi cijumi yaka 140, mwakuti pa ndaŵi jelejo ŵayiweni yisukulu yakwe ni yisukulu ya m'mawuja yakwe.

¹⁷ Pambesi pakwe Yobu ŵawile ali acekulwipe mnope.