Yobu 32 - Chiyawo Bible

Yiŵaŵecete Elihu ( 32:1—37:24 )

¹ Ŵandu ŵatatu ŵala ŵalesile kuŵecetana ni Yobu, ligongo lyakuti ŵelewo ŵaliweni kuti ali ŵangalemwa.

² Nambo Elihu, mwanace jwa Balakele, jwa lukosyo lwa Busi jwa liŵasa lya Lamu, ŵampilile mtima Yobu ligongo lyakuliwona asyenewo kuti ali ŵakulungama kumpunda Mlungu.

³ Ŵapilile soni mtima acimjakwe ŵatatu ŵa Yobu ŵala ligongo lyakuti nganapakombola kwanga, atamose kuti acimjakwewo ni ŵaŵasimene kuti Yobu ali jwakulemwa.

⁴ Elihu ŵaliji jwamnondi mwa ŵandu ŵatatuŵa, myoyo jwalakwejo ŵajembecele ŵiŵaliji acakulungwa kwa jwalakwejo kuti aŵecete.

⁵ Myoyo piŵaweni kuti ŵandu ŵatatuwo nganamjanga Yobu mwakwenela, jwalakwejo ŵapile mtima.

⁶ Kaneko Elihu mwanace jwa Balakele jwa lukosyo lwa Busi, ŵatandite kuŵeceta. Une ndili jwamnondi, jemanja mli acakulungwakulungwa, myoyo natendaga woga kumsalila yinaganisyaga.

Elihu

⁷ Natiji kuti atande acakulungwakulungwa kuŵeceta, ligongo acakulungwa ŵawula sya kala ni ŵakusajiganya lunda.

⁸ Nambo msimu wa Mlungu Jwamaciligosope ni wawukusajinjila mwa ŵandu ni kwapa lunda.

⁹ Ngaŵa kuti ucekulu ni ukusamtendesya mundu kuti aŵe jwalunda ngaŵa kuti kukomangalape ni kukusatendesya kuti ŵandu apikanicisye yayili yakwenela.

¹⁰ Ali ni ligongo lyakwe nguti, ambikanile, soni andece kuti mbecete nganisyo syangu.

¹¹ Naliji mkwembecela kuti mbikane maloŵe ga wawo, naliji mkwembecela kuti mbikane maloŵe gawo gakukamula mtima, wawojo pa ndaŵi jiŵaliji mkusosa maloŵe ga lunda gakuti aŵecete.

¹² Napikanicisye wawojo cenenepe, nambo paliji pangali jwalijose sikati ja jemanja juŵasisisye maloŵe giŵaŵecete Yobu, pangali soni jwalijose juŵajanjile.

¹³ Mkalamuce, mkasimŵeceta kuti, Uwe tupatile lunda, Mlungupe ni jwa mpaka ampunde jwalakwejo, ngaŵaga uwe.

¹⁴ Yobu aŵeceteje ni m'mwejo ngaŵa ni une, nipo une nganinajanga ŵelewo mpela mwajanjile jemanja.

¹⁵ Jemanjajo asokonecele, mwakuti ngakwanga soni cilicose. Ŵangali soni maloŵe gakuti mpaka aŵecete.

¹⁶ Ana une njembeceye mtande wakuti jemanjajo ngakuŵeceta, ana ngajanga soni ligongo lyakuti jemanjajo agambile kutama jii?

¹⁷ Iyayi, une tinjanje sambano none jwakwe timbecete yinguganisya.

¹⁸ Pakuti ngwete yejinji yakuŵeceta, mtima wangu ukunganganicisya kuti mbecete.

¹⁹ Nganisyo syasigumbele mu mtima mwangu sili mpela finyo jwakusoŵa pakumpungulila, une ndili mpela misaku jasambano ja mapende gagakusaka kuwulika ni finyo.

²⁰ Ngwenela kuŵeceta kuti mtima utuluce pasi. Pakusosekwa kuti njanje pa ngani jeleji.

²¹ Ngandosya kumjimilila mundu jwalijose soni ngimbeceta mwakunyenjelela.

²² Une jwangamanyilila kuŵeceta mwakalamuka, kogopela kuti Mlungu juŵambanganyisye komboleka kumba cilango mwacitema naga natesile yeleyo.