Yobu 4 - Chiyawo Bible

Kuŵecetana kwandanda sikati ja Yobu ni acimjakwe ( 4:1—14:22 ) Elifasi

^1-2 Ana naga jwine akumjanga ni kuti amlemwecesye m'mwejo? Nambo une ngingombola kutama jii.

³ M'mwejo mwajiganyisye ŵandu ŵajinji nipo mwalimbisye mitima ŵandu ŵalembuce mcilu.

⁴ Maloŵe genu gakamucisye ŵandu ŵajinji ŵaŵasoŵaga cikamucisyo.

⁵ Sambano jili ndaŵi jenu jakuti myiwone yipwetesi; nipo m'mwejo mjasile mtima wenu soni yimkwayiye mwakuti mkutenda woga.

⁶ Mwamlambilaga Mlungu, nipo mwatamaga mwakulungama, myoyo mkwenela kukola cikulupi mwa Mlungu.

⁷ Mganisye cenene sambano. Ana apali mundu jwakulungama juŵajonasice kutyocela kala? Ana kwapi kumwaweni ŵandu ŵakulungama ali awulajidwe?

⁸ Ŵandu ŵakusatenda yakusakala ni ya ulemwa, pambesi pakwe akusapindula iyoyo.

⁹ Mpela mujikusajonanjila yindu mbungo, myoyo Mlungu akusiŵajonanga jemanjajo mu lutumbilo lwakwe

¹⁰ Ŵandu ŵangalumbana akusabangula mpela ŵanace ŵa masimba, nambo Mlungu akusagakuwula meno gawo.

¹¹ Jemanjajo akusaŵa mpela masimba gakusoŵa nyama, nipo ŵanace ŵawo akusatila.

¹² Utenga wayice kwa une mwakusongona, nipo lipikanilo lyangu lyakupikene kusongonako.

¹³ Lisiku line pinaliji mlugono nasagamile sagamisi syakusakala.

¹⁴ Nakamwilwe ni woga, nipo natandite kutetemela cilu cangu cosope catetemele ligongo lya woga.

¹⁵ Pelepo kambepo kakusisimila cenene kapujile kumeso kwangu nipo umbo sya pa cilu cangu syagambile kwima kuti njoo, ligongo lya woga.

¹⁶ Cine cakwe cajimi pelepo, nacilolecesye nambo nganinacimanyilila uwonece wakwe. Pasogolo pangu capali cindu, kwagambile kuti jii, kaneko napikene maloŵe gakuti:

¹⁷ “Ana mundu komboleka kuŵa jwakulungama pameso pa Mlungu kapena kuŵa jwamswejele pameso pa Mkupanganya jwakwe?

¹⁸ Mlungu jwangakulupilila ŵakutumicila ŵakwe atamose malayika gakwe gene akusagasimana ni cileŵi.

¹⁹ Ana mkuganisya kuti Mlungu tacicikulupilila cindu cakupanganyidwa ni lilongo lili litaka lyamti komboleka kutusuka mpela matimati?

²⁰ Mundu komboleka kuŵa cijumi kundaŵi, ni kuwa mwangajembecela mkanikuswe.

²¹ Yosope yakwete mundu yikusamala; kaneko akusaŵa ali jwangali lunda.”