Yobu 41 - Chiyawo Bible

¹ “Ana mpaka mpakombole kuciwuta cilombo ca m'nyasa cila Lefiyatani* ni cisopo ca somba, kapena kutwinyicisya lulumi lwakwe pasi ni lukonji?

² Ana mpaka mpakombole kucitaŵa lukonji mu mbula mwakwe, kapena kubowola majego gakwe ni cisopo ca somba?

³ Ana celeco ticicimŵenda m'mwejo kuti mcitendele canasa?

⁴ Ana calakweco ticicitenda mkamulano ni m'mwejo kuti calakweco ciŵe cakumtumicila m'mwejo mpaka kalakala?

⁵ Ana mpaka mng'ande naco mpela mumkusang'andila ni cijuni? Ana kapena mpaka mcitaŵe ni unyolo kuti acakongwe ŵenu ang'andeje naco?

⁶ Ana ŵandu ŵakuloposya mpaka acisumisye malonda? Ana ŵa malondawo mpaka agaŵanegaŵane nyama jakwe kuti akajisumisye?

⁷ Ana mpaka mpakombole kupowola lipende lyakwe ni cisopo, kapena kupowola mtwe wakwe ni comba?

⁸ Nambo naga mkucitanda, m'manyilile kuti kupali kulimbana.

⁹ Jwalijose naga ali aciweni cilomboco akusajasa mtima ni kugwa pasi.

¹⁰ Naga pangali jwine jwakuti mpaka alimbe mtima ni kucitanda, ŵani ŵa mpaka alimbe mtima ni kukangana ni une Mlungu?

¹¹ Ana ŵani ŵiŵambele une kandu kuti namwucisye jwalakwejo? Yosope ya pasi pa cilambo pano yili yangu.

¹² Une ngaŵa mkuleka kuŵeceta ya yiŵalo ya cilomboco, ya macili gakwe ni uwonece wa cilu cakwe.

¹³ Ana ŵani ŵampaka apapule lipende lyakwe? Ŵani ŵampaka asome lipende lyakwe lila, lyele kulimba kwakwe kuli mpela cisyano.

¹⁴ Pangali mundu jwakwete macili gakucitenda kuti cijasamukule pakamwa pakwe. Soni meno gakwe gakusigajogoya ŵandu.

¹⁵ Ku mgongo kwakwe kwana misela ja maŵamba gamti mpela yakucijila pa ngondo yelumbikanelumbikane yakulimba mpela liganga.

¹⁶ Maŵambago gali geŵandikane mnope, mwakuti atamose mpweya ngaŵa mkwinjila sikati jakwe.

¹⁷ Maŵambago gali gelumbikanelumbikane soni gematanematane, mwakuti ngaŵa mkulekangana.

¹⁸ Kwasamukula kwakwe kukusakoposya kung'anima, meso gakwe gakusaŵala mpela kuŵala kwa kumasikusiku.

¹⁹ Mkamwa mwakwe mukusakopoka sakali sya moto, soni mukusatatasika kung'anima kwa moto.

²⁰ Mu mbula mwakwe mukusakoposya lyosi, mpela lipujungu lyakutyocela mu mpika wakusemula pa moto.

²¹ Mpweya wakwe ukusakolesya makala, soni lilamba lya moto likusakopoka mkamwa mwakwe.

²² Lukosi lwakwe luli lwamacili jwalijose jwakusasimana naco akusagamba kutetemela mtande wa woga.

²³ Minowu ja mcilu mwakwe jili jakulumbikana, soni jili jekomangale mnope, soni jili jakulimba.

²⁴ Pa mtima pakwe pali pejumu mpela liganga. Pali pejumu mpela lisyago.

²⁵ Cilomboco naga ciwonece ni ŵamacili wose akusajogopa. Naga akupikana masegwe gakwe akusatenda woga.

²⁶ Atamose kuti cisomedwe ni upanga, calakweco cangapikana kupweteka, mwakuti atamose lipanga, mpamba ni upanga yosopeyi yikusalepela kwinjila.

²⁷ Cisyano cikusapelaga lipesi soni cisyano ca bulonsi cikusapelaga citela cewole.

²⁸ Calakweco ngaŵa mkuwutila mpamba, soni naga cisomedwe ni maganga, calakweco cikusagamba kugapondaponda.

²⁹ Yimbonga cisayiwona mpela yisinde. Pakucisoma ni mpamba calakweco cikusagamba kusecelela.

³⁰ Maŵamba ga ku lutumbo kwakwe gali mpela yiduswa ya mapale gakutema. Calakweco cikusatambalala m'matope mpela pa ligeleta pa kuputila tiligu.

³¹ Pacikung'ambila calakweco mesi gakusatanda kusemula mpela ga mu mpika pa moto.

³² Kunyuma kwakwe cikusaleka yindu yeswela yamti mbee mpela ciwulo, kwakuti mundu mpaka aganisye kuti nyasa jitesile ciwulo.

³³ Pangali soni cindu cine cakulandana ni calakweco pa cilambo ca pasi, calakweco cili cakutesya woga.

³⁴ Calakweco cikusanyosya yinyama yine yosope. Calakwe cila cili mwenye jwa yinyama yosope ya mwitinji.”