Yesaya 59 - Chiyawo Bible

Jwakulocesya akujuwula ulemwa wa ŵandu

¹ AMBUJE* ngaŵa kuti ŵangali macili kuti mpaka alepele kumkulupusya jemanja, ngaŵaga kuti ali jwangapikana kuti mpaka alepele kupikana yimkuŵenda jemanja.

² Ulemwa* wenu umlekangenye ni Mlungu jwenu nipo jwalakwejo amgalawucile jemanja ligongo lya ulemwa wenuwo. Myoyo jwalakwejo jwangapikana yimkusaŵeceta jemanja.

³ Magasa genu gacejele ni miasi jimwasulwisye. Mwalisakesye ni ulemwa wenu wejinji. Pakamwa penu pakuŵeceta ya unami, pakuŵeceta ya mabosa.

⁴ Pangali jwakusamjimba mjakwe magambo mwakulungama pangali jwakusajawula ku nganya ja magambo mwakuwona. Akusakulupilila yangali mate, akusagamba kuŵeceta mabosa. Akusagamba ganisya ya mbulupulu, nikutenda yakusakala yakuganisya jemanjajo.

^5-6 Malindi gawo gali gakogoya mpela mandanda ga lijoka lya lipili, nambo soni yili yangalimba mpela lwawu wa lundandambuli. Jwakulya mandanda ga lipili akusawa. Lindanda limo naga likukasika mukusakopoka. Lwawu lwa lundandambuli ngaŵa mkuwuwala mpela nguwo, yakusatenda ŵanduwo ngaŵa mkuliwunicila. Yitendo yawo yili yakusakala. Soni akusanonyela kutenda ya ndewo ni magasa gawo.

⁷ Akusawutucila kuja kutenda yakusakala, ŵangakaŵa kuwulaga ŵandu ŵangalemwa. Nganisyo syawo syosope sili pa yakusakala. Kulikose kwakusajawula akusalekako masame, soni akusajonanga.

⁸ Kwele kuli jemanjajo, ŵandu ŵangasimana mtendele. Yosope yakusatenda yili yangali cilungamo. Akusajenda m'matala gepindicepindice, soni jwalijose jwakwenda m'matala gelego ngasawusimana mtendele.

Ŵandu akwiticisya ulemwa wawo

⁹ Ŵandu akuti, “Ligongo lya yosopeyo cilungamo citutalicile, soni ngaŵa mkomboleka kutama mu umi wa uswela. Tukusasosasosa lilanguka, nambo tusagamba kusimana cipi. Tukusajembecela kuti tikucilanguka, nambo kuli cipi.

¹⁰ Tukusapapasyapapasya mpela ŵandu ŵangalola, tuli mpela ŵandu ŵangali meso. Tukusakuŵala cilu mpela cilo. Uwe tuli ŵacijumi, nambope tuli mpela ŵandu ŵawe.

¹¹ Wosope tukusabangula mpela yimbalangondo, soni tukusalila mwakudandawula mpela ngunda. Tukusajembecela cikulupusyo, nambo cili kutali ni uwe.

¹² “Ŵalakwe AMBUJE, twalemwecesye. Ulemwa wetu ukutusisya, ulemwa wetu uli pa uwe, soni ngaŵa mkana ni cimo cose.

¹³ Twajimucile, twakanile, Ŵalakwe AMBUJE, soni tukanile kwakuya ŵalakwe. Twakanganicisye acimjetu, twajimucile ŵalakwe. Nganisyo syetu sili sya unami, maloŵe getu soni gali ga unami.

¹⁴ Kwamuka kwa cilungamo kumasile, soni kutenda ya uswela ya Mlungu kulikwakutalicila. Yakuwona yisyesyene ngayikusimanikwa soni mu nganya sya magambo, soni cilungamo ngicikusimanikwa kweleko.

¹⁵ Yakuwona yisoŵile kweleko, nipo jwalijose jwangatenda nawo yakusakala, akusasimana ni yisawusyo. AMBUJE ali cile kwakulupusya ŵandu ŵawo AMBUJE ŵayiweni yeleyi nipo nganasangalala nayo kuti paliji pangali cilungamo.” AMBUJE ayiweni yeleyi nipo ali ŵangasangalala kuti cilungamo pangali.

AMBUJE akuliŵicila cile kwakulupusya ŵandu ŵakwe

¹⁶ Jwalakwejo ali jwakusimonga kulola kuti pangali jwalijose jwakuti ŵakamucisye ŵakulagasidwa. Myoyo jwalakwejo takamulisye macili gakwe kwakulupusya jemanjajo ni kupunda.

¹⁷ Ŵawete cilungamo mpela cakuwala cacisyano ca pacidali, nipo kumtwe ŵakwe ŵawete cisoti cacikulupusyo. Ŵawete cilungamo mpela mkanjo wa ku ngondo nipo lutumbilo lwaŵele mpela cakuliwunicila cakwe.

¹⁸ AMBUJE tacipeleka cilango kwa amagongo ŵa ŵandu ŵakwe mwakwayana ni masengo gawo: tacilosya ukali kwa ŵandu ŵakumjimucila, atamose ŵele ŵakutama kwakutalika.

¹⁹ Myoyo ŵandu tacajogopa AMBUJE kutyocela kungopoko lyuŵa mpaka kungapilo lyuŵa. Taciyika mpela mesi ga mu lusulo gakuwutuka, gakupujidwa ni cimbunga.

²⁰ AMBUJE akwasalila ŵandu ŵawo kuti, “Tinjiyika ku Yelusalemu kukwakulupusya ŵa mwiŵasa lya Yakobo* ŵele ŵalesile kulemwa.

²¹ Nipo tinjitenda nawo cilanga* cakuti, kutandila sambano mpaka ndaŵi syangamala, msimu wangu uwuli pa m'mweji, nipo soni maloŵe gangu ganagaŵisile mkamwa mwenu, ngasigatyocela soni mkamwa mwenu kapena mwa ŵanace ŵenu kapena mwa yisukulu yenu mpaka kalakala.”