Yobu 13 - Chiyawo Bible

^1-2 Yosope yimkuŵecetayi nayiweni ni meso gangu, nayipikene soni ni mapikanilo gangu nipo nayipikanicisye. Yindu yakuyimanyilila wawo, none jwakwe ngusayimanyilila, Une nganimba mundu jwangali mate kwa wawo.

³ Nambo une nganonyele kuti mbecetane ni Mlungu, nganonyele kuŵeceta nawo ya magambo gangu ngaŵaga ni m'mwejo.

⁴ Jemanja mkusayitendekasyaga yindu kuti yiŵe cenene pakusala ya unami. Jemanja wosope mli mpela asing'anga wa unami.

⁵ Une sacileje kuti m'mwejo mkalosisye kuti mli ŵalunda pagamba kutama jii, ngaŵeceta cilicose.

⁶ Sambano apikane yitimbecete, atame jii kuti apikane yitilongosole ya magambo gangu.

⁷ Ana ligongo cici kumlambucisya Mlungu, ni kuŵecetaga ya unami mu lina lyakwe?

⁸ Ana mkusaka kulosya kuti kumjimila jwalakwejo? Ana mkusaka kuŵa ŵakumjimilila Mlungu pa magambo?

⁹ Naga Mlungu akwalolecesya jemanja cenene, ana jwalakwejo tasimane kuti jemanja mli ŵangalemwa? Ana mpaka yikombolece mundu kumlambusya Mlungu mpela mwakusamlambucisya mundu mjakwe?

¹⁰ Kweli Mlungu tacimjamuka naga mtendeje yakulosya kunonyela mbali jimo.

¹¹ Ana ukulungwa wakwe ngawukumjogoya? Ana macili gakwe ngagakumtesya woga?

¹² Misyungu jenuji jili jangali mate mpela liwu. Maloŵe gimkuŵeceta kuti mlicinjilicisye nago gali gangali mate mpela lilongo.

¹³ Atame jii ni kumba une lipesa lyakuti mbecete, nipo yakutendekwa kwa une yitendekwe.

¹⁴ Naliŵicile cile kuwupeleka umi wangu, kanga kuwa timbwe basi.

¹⁵ Atamose kuti Mlungu ambulaje une, une tinjipitilisya kumkulupilila, soni tinjilondesya magambo gangu pameso pakwe.

¹⁶ Tinjijima pameso pakwe nipo jwalakwejo tacingulupusya une, pakuti mundu jwakusakala ngaŵa mkuwonegana ni Mlungu.

¹⁷ Mpikanicisye cenene maloŵe gangu, soni mgapikanicisye cenene maloŵe gitinamsalile m'mwejo.

¹⁸ Magambo gangu nagakolosisye, soni ngumanyilila kuti ngasasimana ni cileŵi cilicose.

¹⁹ Ana ŵani ŵakusaka kutenda makani ni une? Naga Mlungu akusimana kuti une ndili jwakulemwa, tinjileka kuŵeceta, atamose kuwa kwene.

²⁰ Ŵalakwe Mlungu, une ngwaŵenda yindu yiŵilipe, nipo ngasinasisila ngope jangu.

²¹ Alece kumba une cilango ni kunjogoya une.

²² Ŵalakwe atande kuŵeceta nipo tinajanje ŵalakwe, kapena une ndande kuŵeceta kuti Ŵalakwe anjanje.

²³ Ana yileŵi yangu ni ulemwa wangu yili yilingwa? Amanyisye une, yileŵi ni ulemwa wangu.

²⁴ Ana ligongo cici ŵalakwe ngakusaka kusyoŵekana ni une, ni kunjigala une mpela m'magongo jwawo.

²⁵ Ana akusaka kunjogoya une? Unetu nganimba kandu ndili mpela lisamba lyakuguluka ni mbungo.

²⁶ Ŵalakwe akunjimba une magambo gakogoya gagakusala ya yileŵi yinatesile pinaliji mcanda.

²⁷ Ŵalakwe akusataŵa ngongolo syangu ni ceni celuceluce, soni akusalolela wende wangu ni kulolecesya pasi pasiliŵete sajo syangu.

²⁸ Yakuyicisya yakwe yili yakuti unetu ngunupuka mpela cakuwala cicililidwe ni yijosolo.