Yobu 21 - Chiyawo Bible

Yobu

^1-2 Conde mpikane ayi yingusaka kumsalilayi. Maloŵega gaŵe gakundulasya une mtima.

³ Ambe lipesa lyakuti mbecete, pitimale kuŵecetapo, jemanja anyosyeje cenene.

⁴ Ana une ngusinamdandawulila mundu? Nambi cakundekasya kuti une mbye mtima ni cici?

⁵ Mgambe kuganisya yele yitendecekwe kwa uneyi, nipo timsimonje, ngimkola soni cakuŵeceta.

⁶ Pinguyiganisya yinduyo, ngusatenda woga ni kutetemela kwejinji.

⁷ Ana ligongo cici Mlungu akusiŵaleka ŵandu ŵakusakala kuti aŵeje cijumi, mpaka kucekulupa ni kuŵa ŵakupikanika mnope?

⁸ Akusatama cijumi kuti ayiwone yisukulu yawo, soni ŵanace ŵawo akusakula cenene acimsyenewo ali mkwawona.

⁹ Maŵasa gawo gakusaŵaga pambone soni gangatenda woga; soni Mlungu jwangapeleka cilango pa jemanjajo.

¹⁰ Ng'ombe syawo sya mikambako sikusaŵelekasya cenene ndaŵi syosope; soni sya mikolo syangapolosya.

¹¹ Ŵanace ŵawo akusang'anda pa luŵala ni kung'andaga pa luŵala mpela mwakusatendela ŵanace ŵangondolo.

¹² Ŵanaceŵa akusajimba ni kulisyaga tugoma twa ŵana, yida yakwimbila ya ngonji, soni akusasengwa mnope pa ndaŵi jakupikana kulila kwa citolilo.

¹³ Acinangolo ŵangalumbanawo akusatama ali mkukondwa pa masiku gosope ga umi wawo, naga ali awile, akusasicidwa m'malembe mwa mtendele.

¹⁴ Ŵandu ŵakusakalawo akusamsalila Mlungu kuti, atyoce atulece acimsyewe. Ngatukusaka kugamanyilila malamusi ga ŵalakwe.

¹⁵ Ana Mlungujo nduni kuti tumtumicileje uwe? Ana citupindule cici naga tukupopela kwa jwalakwejo?

¹⁶ Ana eti jemanjajo yawo yikusiyajendela cenene ligongo lyakulimbicila kwawo? Nambo une ngangukamulana ni yakuganisya jemanjajo.

¹⁷ “Ana mwawoneje ŵandu ŵamti myoyo ali mkuwa mwakusisimucisya? Ana kalingwa kimwaweni jemanjajo lili mkwagwila likungu? Ana Mlungu akusiŵatumbilila jemanjajo ni kwapa cilango?

¹⁸ Ana kalingwa kiŵatyosisye jemanjajo mpela lipesi lyakuguluka ni mbungo?

¹⁹ Akusatiji kuti, ‘Mlungu akusapeleka cilango kwa mwanace ligongo lya ulemwa wa acinangolo ŵakwe.’ Iyayi! Amlece Mlungu msyene apelece cilango kwa ŵandu ŵa kulemwawo, kuti jemanjajo amanyilile kuti Mlungu akusapeleka cilango kwa ŵandu ŵa ulemwa.

²⁰ Amkunde Mlungu Jwamaciligosope kuti apelece cilango.

²¹ Ana mundu jwam'we mpaka aganisye ya liŵasa lyakwe, jwalakwejo ndaŵi jakwe jakutama pasi pano jili jimasile?

²² Ana pana jwine jwa mpaka amjiganye Mlungu lunda, jwele jwakusiŵalamulila ŵakusamtumicila Mlungujo kwinani.

²³ Ŵane akusaŵa ali ŵakusicila mnope, ali pambone soni ŵangatenda woga ni cilicose.

²⁴ Cilu cawo cikusaŵa cakwimbala ligongo lya kulya cenene, soni cilu cawo cili cakoloŵa mpela ca mcanda.

²⁵ Ŵandu ŵane akusatamaga mwangakondwa nipo akusawaga ali ŵakulaga.

²⁶ Nambo ŵakusicila ni ŵakulaga ŵakwe, wosopewo akusawa ni kwasika m'malembe nipo yilu yawo yikusalidwa ni mbisu.

²⁷ “Acimjangu, une ngumanyilila yimkuganisya jemanja, ngumanyilila soni ya malindi gimkusaka kundendela une.

²⁸ Jemanja mkusawusyanaga kuti, ‘Ana nyumba ja ŵakulungwa ŵala jili kwapi? Ana nyumba ja jwakulamulila jwangalwe jula jili kwapi?’

²⁹ Ana jemanja nganimwawusyeje ŵandu ŵakwenda mu msewu, ni kulupilila yiŵamjanjile jemanjajo?

³⁰ Pa lisiku lyakuti Mlungu tapelece cilango kwa ŵandu ŵakulemwa, mundu jwakulemwa jwangapedwa cilango, akusakulupuka pa lisiku lyakuwonecela lutumbilo lwa Mlungu.

³¹ Pangali mundu jwalijose jwakusamjamuka jwalakwe pa ulemwa wakwe, kapena kumwucisya yakusakala yiŵatesile jwalakwejo.

³² Pandaŵi jamjigele jwalakwejo kwawula najo kukumsika ku malembe, akusagalolela malembego.

³³ Ŵandu ŵajinji akusakuya kuwukuja mtembo wakwe, Ŵandu ŵakusajenda pasogolo pakwe akusaŵaga ŵangaŵalanjika, soni akusaja ku kusika mtembowo cenenepe.

³⁴ Nambi jemanja timcindulasya une uli ni maloŵe genu gangali matega? Yosope yimjanjileyi yili ya unami.”