Yobu 16 - Chiyawo Bible

Yobu

^1-2 Maloŵe gelego nagapikene kala. Jemanja wosope mli ŵandu ŵangapakombola kumtulasya mundu mtima.

³ Ana timciŵa mli mkukulupilila yindu yangali mateyi mpaka cakaci? Ana cikumsawusya cici kuti mŵeceteje gele maloŵega?

⁴ Une soni ngaŵecete mpela m'mwejo, mkaŵe kuti mli mpela mumbelele unemu. Une ngapakombwele kuŵeceta mpela mumkuŵecetelamu. Une ngampukunyile m'mwejo mtwe.

⁵ Ngamlimbisye ni maloŵe gangu, ngamtulesye mu mtima mwenu ni kunandiya yipwetesi yenu.

⁶ Unetu naga nguŵeceta, yipwetesi yangu yanganandipilanandipila, nipo naga ngutama jii yipwetesiyo yikusaŵa ciŵela.

⁷ Yakuwona, Mlungu amasile une macili, alijonasile liŵasa lyangu lyosope.

⁸ Jwalakwejo angamwile une, nipo aŵele sambano m'magongo jwangu, umboni wakulosya kuti une ndili jwakulemwa. Une sigele mawupawupape, yeleyi yili umboni wakuti une ndili jwakulemwa.

⁹ Mpela cinyama mucikusapaculila nyama, Mlungu ambaculenye une mu lutumbilo lwakwe. M'magongo jwangu akungopocesya meso.

¹⁰ Ŵandu akusandola une ni kusekaga, Akusambunjicila ni akusambuta pejeje mwacipongwe.

¹¹ Mlungu ambelece une kwa ŵandu ŵangali canasa, nipo ambonyisye myala mwa ŵandu ŵakusakala.

¹² Naliji pa mtendele, nipo Mlungu ŵanjanyandile une. Ŵangamwile une pa lukosi ni kuswanya yiduswayiduswa. Ŵanjimice kuti mbe mpela malo gakwe gakuponyelapo candamale.

¹³ Mipamba jakwe jikusoma une mbali syosope, asomile mbyo syangu mwangatenda canasa ni kujijasila pasi ndulu jangu.

¹⁴ Jwalakwejo akusalimbana ni une kaŵilikaŵili, mpela msilikali jwa ngondo nipo akusambulasya.

¹⁵ Une mbwete yakuwala ya yisaka yakusawala ŵandu ŵakulila, nipo une ambundile nditu.

¹⁶ Meso gangu gacejele mtande wa kulila, nipo yikope yangu yiyimbile mnope

¹⁷ Nambo une nganindenda cakusakala cilicose, nipo lipopelo lyangu pameso pa Mlungu lili lyakulungama.

¹⁸ M'mwe cilambo capasi, mkasisa yakusakala yandendele une. Kulila kwangu kukusosa cikamucisyo kukamala.

¹⁹ Sambano jino kwinani kwana mundu jwine jwakwe jwakunjijila une.

²⁰ Acimjangu akunyosya une; myoyo une ngulilila kwa Mlungu kuti angamusye.

²¹ Kukasimanikwe mundu jwakuti akambembecele kwa Mlungu, jwalakwejo akajile kukumbembecela une mpela mwakusatendela mundu ni mjakwe.

²² Masiku gangu gakutama pa cilambo capasi gali gapanandi; nipo tinjiwa, ngasimba soni cijumi.