Yesaya 7 - Chiyawo Bible

Utenga wakuja kwa Mwenye Ahasi

¹ Ndaŵi jele Ahasi mwanace jwa Yotamu, cisukulu ca Usiya, ŵaliji mwenye jwa ku Yuda, Lesini mwenye jwa ku Siliya nipo soni Peka mwanace jwa Lemaliya mwenye jwa ku Isalaeli, ŵayice ku Yelusalemu kuti apute ngondo ni msinda wa Yelusalemu, nambo nganakombola kuwupunda.

² Liŵasa lya mwenye jwa ku Yuda pilyapikene kuti cilambo ca Siliya cikamulene ni cilambo ca Isalaeli, mwenye jwa ku Yuda ni ŵandu wakwe wosope ŵatetemele, mpela muyikusatenganyicila yitela ni mbungo.

³ Pelepo AMBUJE* ŵamsalile Yesaya kuti, “Mjigale mwanace jwenu Sheya Yashubu, ni mjawule mkawonegane ni Ahasi. Jwalakwejo takamsimane petala lyakuja pa malo gele mundu Jwakuswejesya nguwo akusakamulila masengo, ku mtepa kwa ngalande ja mesi jakutyocela ku litamanda lya kumkuli.

⁴ Mkamsalile kuti aŵe jwakalamuka, nipo atame jii, akasajogopa soni mtima wakwe ukawujila panyuma ligongo lyakogoyedwa ni cilambo ca Lesini ni Siliya nipo soni Peka mwanace jwa Lemaliya. Jemanjaji ali mpela cisasu cagamba kutuka lyosipe.

⁵ Mwenye jwa ku Siliya ni ku Isalaeli akamulene kumtendela yakusakala. Ŵalakwe akuŵeceta kuti,

⁶ ‘Kwende tukalimbane ni cilambo ca Yuda, tukacijogoye. Tukacisumule kuti ciŵe cetuwe, nipo tumtende mwanace jwa Tabele kuŵa mwenye jwa cilamboco.’

⁷ “Nambo Une AMBUJE nguŵeceta kuti Yeleyo ngasiyikomboleka, soni ngisiyitendekwa kose.

⁸ Pakuti cilambo ca Siliya cikusalilumba ligongo lya msinda wawukulungwa wa Damasiko, nipo Damasiko ukusalilumba ligongo lya mwenye jwakwe Lesini. Kuŵeceta ya Aefelemu, mkaniyipite yaka 65, taciŵa ali ajonanjidwe, ngasaŵa soni mtundu wa ŵandu.

⁹ Cilambo ca Efelemu cikusalilumba ligongo lya m'msinda wakwe wekulungwa wa Samaliya, nipo msinda wa Samaliya ukusalilumba ligongo lya mwenye jwakwe Peka. “Naga ngimkulimbicila pa cikulupi cenu, timcilepela kulimbangana nditu.”

Cimanyisyo ca Emanuwele

¹⁰ AMBUJE ŵaŵecete soni ni Ahasi kupitila mwa jwakulocesya* Yesaya kuti,

¹¹ “Mŵende cimanyisyo kutyocela kwa AMBUJE, Mlungu jwenu. Komboleka kuŵa cakutyocela ku cilambo ca ŵandu ŵawe kapena cakutyocela kwiwunde.”

¹² Nambo Ahasi ŵatite kuti, “Nginaŵenda AMBUJE. Ngingusosa kwalinga AMBUJE.”

¹³ Pelepo Yesaya ŵatite, “Mpikane sambano, jemanja yisukulu ya Daudi!* Ana ngiyikumkwanila kwapesya ŵandu, ana apano mkusaka kumpesya ni Mlungu jwangu jwene?

¹⁴ Ni ligongo lyakwe AMBUJE jikape tacimpa cimanyisyo. Mlole, mwali tacikola cilu mkanatame ni jwamlume, nipo taciŵeleka mwanace jwamlume, nipo mwanacejo tacimpa lina lyakwe Emanuwele

¹⁵ Mwanaceju tacilyaga mawuta ga mkaka ni uci, mpaka ali amanyilile kucikana cindu cakusakala ni kucisagula cindu cambone.

¹⁶ Nambo mkinijiyice ndaŵi jelejo, yilambo ya ayimwene ŵaŵili ŵele ŵakumjogoya tiyiciŵa yili yitendekwe kuŵa yangatamidwa.

¹⁷ “AMBUJE taciŵika pa jemanja ni pa ŵandu ŵenu nipo soni pa liŵasa lya baba ŵenu, masiku ga yisawusyo yele nganiyipagwe citandile lisiku lyele Efelemu liŵatyosile ku Yuda. Ni kuti AMBUJE taciyika najo mwenye jwa ku Asiliya.

¹⁸ “Lisiku lyelelo AMBUJE tacaŵilanga ŵandu ŵa ku Iguputo nipo taciyika ŵajinji mpela membe, syakutyocela ku mtepa kwa nyambi sya Lusulo lwa Nayilo. Tacaŵilanga soni ŵandu ŵa ku Asiliya nipo taciyika ŵajinji mpela nyuci.

¹⁹ Wosopewo taciyika ni kutamilicika m'yiŵata yakuseleleka, masimbo ga m'malwala ni pa yitela yosope ya miŵa nipo soni pa malo gosope gakulicisya yilangwa.

²⁰ “Lisiku lyelelo AMBUJE tacilemba ŵakusenga ŵakutyocela pesi pa Lusulo lwa Yufuleti, mwenye jwa Asiliya. Ni lwembe lwakwe tacimsenga umbo sya mu mtwe ni mcilu nipo soni ndewu.

²¹ “Pa lisiku lyelelo mwine mundu tacigamba kulanga ng'ombe ja mwana ja mkaka ni ngondolo siŵili.

²² Nambope, tacipata mkaka wejinji, mwamti jwalakwe taciŵa mundu jwakulya cenene. Pakuti jwalijose jutacisigalila mcilambomo tacilyaga mawuta ga mkaka ni uci.

²³ “Pitiliciyika lisiku lyelelo, migunda ja mpeleya jele jili jambone, jele jikwete yitela yakwana 1,000 mu mgunda uliwose nipo kuti mtengo wakusumicisya ni yiduswa 1,000 ya silifa,* mu migunda mwelemu timucimela miŵa.

²⁴ Ŵandu taciyika kweleko kukutenda mani ali ajigele mawukunje ni mipamba, pakuti mcilambo mosopemo timucigumbala miŵa.

²⁵ Nipo m'matumbi mosope mwele ŵandu ŵalimaga kala, ŵandu ngasayikako, kogopa miŵasyo. Malogo tigacitendekwa kuŵa gakulicisya ng'ombe ni ngondolo basi.”