Yobu 22 - Chiyawo Bible

Kuŵecetana kwatatu ( 22:1—27:3 ) Elifasi

^1-2 Ana pana jwalijose, atamose jwalunda mnope, jwa mpaka aŵe jwakupindulisya kwa Mlungu?

³ Ana kulungamika kwenuko mpaka kumpindulisye Mlungu, kapena jwalakwejo mpaka apindule ni ndamo jenu jambonejo?

⁴ Ana lili ligongo lyakuti mkusimumjogopa Mlungu, kuti amjamuceje ni kumjigalila ku nganya?

⁵ Ana kusakala kwenu ngaŵa kwekulungwa, soni kulemwa kwenu kuli kwangali mbesi?

⁶ M'mwejo mwakanganicisyaga acalongo acimjenu kuti apelece mbiya siŵakongwele, soni mwasumulaga yakuwala yawo ni kwaleka ali makonope.

⁷ Nganimwapa mesi gakumwa ŵandu ŵapele, soni nganimwapa yakulya ŵandu ŵasala.

⁸ Ligongo lya macili genu mwasumwile cilambo cekulungwa, ligongo lya kulinonyela mwatamilicice mcilambomo.

⁹ Mwatyosisye acakongwe ŵamasije* yalayalape soni mwalagasisye ŵanace ŵamasije.

¹⁰ Ali ni ligongo lyakwe mli mu yipwetesi, nipo mkamwilwe ni woga.

¹¹ Ali ni ligongo lyakwe lilanguka lyenu lityosile nipo mli mcipi mwakuti ngisimpakombola kulola, mwakuti soni m'mwejo m'misilwe ni mesi ga cikumba ca mesi.

¹² Ana eti Mlungu akusatama kwinani kwanawula? Mlole ndondwa sili mwinani mnopesyo, mlole kutalika kwakwe pa malo pasilipo.

¹³ Nambope mkusawusyaga kuti, “Ana Mlungu akumanyilila cici? Jwalakwejo asisice ni mawunde, nambi mpaka atulamule uli?”

¹⁴ Mawunde ga mapiliwu mnope gamsyungulile jwalakwejo, mwakuti ngaŵa mkupakombola kulola cenene, pa ndaŵi jakwenda pacanya pa mawundepo.

¹⁵ Ana m'mwejo mganisisye kuti mtameje mpela mwakusatamila ŵandu ŵakusakala?

¹⁶ Jemanjajo ŵawile ndaŵi jawo mkinijikwane. Jemanjajo ŵatyosisye pa cilambo pano mpela mugakusakokolela mesi nyumba.

¹⁷ Jemanjaji, ŵamsalile Mlungu kuti, Atulece twacimsyewe, ana Mlungujo mpaka atende cici kwa uweji?

¹⁸ Nambo atamose yili myoyo, Mlungu pejo ni juŵasicilisye jemanjajo. Ali ni ligongo lyakwe une jikape ngangukamulana ni nganisyo sya ŵandu ŵakusakalawo.

¹⁹ Ŵandu ŵakulungama akusakondwa nipo ŵandu ŵangali ulemwa akusaseka pa ndaŵi jakusapeleka Mlungu cilango kwa ŵandu ŵakusakala.

²⁰ Jemanjajo akusaŵeceta kuti, Amagongo ŵetu ajonanjidwe, soni yiŵayilesile yijocedwe ni moto.

²¹ M'mwe Yobu, msyoŵekaneje ni Mlungu kuti mtameje mu mtendele, naga mkutenda myoyo timciyiwona yindu yambone.

²² Mpikanileje yakuŵeceta Mlungu ni kuyisunga mu mtima.

²³ Mkwenela mkuwujila kwa Mlungu Jwamaciligosope mwakulinondiya, ni kutyosya ulemwa wosope uli mwenumwe.

²⁴ Mjase golidi* jwenu josope jwambone, mpela kuti jwelejo ali mcenga.

²⁵ Nambo Mlungu Jwamaciligosope aŵe mpela golidi* ni silifa* jwenu jwa mtengo wapenani.

²⁶ Kaneko timcisangalala mwasyene mwa Mlungu Jwamaciligosope, nipo timcimanyilila kuti jwalakwejo ali ndande ja lukondwa.

²⁷ Mlungu tacijanga mapopelo genu, soni m'mwejo timcitenda yele yimwalumbile kwa Mlungu kuti timciyitenda.

²⁸ Timcipunda pa yosope yitimcitenda, nipo lilanguka tilicimulicila pa matala genu gosope.

²⁹ Mlungu akusiŵagwisya ŵandu ŵakulinonyela, nipo akusiŵakwesya ŵandu ŵakulinondiya.

³⁰ Akusamkulupusya mundu jwanganalemwa, nomwe ŵakwe tacimkulupusya ligongo lyakulungama kwenu.