Yobu 18 - Chiyawo Bible

Bilidadi

^1-2 Yobu, ana m'mwejo ngakomboleka kutama jii? Mtame jii, mpikanile nipo uwe tuŵecete.

³ Ana kapena mkuganisya kuti uwe tuli yinyama? Ligongo cici tukuwoneka mpela kuti nganitukola lunda pameso penu?

⁴ M'mwejo mgamba kulisawusya ni lutumbilo lwenu. Ana mkuganisya kuti cilambo capasi cikwenela kuŵa masame mtande wakuti m'mwejo mtumbile? Ana mkuganisya kuti Mlungu akwenela kutyosya matumbi pa malo pigali kuti amsangalasye m'mwejo?

⁵ Iyayi, umi wa mundu jwakusakala tiwucimala mpela mulikusajawulila lilanguka.

⁶ Taciŵa mpela m'nyumba mwele muli mwangali lilanguka lya nyali.

⁷ Akusajenda mwangali cikulupi, soni lunda lwele luŵapaga acimjakwe lulolo lukusilumlepelesya.

⁸ Ndamo jakwe jikusamtendesya jwalakwejo kuti akuŵale, akusaliŵata pa lisimbo nipo akusagwilamo.

⁹ Ciliŵata cikusamtega pa lukongolo nipo akusatanjila.

¹⁰ Jwine jwakwe akusatega ciliŵata mu msewu mwakusajenda jwalakwejo.

¹¹ Yindu yayikumtendesya woga yimsyungulile jwalakwejo;

¹² Jwalakwejo jimkwete sala nipo jwangali macili; soni yipwetesi yikumjembecela.

¹³ Akamwilwe ni cilwele cilu cosope, mwakuti ngongolo ni makono yosope yiwosile.

¹⁴ Ciwa cikusamtyosya mundu jwakusakalajo, m'nyumba muŵatamaga cenene. Akusamjigalila jwalakwejo kwa mwenye jwa ŵandu ŵawe.

¹⁵ M'nyumba mwakwe mwangali cilicose; amisilemo sulufule* kuti awulaje tuyilombo twa yilwele.

¹⁶ Miciga jakwe jikumula, soni nyambi syakwe sikunyala.

¹⁷ Ngasakumbucila soni kumangwawo kapena kwine kulikose nipo lina lyakwe tiliciliŵalicika.

¹⁸ Tacimtyosya ku cilambo ca ŵandu ŵa cijumi ni kwaponya ku cipi, ni kwatoposya pa cilambo capasi.

¹⁹ Ngasayiwona yisukulu mwiŵasa mwakwe. Ngasikuwoneka soni ŵanace ŵakusigalako.

²⁰ Ŵandu ŵakungopoko lyuŵa asimonjile ni likungu lyakwelyo, nombe nawo ŵandu ŵa kungapilo lyuŵa agamba kupukunya mitwe kumala lunda.

²¹ Kweli yeleyi ni yayikusiyatendecela ŵandu ŵakusakala, jeleji ni mbesi ja ŵandu ŵangasamala ya Mlungu.