Yobu 10 - Chiyawo Bible

¹ Mbesile nawo umi wangu. Myoyo tinjiŵeceta yidandawulo yangu mwagopoka. Tinjisala yipwetesi yosope ya mu mtima.

² Tinjimsalila Mlungu kuti, akasandamula une kuti ndili jwakulemwa. Nambo amanyisye une ligongo lyakukanganila ni une.

³ Ana yili yambone kuti wawo andagasye ni kunyosya une, ciwumbe cawo ni kwaŵicila kunyuma ŵandu ŵakusakala?

⁴ Ana wawo akusayiwona yindu mpela mwakusalolela mundu?

⁵ Ana masiku ga ŵalakwe gali gejipi mpela masiku ga mundu? Ana yaka ya ŵalakwe yili mpela yaka ya mundu?

⁶ Ana ligongo cici akusosa kumanyilila yileŵi yangu, ni kusosa kusimana une ni magambo?

⁷ Ŵalakwe akumanyilila kuti une ndili jwangalemwa, soni pangali jwalijose jwa mpaka angulupusye une kwa ŵalakwe.

⁸ Ŵalakwe ŵangumbile ni kumbanganya une, nambo sambano ŵalakwe akusaka kunjonanga une ni magasa gawo pego.

⁹ Akusaliŵalila ŵalakwe Mlungu kuti ŵambanganyisye une ni lilongo. Ana akusaka kumbucisya soni ku luwundu kukoko?

¹⁰ Ana eti paja ŵalakwe ŵapele baba ŵangu macili gakuti apakombole kumbeleka une, ana eti paja ŵalakwe ŵasamalile une cenene mcitumbo mwa mama ŵangu?

¹¹ Ŵalakwe ŵapanganyisye cilu cangu soni ŵacipele lipende ni mnowu, ŵalakwe ŵalumbikenye mawupa gangu ni mnowu.

¹² Ŵalakwe ŵambele une umi ni cinonyelo cangamala; soni ŵasamalile une kuti mbe cijumi.

¹³ Ndaŵi josopeji ŵalakwe ŵasisaga nganisyo syawo. Nambo sambano manyilile kuti yeleyi ni yiŵaliji mkuganisya ŵalakwe.

¹⁴ Ŵalakwe ŵaliji mkundolecesya une kuti alole naga tindemwe, soni nganasaka kungululucila cileŵi cangu cilicose.

¹⁵ Naga akusimana kuti une ndili jwakulemwa likungu lili ni une. Naga akusimana kuti une ndili jwangalemwa ngope jangu tijikole soni, pakuti ngwete soni, pakuyiwona yisawusyo yanguyi.

¹⁶ Naga ngulilimbisya mtima, ŵalakwe akusaŵa mpela lisimba lyakusakula, akusasaka kunjogoya ni macili gawo.

¹⁷ Akusambicila mboni sya kungamba une, lutumbilo lwa ŵalakwe lukusaja msogolo, soni makuga ga ŵalakwe gakusaka kulimbana ni une gakusatupila tupila.

¹⁸ Ŵalakwe Mlungu, ana ligongo cici ŵangundile une kuti mbagwe? Yikaliji cenene kuti ngawe mkanimbonece kwa jwalijose.

¹⁹ Bola ngagambe kuŵa mpela mbundumuko basi, ni kuti akanjigele pa ndaŵi jakupagwajo kwawula nane ku malembe.

²⁰ Ana masiku ga umi wangu ngati gali gakuŵalanjika? Agambe kundeka basi kuti mbumule panandi,

²¹ mkaninjawule kumalo kwangakukumanyilila, cilambo ca ŵandu ŵawe, ku cili cipi cakogoya,

²² ku cilambo ca cipi ni njojo, kulikusasanduka lilanguka kuŵa cipi.