Yobu 3 - Chiyawo Bible

Yobu akumdandawulila Mlungu

¹ Piyamasile yeleyi Yobu ŵatandite kuŵeceta ni kulilwesa lisiku liŵapagwile.

Yobu

^2-3 AMBUJE,* lilwesece lisiku linapagwile; cilwesece soni cilo ciŵajigalile cilu mama ŵangu!

⁴ Lisikulyo liŵe lya cipi, Mlungu jwa kwinani, akalikumbucila soni lisikulyo; nipo lilanguka likawoneka soni pa lyele lisikulyo.

⁵ Lisiku linapagwile unelyo liŵe mpela cilo nipo cipi cakwe ciŵe cakogoya mnope.

⁶ Cipi cityosyedwe ni cele ciloco, lisiku lyelelo likasiliŵalanjidwa pampepe ni masiku gane ga pa caka.

⁷ Cilo celeco cikayika soni ni kandu kane kambone, soni kukapikanika kululuta kwakulosya lukondwa.

⁸ Ŵakusamanyilila kulwesa alilwese lyele lisikulyo, ŵali ŵakupakombola kwimusya Lefiyatani.*

⁹ Ndondwa sya kumasikusiku sikaŵala; lyele lisikulyo likajembecela kuti tiliyice soni.

¹⁰ Lyele lisikulyo lilwesece, pakundeka une kuti mbagwe, ligongo ni lilyambonesye une yipwetesi.

¹¹ Yikaliji yambone kuti ngawilile mcitumbo mwa mama ŵangu pemo kapena kuwa ndili napagwapejo.

¹² Ana ligongo cici mama ŵangu ŵambakete une pa cilolo? Ana ligongo cici ŵelewo ŵanjonjesye une maŵele gawo?

¹³ Naga ngaŵe kuti une mbwile pa ndaŵi jakupagwajo, ni kuti ngaliji ndili mkupumula sambano jino,

¹⁴ pamo ni ayimwene ni apungu ŵa pa cilambo capasi pano, ŵaŵalitaŵile acimsyene majumba gekulungwa pa masame.

¹⁵ Ngaliji ndili m'malembe pamo ni acimlongola ŵiŵakwete silifa* ni golidi* jwamjinji,

¹⁶ kapena ngaliji mpela mbundumuko, jimkanijiwoneje lilanguka lya lyuŵa.

¹⁷ Ku malembeko, ŵandu ŵangalumbana akusaleka kusakala kwawo, nipo ŵandu ŵapesile ni ciwawa akupumula kweleko.

¹⁸ Ŵa mu ukayidi akuwusimana mtendele kweleko, pakuti ngakupikana soni maloŵe ga ngalwe ga jwakulolela ku ukayidi.

¹⁹ Ŵandu ŵakupikanika, ŵangapikanika ali kweleko, pamo ni acikapolo ni alukosyo.

²⁰ Ana ligongo cici lyuŵa likusilimŵalila mundu jwali pa yipwetesi? Ana ligongo cici akusiŵakunda ŵandu ŵali pa yipwetesi kuti atamejepe ni umi?

²¹ Akusacisaka ciwa, nambo ciwaco cangamyicila jwalakwejo; akusacisaka ciwaco kupunda cipanje cakusisika.

²² Akusasangalala ni kusengwa mnope naga akuwa ni kusicidwa m'malembe,

²³ Ana ligongo cici umi ukusapelecedwa kwa mundu julisisice litala lya umi wakwe, soni Mlungu amwunjicile jwalakwejo yipwetesi?

²⁴ M'malo mwakuti ndye cakulya, ngusalila, soni kuwuwula kwangu kuli kwangamala.

²⁵ Yele yinatendaga nayo woga yitendecekwe kweli, yele yinayijogopaga yimbicilile.

²⁶ Une ngimbata mtendele ni bata, pakuti yipwetesi yangu ngayikumala.