Yobu 26 - Chiyawo Bible

Yobu

^1-2 Mgambe kuganisya, ana m'mwejo mungamucisye une, mundu jwakulaga ni jwangali maciline?

³ Mumbele une, upungu wenu wambone, mundu jwangali lunda mpela une, ni kundosya une lunda lwakusokoka mnope.

⁴ Ana mkuganisya kuti ŵani ŵitacipikana maloŵe genuga? Nambi nganisyo syelesi msijigele kwapi?

Bilidadi

⁵ “Misimu ja ŵandu ŵawe jikutetemela ku malo ga ŵandu ŵawe,* yosope yakutama m'mesi yikulaga pasi m'mesimo.

⁶ Cilambo ca ŵandu ŵawe cijaseme pameso pa Mlungu, soni jwalakwejo akuyiwona yosope yene.

⁷ Mlungu ŵaŵisile kwiwunde, pa malo pipaliji pangali cilicose, ŵaciŵisile cilambo capasi m'malo mwakwe, pele pipaliji pangali cilicose.

⁸ Mlungu ni juŵaŵisile mesi gejinji m'mawunde, nambo mawundego gangapapuka ligongo lya usito.

⁹ Jwalakwejo akusawusisa mwesi kusyeto kwa mawunde.

¹⁰ Mesi ga Mlungu ŵagaŵicile malile gamti mpela ukunje, myoyo jwalakwejo ŵalekangenye lilanguka ni cipi.

¹¹ Njalamila syakucinjilicisya cilambo cakwinani jikusatetemela ni woga soni jikusasimonga pakupikana kwamuka kwa Mlungu.

¹² Ni macili gakwe, Mlungu jwatondweye nyasa, ni lunda lwakwe, Mlungu ŵapakombwele kuwulaga cilombo ca m'nyasa cila ca Lahabu.

¹³ Ni mpweya wa jwalakwejo ŵalangwisye kwinani, ni ligasa lyakwe jwalakwejo ŵawuleje cilombo ca m'nyasa cila.

¹⁴ Yinduyi yili panandi cabe ya yitendo yakwe ya macili. Uwe tugamba kupikana panandi ya jwalakwejo mpela kusongona. Ana ŵani ŵa mpaka amanyilile ukulungwa wamacili gakwe?”