Yesaya 8 - Chiyawo Bible

Mwanace jwamlume jwa Yesaya mpela cimanyisyo kwa ŵandu

¹ AMBUJE* ŵaŵecete ni une kuti, “Mjigale pakulembela pekulungwa nipo mlembepo malemba gekulungwa: ‘Konanga kwacitema, Kusumula kwangakaŵa.’

² Nipo najigele mboni syakulupicika siŵili, jwakutaga mbopesi lina lyakwe Uliya ni Sakaliya mwanace jwamlume jwa Yebelekiya kuti andendele umboni.”

³ Pijapite ndaŵi ŵamkwangu ŵakwete citumbo nipo ŵaŵelece mwanace jwamlume. Pelepo AMBUJE ŵaŵecete ni une kuti, “Mumpe lina lyakuti ‘KONANGA KWACITEMA KUSUMULA KWANGAKAŴA’.

⁴ Pakuti mwanacejo mkanatande kuŵilanga kuti ‘Baba’ kapena kuti ‘Mama’, cipanje ca Damasiko ni yindu yakusumula ku ngondo ya Asamaliya* tiyicijigalidwa ni mwenye jwa ku Asiliya.”

Mwenye jwa ku Asiliya akwisa

⁵ AMBUJE ŵaŵecete soni ni une.

⁶ Ŵatite, “Ligongo lyakuti ŵandu ŵa cilambo aci agakanile mesi gangu ga ku Shilowa gele gakusajenda mbolembole, nipo akusamsangalalila Lesini ni Peka mwanace jwa Lemaliya.

⁷ Ni ligongo lyakwe Une AMBUJE, tinjituma mwenye jwa ku Asiliya ni asilikali ŵakwe wa ngondo kuti apute ngondo ni Yuda. Ŵeleŵa taciyika mpela mesi gatutumule ga mu Lusulo lwa Yufuleti gakusewucila pa mikuli jakwe josope.

⁸ Amagongo taciyika ku cilambo ca Yuda mpela mugakusasewucila mesi mpaka kuja kwika mu lukosi.” AMBUJE ali ni uwe, tacitenda mpela kutambasukula mapapiko gakwe ni kuwunicila nago cilambo cosope.

⁹ Msongane pamo ni woga, jemanja ŵa mitundu jine ja ŵandu, nipo mŵe ŵakutetemela. Mpikanicisye, jemanja yilambo yosope yakutali. M'wale yakuwala ya kungondo, nambope timcijonanjidwa. Elo kwene, mŵale yakuwala ya kungondo nambope timcimala.

¹⁰ Mkamulane pamo yakuti mtende, nambo yeleyo ngasiyikamula masengo. Mpangane yakutenda, nambo ngisiyikomboleka, pakuti Mlungu ali ni uwe.

AMBUJE akumkalamusya jwakulocesya

¹¹ AMBUJE ŵaŵecete mwamacili ni une, nipo ŵangalamwisye pakusalila kuti ngajenda mlitala lya ŵanduŵa. Ŵatite,

¹² “Mkatendaga nawo yele ŵandu ŵeleŵa yakusatenda, mkasiyijogopa yele jemanjajo yakuyijogopa, mkasimtenda nayo woga.

¹³ AMBUJE Ŵamaciligosope, ni ŵele mkwenela kwalola kuti ali ŵamswela, ali ŵele mkwenela kwajogopa, nditu, ali ŵele mkwenela kutenda nawo woga.

¹⁴ AMBUJE Ŵamaciligosope ni ŵele utaciŵa mpela malo gamaswela. Nambo kwa ŵandu wosope ŵa ku Yuda ni Isalaeli taciŵa mpela liganga lyakwakuŵasya ŵandu. Nambo soni mpela lwala lwakwagwisya ŵandu. Kwa ŵandu ŵa ku Yelusalemu taciŵa mpela lwawu.

¹⁵ Nipo ŵandu ŵajinji tacikuŵala pelepo. Tacigwa ni kukulipweteka. Tacikamulwa mu lwawu.”

Akwakalamusya ya ŵakuŵenda lunda ku misimu

¹⁶ Jemanja ŵakulijiganya ŵangu, msunje cenene ni kuwucinjilicisya utengawu, ŵambele une Mlungu.

¹⁷ Tinjajembecela AMBUJE, ŵele ŵakusisila ngope jakwe lukosyo lwa Yakobo,* nipo tinjiŵika cembeceyo cangu mwa jwalakwejo.

¹⁸ Mlole une pamo ni ŵanace ŵambele une AMBUJE, tuli yimanyisyo kwa Aisalaeli yakutyocela kwa AMBUJE Ŵamaciligosope ŵele ŵakusatama pa Litumbi lya Siyoni.

¹⁹ Naga ŵandu akumsalila kuti mjawule mkawusye ŵandu ŵakusaŵeceta ni misimu, ŵandu ŵakulondola yisango ŵele akusaŵeceta ni maloŵe gapasi ni kusongona, “Ana ŵandu ngakwenela kuŵenda lunda kutyocela kwa milungu jawo? Ana ŵandu ŵacijumi ngakwenela kuŵenda lunda kwa ŵandu ŵawe.”

²⁰ M'mwejo mkajanje kuti, “Mpikane yele yakumjiganya AMBUJE! Mkapikanilaga ŵakutenda ya misimu, yakuŵeceta jemanjajo ngaŵa mkutyosya yisawusyo.”

Ndaŵi ja yisawusyo

²¹ Ŵandu tacijenda mcilambo mwakulaga kwejinji ali ni sala. Ligongo lya salajo tacikalipa, nipo tacilola kwinani ni kumlwesa mwenye jwawo ni Mlungu jwawo.

²² Nambo pitacilola mcilambo capasi, tacigamba kuyiwona yisawusyope ni cipi cakogoya mnope. Myoyo tacajasa mcipi cakogoya.