Yobu 1 - Chiyawo Bible

Satana akumlinga Yobu

¹ Ku cilambo ca Usi kwapali mundu lina lyakwe Yobu, jwalakweju jwaliji jwangalemwa soni jwaliji jwakulungama pakuti ŵampikanilaga Mlungu ni kuliŵambasya ku matala gakusakala.

² Yobu ŵakwete ŵanace ŵacalume msano ni ŵaŵili ni ŵacakongwe ŵatatu.

³ Jwalakwejo ŵakwete ngondolo 7,000, ngamila* 3,000, ng'ombe 5,000, ni acibulu 5,000. Ŵakwete soni ŵandu ŵamasengo ŵajinji pakuti ŵaliji jwakusicila mnope kwapunda ŵandu wosope ŵa ku yilambo ya kungopoko lyuŵa.

⁴ Ŵanace ŵa Yobu ŵacalume ŵatendaga cindimba mwakucenganacengana, lisiku line kwa jwine lisiku line kwa jwine. Piŵatendaga yindimba yawoyo ŵaŵilangaga acalumbu ŵawo ŵatatu ŵala.

⁵ Gali gamasile masiku ga cindimba, Yobu ŵajimukaga kundaŵi kulikose nipo ŵampelecelaga mbopesi mwanace jwakwe jwalijose ni cakulinga cakuti ŵanacewo lyatyoce likungu. Ŵatendaga yeleyi ligongo ŵaganisyaga kuti mwine mwakwe ŵane mwa ŵanace ŵa Yobuwo alemwisye pakumtukana Mlungu mwamele.

⁶ Lisiku line malayika pigayice kukuwonecela pameso pa AMBUJE,* nombe najo Satana* ŵaliji sikati ja jemanjajo.

⁷ AMBUJE ŵamwusisye Satana kuti, “Ana mkutyocela kwapi?” Satana ŵajanjile kuti, “Mbele ndili gamba kwendajenda mcilambomu.”

⁸ AMBUJE ŵamwusisye soni Satana kuti, “Ana mkum'manyilila Yobu, jwakutumicila jwangu? Pa cilambo capasi pangali soni jwine jwakulandana ni jwalakwejo pakuti jwelejo ali jwangalemwa soni jwakulungama.”

⁹ Satana ŵajanjile AMBUJE kuti, “Ana wawo akupela kuti Yobu jula akusagamba kwacimbicisya wawo mwa mtega?

¹⁰ Wawo aŵele ali kumcinjilicisya jwalakwe jula, pamo ni liŵasa lyakwe ni yindu yosope yakwete. Wawo soni ŵajaliwasisye yosope yakusatenda jwalakwejo, nipo yilangwa yakwe yili yejinji mcilambomo.

¹¹ Sambano agambe kulinga kumtyocesya jwalakwejo yakwete, jwalakwejo tacatukana wawojo ali mkulola.”

¹² AMBUJE ŵamjanjile Satana kuti, “Cambone, yindu yosope yakwete Yobu tinayiŵice m'myala mwenu, nambo mkasimumwulaga jwalakwejo.” Mlungu piŵamasile kuŵeceta Satana ŵatyosile, nipo ŵajile kukumlinga Yobu.

Ŵanace ŵa Yobu akuwulajidwa, soni yipanje yakwe yikonasika

¹³ Lisiku line ŵanace ŵa Yobu ŵacalume ni ŵacakongwe ŵaliji mkutenda cindimba ku nyumba ja mkulugwawo,

¹⁴ nipo jwamtenga jwayice kwa Yobu ali mkuwutuka kukwasalila kuti, “Pitwaliji mkulima, soni acibulu piŵaliji mkulya pakuŵandika,

¹⁵ mwakusisimusya kwayice ŵandu ŵa ku Sabiya kukuputa ngondo ni uwe nipo ŵasumwile ng'ombe ni acibuluwo. Jemanjajo ŵawuleje ŵamasengo wosope, nambo une jikape ni jungulupwice nipo mbice kukwasalila ŵalakwe.”

¹⁶ Jwalakwejo piŵaliji mkuŵeceta, jwamtenga jwine jwaŵili jwayice ni jwatite kuti, “Njasi jamesisye nipo jiwuleje ngondolo syosope pamo ni ŵakucinga wakwe. Une jikape ni jungulupwice nipo mbice kukwasalila ŵalakwe.”

¹⁷ Jwalakwejo mkinamalisye kuŵeceta, jwakutumicila jwine jwatatu jwayice ni jwatite kuti, “Kwayice makuga gatatu ga ŵandu ŵa ku Babiloniya kuputa ngondo ni uwe nipo ajiŵile ngamila syosope soni kwawulaga ŵamasengo wosope. Une jikape ni jungulupwice ni mbice kukwasalila ŵalakwe.”

¹⁸ Jwalakwejo mkinamalisye kuŵeceta, jwayice jwakutumicila jwine jwa mcece ni jwatite kuti, “Ŵanace ŵenu wosope ŵaliji mkutenda cindimba m'nyumba ja mkulugwawo,

¹⁹ mwacisisimucila mbungo jamacili ja ku cipululu japujile ni kugwisya nyumbajo nipo ŵanace ŵenu awilile m'momo. Une jikape ni jungulupwice nipo mbice kukwasalila ŵalakwe.”

²⁰ Yobu piŵapikene yeleyi, ŵapapwile yakuwala yakwe, soni ŵamyosile mu mtwe mwakwe ligongo lya canasa cekulungwa ciŵakwete. Ŵatindiŵele pasi, nipo ŵamlambile Mlungu.

²¹ Ŵatite kuti, “Mcilu mwa mama ŵangu nganimbagwa ni kandu kalikose, nipo tinjiwa ndili jwangali kandu kalikose. AMBUJE ŵapelece, nipo sambano jino ajigele soni. Lina lyawo licimbicikwe!”

²² Atamose kuti yindu yaliji myiyi, Yobu nganatenda sambi kapena kuŵeceta kuti Mlungu alemwisye.