Yesaya 9 - Chiyawo Bible

¹ Nambo ŵele uŵaliji mkulaga, ngasaŵa soni mu yipwetesi mpaka kalakala. Kalakala Mlungu ŵayinyosyaga yilambo ya Sebuloni ni Nafutali, nambo msogolo muno tacicitenda cilambo cosopeci kuŵa ca ucimbicimbi, kutyocela ku Nyasa ja Mediteleniyani kungopoko lyuŵa mpaka kuja kwika ku cilambo capesi pa Lusulo lwa Yolodani, cilambo ca Galileya ca ŵandu ŵa mitundu jine.*

Mwenye jwa msogolo

² Ŵandu uŵajendaga mcipi, aliweni lilanguka lyekulungwa. Ŵele uŵatamaga mcilambo ca cipi mnope, sambano lilanguka lyawonecele jemanjajo.

³ AMBUJE ŵalakwe ajonjecesye lukondwa pa ŵandu ŵawo, pakuwuculuya mtundu wawo, Jemanjajo ali ŵakusengwa pameso pa ŵalakwe, mpela mwakusasengwela ŵandu mu ndaŵi ja masika, nambo soni mpela mwakusasengwela ŵandu mu ndaŵi jakugaŵana yindu yakusumula ku ngondo.

⁴ Pakuti mtemangwile likongwa liŵasitopelwaga nalyo, soni simbo siŵaputilaga makoyo gawo, nambo soni cikoti ca ŵandu ŵakulagasya, mpela mwatendele pakwapunda Amidiyani.

⁵ Sapato sya asilikali ŵa ngondo, soni yakuwala yawo yesakale ni miasi, taciyijonanga ni moto.

⁶ Mwanace atupagwile uwe! Mwanace jwamlume apelecedwe kwa uwe. Nipo taŵe jwakutulamulila. Tacimpa lina lyakuti, “Pungu Jwakusimonjesya, Mlungu jwamacili, Atati ŵangali mbesi, Mwenye jwa Mtendele.”

⁷ Macili ga ulamusi wakwe tigaciŵa gangali mbesi, ucimwene wakwe tiwuciŵa wa mtendele ndaŵi syosope. Tacilamula mpela muŵatendele nangolo jwakwe Mwenye Daudi,* ulamusi wakwe taciwutamilisya ni kuwulimbanganya, pakulosya cilungamo soni kulungamika, kutandila ndaŵi jelejo mpaka ndaŵi syangamala. AMBUJE* Ŵamaciligosope akwete lung'wanu lwakuyitenda yosopeyi.

AMBUJE tacipeleka cilango kwa Isalaeli

⁸ AMBUJE atumisye maloŵe gakuwusisya ucimwene wa Isalaeli, maloŵego agaŵecete kwa yisukulu ya Yakobo.*

⁹ Nipo ŵandu wosope ŵa ku Isalaeli tacimanyilila, ni wosope ŵakutama mu msinda wa Samaliya, tacimanyilila kuti Mlungu ayitesile yeleyi. Jemanjajo akusaŵeceta mwakusimbwa ni mwakulikwesya acitiji kuti,

¹⁰ “Atamose nyumba syetaŵe ni njelwa sigumwice, nambo tutaŵe sine ni maganga gakusepa. Atamose kuti migomba ja mkuju jigwisidwe, m'malo mwakwe, uwe tuciŵika migomba ja matabwa ga mkungusa.”

¹¹ Nambo AMBUJE ŵajimucisye amagongo, nipo ŵacisisye amagongowo kuti amenyane ngondo ni jemanjajo.

¹² Ŵatumisye Asiliya kutyocela kungopoko lyuŵa ni Afilisiti kutyocela kungapilo lyuŵa, yiwugwile kukamwa kuti yatawune Aisalaeli. Nambo lutumbilo lwa Mlungu nganilutyoce, atamose Mlungu ayitesile yosopeyi. Mkono wakwe soni uli citambasukulile, kusosa kuti ŵape cilango.

¹³ Ŵandu welewo nganawujilila kwa Mlungu jwakwawulaga, soni nganapesya ni kwasosasosa AMBUJE Ŵamaciligosope.

¹⁴ Ni ligongo lyakwe AMBUJE akatile mtwe ni mcila wa Aisalaeli, nyambi sya kanjesa ni matete gakwe pa lisiku limo.

¹⁵ Acakulungwa ni ŵakucimbicikwa wosope ali mtwe, soni ŵakulocesya ni ŵakwiganya ya unami ali mcila.

¹⁶ Ŵandu ŵakwalongolela ŵanduŵa akusiŵasokonesya, nipo ŵandu ŵakulongoleledwaŵa akusajasika.

¹⁷ Ni ligongo lyakwe AMBUJE ngasasengwa ni acacanda, nipo ngasiŵatendela canasa ŵanace ŵamasije soni acakongwe ŵamasije.* Pakuti pangali jwalijose jwakumjogopa Mlungu, wosope ali ŵakuleŵa, pakamwa palipose pakusaŵeceta yangalumbana. Atamose yosopeyi yitendekwe nambo lutumbilo lwa Mlungu nganilutyoce, mkono wakwe uli ciŵela citambasukulile, kusosa kwapa cilango.

¹⁸ Kusakala kwa jemanja kukusakolela mpela moto, wele ukusajoca miŵa, wele ukusajoca yitekete, nipo lyosi lyakwe likusatenda tolo mwinani mpela liwunde.

¹⁹ Ni ligongo lyakwe lutumbilo lwa AMBUJE Ŵamaciligosope lujocile cilambo, nipo ŵandu ali mpela sasu syakwisila pamoto, pangali mundu jwakumtendela canasa mlongo mjakwe.

²⁰ Ni mkono wakumlyo akusapata yakulya ni kulya, nambo ngajikuta, ni mkono wakumciji akusapata yakulya ni kulya nambo sala jangamala. Cisigele cili cakuti alyaneje jwine ni mjakwe.

²¹ Ngosyo sya Manase sikuputa ngondo ni ngosyo sya Efelemu, wosopeŵa akuputana ngondo ni Yuda. Atamose yili myiyi, lutumbilo lwa Mlungu nganilumale; mkono wakwe uli ciŵela citambasukulile, kusosa kwapa cilango.