Yobu 12 - Chiyawo Bible

Yobu

^1-2 Jemanja mli ŵandu ŵakusosekwa, pitimciwapo nombe nalo lunda lwenu tiluciwa pampepe ni jemanja.

³ Nambo une soni ngwete lunda mpela mumkolele jemanja; une nganimba mundu jwangali mate kwa jemanja, soni jwalijose akuyimanyilila yosope yimŵeceteyi.

⁴ Une ndili cindu cakusecesya kwa acimjangu; Une naŵendile kwa Mlungu nipo jwalakwejo jwanjanjile, une mundu jwakulungama soni jwangali magambo, nambo sambano jino ndili cindu cakusecesya.

⁵ Mundu jwele jwali pambone akusiŵanyosya acimjakwe ŵali pa yipwetesi. Likungu likusamyicilila mundu jwali kala pa yipwetesi.

⁶ Nambo ŵandu ŵaciswamba akusatama pa mtendele, ŵele ŵakusamtanda Mlungu ni ŵakusaŵa pambone.

⁷ Myiwusye yinyama yamwitinji ni yijuni kuti yimjiganye m'mwejo ya Mlungu.

⁸ Myiwusye yiwumbe ya cilambo capasi kuti yimjiganye, nipo somba sya m'nyasa tisicim'manyisya m'mwejo.

⁹ Ana mwa yosopeyi pana cingangucimanyilila kuti yosopeyi yapanganyidwe ni AMBUJE?

¹⁰ Ya umi yosope yili myala mwa Mlungu, soni mwana umi wa mitundu josope ja ŵandu.

¹¹ Ana pa ndaŵi japikene mundu maloŵe gakuŵecetedwa, ana jwalakwejo jwangasaka kuti agapime maloŵego amanyilile cakuwona cisyesyene? Yakuwona jwalakwejo akusagapima maloŵego. Yili yalumo kuti mundu akusapasya yakulya nipo akusasimana kuti yine yikunong'a cenene, nambo yine ngayikunong'a.

¹² Yisyene, lunda luli ni ŵandu ŵacekulupe, ŵandu ŵa ula sya kala ali ŵakupikanicisya yindu.

¹³ Mlungu ali jwalunda ni jwamacili gejinji, jwalakwejo akwete upungu wambone soni akusapikanicisya yindu.

¹⁴ Mlungu naga apaswile cine cakwe, pangali soni mundu jwine jwa mpaka acitaŵe soni. Mlungu naga akumwugalila jwine jwakwe mu ukayidi ana pana mundu jwine jwampaka amwugulile mundujo kutyoka mu ukayidi?

¹⁵ Naga Mlungu akujitaŵa ula, cilambo cikusajumula; naga akujigopola ula, mesi gakusasefucila pa cilambo.

¹⁶ Jwalakwejo akwete lunda ni macili gosope, ŵandu ŵakuloŵesyedwa ni ŵakusiŵaloŵesya acimjawo, wosopewo ali pasi pa ulamusi wakwe.

¹⁷ Jwalakwejo akusasumula lunda lwa ŵakulamulila ni kwatendekasya ŵakulamulilawo kuti aŵe mpela ŵakuloŵela.

¹⁸ Jwalakwejo akusiŵagopola ŵandu ŵa mwenye ŵali mu ukayidi, nipo akusiŵataŵa ayimwenewo.

¹⁹ Akusiŵasokonesya ŵakutaga mbopesi ali ŵasumwile lunda lwawo, soni akusiŵatulusya ŵakulamulila ŵamacili.

²⁰ Jwalakwejo akusiŵatamikaga jii apungu ŵa mwenye ŵakulupicika, soni akusiŵasumula lunda acakulungwakulungwa.

²¹ Akusiŵanyosya ŵandu ŵali ŵakupikanika soni akusiŵamala macili ŵandu ŵakulimbangana.

²² Jwalakwe akusawunukula yindu yayili mu cipi nipo cipico akusacisandusya kuŵa lilanguka.

²³ Akusajikusya mitundu jine ja ŵandu, nambo jine akusajijonanga. Akusaculuya ngosyo, kaneko akusasimwasanya soni.

²⁴ Akusiŵasandusya acimlongola kuti aŵe ŵakuloŵela, ni kwajendesyaga mcipululu mwele muli mwangali litala.

²⁵ Jemanjajo akusasosasosa litala macini mwele muli mwangali lilanguka ni kwendaga mpela ŵakolelwe.