Yobu 11 - Chiyawo Bible

Sofali

^1-2 Ana mundu jwamasegwe akusajanjidwaga? Ana kulongolola kukusamtendesya mundu kuti aŵe jwakulungama?

³ Ana masegwe genugo mpaka kumtendesye mundu jwalijose kutama jii? Naga mkwaseka ŵane, ana ngasasimanikwa jwine jwalijose jwakumjamuka m'mwejo?

⁴ M'mwejo mkusatiji kuti yimkusaŵeceta yili yakuwona, mkusatiji kuti mli ŵambone pameso pa Mlungu.

⁵ Sacileje kuti Mlungu akaŵecete namwe

⁶ ni kum'manyisya yindu yakusisika yejinji. Lunda lwa jwalakwejo luli lwakusokoka, soni m'manyilile kuti Mlungu akumpa cilango camnono kulekangana ni citimkapocele.

⁷ Ana mpaka mpakombole kuyipikanicisya yindu yakusisika ya ukulungwa ni macili ga Mlungu yayili yakusawusya mnope kuti ŵandu ayipikanicisye?

⁸ Lunda lwa Mlungu luli lwekulungwa mnope kupunda kwinani. Nambi ŵalakwe mpaka atende cici? Mbesi ja lunda lwa Mlungu jili jakusokoka mnope kupunda cilambo ca ŵandu ŵawe. Nambi wawo mpaka amanyilile cici?

⁹ Lunda lwa Mlungu luli lwekulungwa kupunda ulewu wa cilambo capasi ni mcijipi mwa nyasa syekulungwa mnope.

¹⁰ Naga Mlungu akwika ni kumŵika m'mwejo mu ukayidi ni kumjigalila m'mwejo ku nganya, ana ŵani mpaka amlekasye jwalakwejo?

¹¹ Mlungu akusiŵamanyilila ŵandu ŵali ŵa unami, Mlungu naga akuwuwona ulemwa wa ŵandu ana jwalakwejo mpaka agambeje kusileka myoyo ngatendapo kandu?

¹² Paja akusatiji kuti, jwakuloŵela ali jwakuloŵela basi, nipo bulu jwamwitinji ni jwamwitinji basi.

¹³ Nambo kwa ŵalakwe Yobu atameje mwakulungama, soni apopeleje kwa Mlungu kuti ŵatendele wawo canasa.

¹⁴ Naga mtesile yangalumbana, mtyosye yimlemwisyeyo soni mkakunda kuti cakusakala cilicose ciŵe mu mtima mwenu.

¹⁵ Naga mkutenda yeleyo, ni kuti soni syenu syosope tisicimala, nipo ngasimgwisya pasi ngope jenu. Mtima wenu tiwucitamilicika nipo ngasimjogopa cilicose.

¹⁶ Timciliŵalila yisawusyo yenu, tiyiciŵa mpela mesi gagapite kala pasi pa mlato.

¹⁷ Pelepo umi wenu tiwucinyesimila mpela kuŵala kwa lyuŵa ndaŵi ja musi, nipo yisawusyo yimkusimana nayo tiyicicenga mpela mucikusasindila cipi kuŵa lilanguka.

¹⁸ Timcilimba mtima ligongo lyakuti tipaciŵa pana cikulupi. Mlungu tacimcinjilicisya, soni timcipumula mwa mtendele.

¹⁹ Pandaŵi jitimcigonaga pangali jwalijose jutacimlagasya m'mwejo. Ŵandu ŵajinji tacimŵenda kuti mwakamusye.

²⁰ Ŵandu ŵakusakala tacilepela kuyiwona yakuwona yisyesyene, soni ngasaciwona cikamucisyo cisyesyene, kwa ŵandu ŵamti myiyi kwangali soni cembeceyo cine, nambo ciwa basi.