Yobu 40 - Chiyawo Bible

^1-2 Sambano Mlungu Jwamaciligosope ŵamwusisye Yobu kuti; “Ana mkusaka kukangana ni une? Cambone m'mwe ŵimwasisyene ni Mlungu mjanje yeleyi.”

Yobu

^3-4 Une nganimba kandu kose. Ana mpaka najanje cici ŵalakwe? Pangali cakwajanga, nambo gamba kukamula pakamwa.

⁵ Mbecete kala mwakupundanganya mungaŵecetele.

⁶ Kaneko AMBUJE* ŵaŵecete soni ni Yobu kupitila mu cimbunga.

AMBUJE

⁷ Sambano mlimbangane mpela ŵalume. Tinamwusye yiwusyo, m'mwejo munjanje.

⁸ Ana mpaka munjigale une mpela jwakulemwa? Ana mpaka munjamuce kuti m'mwejo mŵe ŵakulungama?

⁹ Ana mkwete macili mpela mumbelele une Mlungu? Ana maloŵe genu mpaka galindime mpela mugakusalindimila maloŵe gangu.

¹⁰ Naga yili myoyo mliwece mwasyene ucimwene ni ucimbicimbi.

¹¹ Mlosye lutumbilo lwenu ni mlole soni jwalijose jwakulikwesya, ni mumnandiye jwalakwejo.

¹² Mlole soni jwalijose jwali jwakulikwesya, ni mumtulusye. Ŵakusakala wosope mwaliŵatile pa malo palipo.

¹³ Mwawece sanda ni kuja kukwasika ku malembe.

¹⁴ Patimtende myoyo, une tinjimtogolela ni kwiticisya kuti macili genu gampundisye.

¹⁵ Mgambe kuganisya ya Ndomondo, Une najipanganyisye jelejo mpela munampanganyicisye m'mwejo. Jelejo jikusalya manyasi mpela ng'ombe.

¹⁶ Macili gakwe gali gekulungwa mnope, soni cilu cakwe cili ca macili mnope.

¹⁷ Ndomondo jikusajimika mcila wakwe mpela citela ceŵisi ca mkungusa.

¹⁸ Mawupa gakwe gakusaŵa gakulimba mpela cisyano, soni mbalati syakwe sili mpela mbungalilo sya cisyano.

¹⁹ “Ndomondo jili jekulungwa mwa yakupanganyidwa yosope ya une Mlungu. Une pinajipanganyisye ndomondo najipele meso gakogoya gala.

²⁰ Jikusalya mopo kumkuli kwele kukusang'anda yinyama ya mwitinji.

²¹ Jikusagona pasi pa citekete ca miŵa, jikusajuŵa soni m'matete ni mwilambo.

²² Masamba ga citekete ni gele gakusajipa m'bwilili, soni yitela ya mungulugulu sulo yikusiyapa m'bwilili.

²³ Mesi ga mu lusulo gakusakukuma, nambo jalakwejo jangatenda woga. Atamose mesi ga mu Lusulo lwa Yolodani gapeleleje mlukosi, jalakwejo jangatenda woga.

²⁴ Ana apali mundu jwine jwa mpaka apakombole kuloposya ndomondo ni cisopo kapena kujitanjisya mu msipu?