Yobu 23 - Chiyawo Bible

Yobu

^1-2 Lelo jino soni ngudandawula mnope kwa Mlungu, atamose kuti nguwuwula jwalakwejo akupitilisya kumba une cilango.

³ Ngakumanyilile kwa mpaka ngamsimane Mlungu, ngajawile mpaka ku malo kwakusapikanila madandawulo ga ŵandu.

⁴ Ngajile kuŵeceta magambo gangu pameso pakwe, soni ngaŵecete yosope yakungulo kwangu.

⁵ Pelepo ni kuti ngapikene maloŵe gakanjanjile jwalakwejo.

⁶ Ana Mlungu akalimbene ni une mwamacili gakwe? Iyayi, jwalakwejo akagapikene maloŵe gangu.

⁷ Kweleko, mundu jwakulungama akapakombwele kuŵeceta ni jwalakwejo mwakuwusimana mtima; jwakundamula unejo akasimene une kuti ndili jwangalemwa ndaŵi syosope.

⁸ Alole, naga ngwawula msogolo, jwalakwejo ngakuŵa kweleko, naga nguwujila camunyuma, ngangupakombola kumwona jwalakwejo.

⁹ Ngusinamsosasosa jwalakwejo ku mkono wamciji, nambo ngamwona. Ngusindolesya soni ku mkono wamlyo nambo ngamwona kose.

¹⁰ Nambo Mlungu akusamanyilila mungusajendela, pitacilingapo, tacisimana kuti une ndili jwamswela mpela golidi.*

¹¹ Sajo syangu sikusaliŵata musikusaliŵata sajo syakwe, sunjile litala lyakwe, soni ngasinilijasa.

¹² Mbele ndili mkulikuya litala liŵandosisye une mwakulupicika.

¹³ Jwalakwejo ali jwangapinduka, ana ŵani mpaka ŵasinde ŵelewo nganisyo.

¹⁴ Yasimicisye jwalakwejo kuti taciyitenda, tayitende nditu, soni jwalakwejo akusaganicisya yejinji ya yeleyi.

¹⁵ Ali ni ligongo lyakwe ngutenda woga pameso pakwe, naga nguganisya ya jwalakwejo ngusatenda woga.

¹⁶ Mlungu asisimisye mtima wangu, Jwamaciligosope andesisye woga.

¹⁷ Mlungu Jwamaciligosope ni jwandesisye woga, ngaŵa cipi ca yipwetesi cicisyungulile uneci.